EZRA 7
7
Ezra Yerusalem moo Ju" lo Khyoo
1Zain void gye" myang" thang: ri Persi khosen Artaxaxe vhoebkhang" uri Ezra ga: su: dayug nyid. Nyang: gi nya: phoug" phyid" byuxeig ri khainjung moo" Arun ju" sho' doem tau" shab lo" ri hidsu" yo" myang. Ezra nya: phoo Seraia- nya: phoo Azaria- nya: phoo Hilkia- 2nya: phoo Shalum- nya: phoo Zadog nya: phoo Ahitub- 3nya: phoo Amaria- nya: phoo Azria- nya: phoo Meraiod- 4nya: phoo Zerahia- nya: phoo Uzi- nya: phoo Bukki- 5nya: phoo Abishua- nya: phoo Pineha- nya: phoo Eleaza- nya: phoo Arun khainjung ju" sho' nghoid.
6-7Ezra gi Israela byumyu" yi da" Aseing Mangsoo Moshe ri byid: da" joeb byeung" lasi laleug da" tarha" phajhi" seing: dayug nghoid nyid da:. Ciwim ga: ri Ezra gi Aseing Mangsoo da" mainkaid jeju" ri shoug" yu ziyo' nya: mho' gu: dangain" ziri khokham gi nyang: ri byid: da:. Artaxaxe khokham koid zi nyhed zain ein: zain ri Ezra gi Babelon mung" mo Yerusalem khyoo: Israela byumyu" daphung: we' khainjung yi we' Levi yi we' Noku Yhoem: Moo" mo music phung: we' Noku Yhoem: Moo" zung" mo, we' moo" zei: mo, we' shu" wigi thu loo bye: zi nghoid. 8-9Nyangnu" gi lhammoo" dakhyab khyab lho' xain" nyid" ri Babelon mo thu lo wigi Mangso pang" thoug ziyo' lhammoo" wim: khyab xang: shi" nyid" ri Yerusalem khyoo: ju" lo boem abye: go" zi nghoid. 10Ezra gi Aseing da" tarha" ri jhoug" yu wa shid re" we' cang loo" wa shid re" we' Israela byumyu" yiri hau: tarha" dangain" ri jhau" byid: wa shid re" we' nya: apyaid ri shug byid: too" bye:.
Khosen Artaxaxe wigi Ezra ri Byid: da" Sagse: Dang: Jhug Mougsoug"
11Israela byumyu" yiri Aseing byid da" tarha" yo' amyeing" dang: ri joeb byeung" lasi laleug da" tarha" si' su: phajhi" seung: khainjung Ezra ri khosen Artaxaxe he: sagse: dang: jhug mougsoug" ri foin: byid: kaid bye:.
12Khosen Artaxaxe jang" mo mougkhung: mungdain: mo Mangso da" tarha" ri jhoug" yu nyid su: khainjung Ezra jhang khyoo: pyeing: dang: foin: kaid.
13Ngoo gi nga" mungdain: khyi' khang" moo" moo nyid nyid da" Israela byumyu" yi khainjung yi Levi yiri Yerusalem khyoo: doem loo" wa myid bo nghoid rigi nang yo' dage" loo" ge' ein: amyeing" byid: bye:. 14Ngoo yo' dage" nga" phajhi" byid: nheigboo nyhed yug gi nang phau" myang: ziyo' cang nyid da" re" Mangso tarha" khayhi' ge ga: ziri myang wa shid re" Yerusalem yo' Yuda mung" akhyoo" ri yhe: yu" baja" ein: nang ri nhang: kaid bye:. 15Yerusalem moo nya: yhoem: moo" jo, da" Israela byumyu" yi da" Mangsoo ri ngoo yo' nga" phajhi" byid: nheigboo yi byid: nau nheigloem: yo' byid: da" sheing: yo' ngei alu: ri we' nang nanyang: yo' dage" ci: loo" wa zi nghoid. 16Israela byumyu" yi yo' khainjung Yerusalem moo jo, da" nyangnu" da" Mangso Noku Yhoem: Moo" shid re" byid: da" alu jhungshug joem yo' Babelon mung" du dangain" jang" mo nang shoug" zheing" yu da" ngei yo' sheing: dangain" ri we' nang yu ci loo" wa zi nghoid.
