HOSEA 10
10
1Israel cu a rah tamzet sabit hri vek a si. An paṭhat deuhdeuh tikah biakṭheng tam deuhdeuh an dawl. An ram in rawl tam deuh a suah tikah an biakmi ṭhuamthiang pawl cu mawi deuhdeuh in an tuah. 2An thinlung cu bumnak in a khat ih anmah ih sualnak ruangah an tuar ding. Pathian amah rori in an biakṭheng pawl cu a bal ding ih an ṭhuamthiang pawl cu a khiak ṭheh ding.
3Reilote ah hi minung pawl in, “Bawipa kan ṭihzah lo ruangah siangpahrang kan nei lo. Asinain siangpahrang cun ziangso in tisak thei cuang ding? 4An ṭong lawnglawng a si ko; thulolak kamawknak le tiamawknak lawnglawng a si. Dingnak cu dinglonak ah a cang ih leileh sungih tur nei hrampi bangin a kho ciamco,” tiah an ti ding.
5Samaria khawpi sungih a ummi pawl cu an thin a phang ding ih Bethel ih an sui cawcang a hloh ruangah an riah a sia ngaingai ding. Anmah le an puithiam pawl cun a cuih cawlem cu an ṭah ding. A mawinak sui hmuahhmuah an lak ṭheh tikah an ṭap an raak ding. 6Cuih cawlem cu Assiria siangpahrang bawipa hnenah siah ai-ah an pek ding. Cawlem biak ding thu a thlun ruangah Israel cu ningzak le mualpho in a um ding. 7Samaria le a siangpahrang cu tidai parih a phuanmi thingtan feemte bangin a fen hlo ding. 8Israel mi ih biakmi Aven tlangzim ih milem pawl cu siatsuah ṭheh an si ding. An biakṭheng parah hrampi le hlingkung an kho ding. Mipi pawl in tlangsaang hnenah, “In thup aw,” an ti ding ih tlangte hnenah cun, “In khuh aw,” tiah an ko ding.
Bawipa In Israel Thu A ṭhen
9 Bawipa in, “Israel mi pawl in Gibeah ih an sualnak thok in atu tiangah ka parih sual hi an cawl dah lo. Curuangah ral in Gibeah ah a man ding. 10Hi misual phun hi ka do ding ih ka hrem ding. Miphun tampi in an bor ding ih an sualnak tampi ruangah hremnak an tuar ding.
11“Israel cu hlanlai ahcun cawcangte hremṭhatmi fang ciil duhzetmi bangtuk a rak si. Asinain hnaṭuan khung ṭuan thei dingin a mawizetmi a hngawng ah hngawngkol ka thluah. Judah in ṭhee a hnuk ih Israel in ṭhun a hnuk, cutiin lei an let. 12‘Nan hrangah lei thar let uh; dingnak phun uhla ka hnenih nan ṭan man thlawsuahnak vui cu at uh. Nan Bawipa ka hnenih nan kir caan a cu zo; ka ra ding ih nan parah thlawsuahnak ka lo burh ding’ ka ti. 13Sikhalsehla nan tuhmi cu ṭhatlonak a si ih ṭhatlonak vui nan at a si. Nan thuphanpernak rah nan ei zo a si.
“Nan rangleng pawl le nan ralkap tamzet nan rinsan ruangah, 14nan minung hnenah raldonak a thleng ding ih nan ralṭannak hmuahhmuah siatsuah ṭheh an si ding. Cuih ni cu siangpahrang Shalman in ral a do ih Betharbel khua a siatsuah ih nunau le nauhak pawl a thah ṭheh ni vek a si ding. 15Thil ṭha lo nan tuahmi a tamtuk ruangah cuvek thotho in nannih Bethel minung par khalah a cang ding. Raldonak a thok vete in Israel siangpahrang cu a thi ding,” tiah a ti.
Currently Selected:
HOSEA 10: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.