MATTHAI 7
7
Mi Soisel Hlah
(Luk 6.37-38, 41-42)
1“Mi va soi hlah; cuticun Pathian in a lo soi ve lo ding. 2Ziangahtile mi na soi vekin nangmah khal Pathian in a lo soi ve ding ih midang parih na hmanmi tahfung in Pathian in a lo tah ve ding. 3Na mit sungih thingtum hman poisa loin na unau mit sungih mithnawm fate kha ziangah so na poisat? 4Na mit sungah thingtum a um nacingin ziangtinso na unau cu ‘Na mithnawm ka lo coihsak ding,’ tiih na ti thei? 5Mititer aw pa! Na mit sungih thingtum kha suah hmaisata awla cuticun na unau mit sungih mithnawm cu fiangtein na hmu thei ding ih na coihsak thei ding.
6“A thianghlimmi thil kha uico va pe hlah uh; her tahratin nanmah riangri sawp seksek in a lo keu ding. Nan keplung mankhung pawl cu vok hmaiah thlak hlah uh; a ke in a pal lak men ding a si.
Dil Uh, Hawl Uh, King Uh
(Luk 11.9-13)
7“Dil uh, nan ngah ding; hawl uh, nan hmu ding; king uh, nan hrangah sangka on a si ding. 8Ziangahtile a diltu hmuahhmuah cun an ngah ding, a hawltu hmuahhmuah cun an hmu ding ih a kingtu hmuahhmuah hrangah sangka cu on sak an si ding. 9Nan faate pawl in saang an lo dil asile, nannih pale pawl in lungto nan pe ding maw? 10Nga lo dil hai sehla rul nan pe ding maw? 11Mi ṭha lo zet nan si naón nan faate pawl hrangah cun a ṭhami thil pek nan thiam a si ahcun vancungih a ummi nan Pa in a diltu hnenah cun ziangtinso thil ṭha pek loin a um ding.
12“Mi in kan parah tuah hai seh ti nan duh vekin mi dang parah tuah ve uh. Himi hi Moses Daan le profet pawl thuzirhnak ih sim duhmi taktak cu a si.
Kotka Fiak
(Luk 13.24)
13“A fiakmi kotka sungin feh uh, ziangahtile hell fehnak kotka cu a kau ih a lamzin khal a ol; curuangah a zawhtu khal an tam a si. 14Sikhalsehla nunnak sungih luhnak kotka cu a fiak ih a fehnak lamzin khal a har; curuangah a thleng suaktu cu mi malte an si.
Thingkung Le A Rah
(Luk 6.43-44)
15“Profet deu pawl khi ralring uh; an lenglam cun tuu bangin nan lakah an tlang; asinain an sunglam cu cinghnia hrang vek an si. 16Mi ziangvek an si ti cu an tuahmi in nan thei ding. Hling kung ihsin sabit a rah dah lo; lenhling khal in theipi a rah dah keel lo. 17A harhdammi thingkung ṭha cun rah ṭha a rah ih thingkung ṭha lo cun rah sia a rah. 18A harhdammi thingkung cun rah sia a rah thei lo ih thingkung ṭha lo cun rah ṭha a rah thei ve lo. 19Cule rah ṭha a rah lomi thingkung cu an hau ih meisa sungah an paih ṭheu. 20Cuvekin profet deu pawl cu an tuahmi in nan theithiam ding.
Ka Lo Thei Dah Lo
(Luk 13.25-27)
21“‘Bawipa, Bawipa,’ tiih i kotu hmuahhmuah in vancung Uknak an thleng thluh lo ding; vancungih a ummi ka Pa ih duhnak a tuahtu lawnglawng an thleng ding a si. 22Thuṭhen Ni a thlen tikah mi tampi in ‘Bawipa, Bawipa, na hmin in thu kan sim, na hmin in khawsia tampi kan dawi suak ih mangbangza tampi kan tuah,’ tiah ka hnenah an ti ding. 23Asinain kei cun, ‘Ka lo thei dah lo! Ka hnen ihsin tlan uh, nannih mi ṭha lo pawl!’ tiah ka ti hai ding.
Inn Saktu Pahnih
(Luk 6.47-49)
24“Curuangah hi ka ṭongmi a thei ih a thluntu cu lungpi parih inn saktu mifim pa bangtuk a si. 25Ruah napi in a sur, ti a lian ih thlipi in a nuai ciamco naón lungpi parih sakmi inn a si ruangah a sawn lo.
26“Sikhalsehla hi ka ṭongmi a thei naón a thlun lotu cu vunnel parih inn saktu mi-aa bangtuk a si. 27Ruah napi in a sur, ti a lian ih thlipi in a nuai tikah a sawn mai; a tlu ih a siatbal thluh a si,” tiah a ti.
Jesuh Thuneihnak
28Jesuh in hi thu hmuahhmuah a sim ṭheh tikah misenpi pawl cu a thuzirhmi kha an mang a bang ngaingai. 29Anih cun Daanthiam pawl vek si loin thunei zetin thu a zirh a si.
Currently Selected:
MATTHAI 7: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.