17«Nang hau: ngei pyi" ri nu: joem yang loo: joem yang nu" joem gug zoo meiloem: yo' zabyid yhid: qei jang" moo yhoung: wigi Yerusalem mo Noku Yhoem: Moo" xoin" to' phoin: moo hau: joem ri xoin" to' wa zi nghoid. 18Deing jo, shi" da" ngei yo' sheing: rigi nanu" ca" jang" moo nanu" Mangsoo vhoo: ziyo' dakhyoo" ti" re" byumyu" yi myid vhoo: khyo" nang ci: yhoung: wa zi nghoid. 19Noku Yhoem: Moo" moo noku koid uri ci: wa shid re" nang ri byid: da" oug" khu lang: bain joem dangain" ri Yerusalem mo Mangso shidkhoin" moo nang ab byid: wa zi nghoid. 20Noku Yhoem: Moo" shid re" gootu: nang moo ca" gu: ri we' khokham ngei sheing: jhi: mo nang yo" yu wa zi nghoid.
21«Ngoo gi Uphrad gyid lang bidvang shoid mo mung" du khoug: moo nyid da" jonu" jhi: moo moo" zei: bang: ri mougkhung: mungdain: mo Mangso da" tarha" ri jhoug" yu nyid da" khainjung Ezra shid re" ci: nghoid nghoid nyang: tid lo ziyo' dayhang: ti" 22Myo: thang ngei 2062 joid: jain" sungsoo: 5000 bye: zabyid yhid: 550 galain: zhainloin: xu: 550 galain: yo' xoo" ca" myhoo ri nheugshid: nheugdeug pang" thoug wa shid re" amyeing" byid: too" bye: zi nghoid. 23Ngoo yo' nga" thang: moo khokham koid bang: ri Mangso wigi khanham we' anheig yoo: baja" mougkhung: mungdain: mo Noku Yhoem: Moo" shid re" nyang: tid lo gu: dangain" ri bo pang" wa shid re" nanu" goo" lhoo' koid ca" wa zi nghoid. 24Nanu" gi khainjung yi Levi yi music phung: yhoem: zung" bang: moo" zei: bang: yo' gootu: he: Noku Yhoem: Moo" yo' sen: bang: ri gamboem yo" khyu: wa zi anghoid.
25«Ezra nang we"- re" Mangsoo nang ri byid: to" da" phajhi" ri ci: wigi Uphrad gyid lang bidvang shoid mo re" Mangso tarha" yo' nyid da" byumyu" dangain" adang moo vhoebkhang" wa shid re" mung" vhoeb bang: yo' tarha" agyi yiri khyen: tu' too" wa zi nghoid. Hau: tarha" gi asi' mo ri we' nang jhau" byid: ca" wa zi nghoid. 26Nanu" Mangso da" tarha" joem ri nghoid nghoid khokham da" tarha" joem ri nghoid nghoid acang nghoid rigi said pyam khyo" wigi nghoid nghoid. Join koid nhang: wa khyo" wigi nghoid nghoid. Jonu" ri shava seing: yu pyam wa khyo" wigi nghoid nghoid. Thung: lhoung wa khyo" wigi nghoid nghoid. Nyangnu" ri dam byid: wa zi nghoid.
Ezra Mangsoo ri Coung" Ngei' Khyoo:
27Ezra tid zigi «Yerusalem moo jo, da" Noku Yhoem: Moo" ri koid wa shid re" Aseing gi khokham ri nheigloem: khoem" duang: phang byid: yoomo ngoonu" phoug" phyid" da" Aseing Mangsoo ri coung" nghei o". 28Mangso da" jeju" yoomo ngoo gi khokham yo' nya: phajhi" boo bang: nya: da" yoem: so' gyi: da" moo" voin bang: dangain" adang moo myonhoo: gyi: nyid da:. Nga" Mangsoo gi ngoo ri yoem: byid: nyid yoomo Israela byumyu" akung: ako' yi da" vhujhung: yi myoo: sho' ri ngoo yo' dage" tau" loo wa shid re" ngoo yo" mhoid" phyo' bye: zi nghoid.
Currently Selected:
EZRA 7: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.