Marko 5
5
Etaŋidaryo Yesu Atulo al Isita’to
Mt 8:28-34; Lk 8:26-39
1Attati isi fanyan ilotifor hari tole lifau Gerasa. 2Ihwania al isuru Yesu to togol ottu obo atulo te lumyo jihonyi ol owon iko ajohin hun orrohoji’to. 3Ette inyi imanyatyo ihiji lumyo, bwo fe obeŋ obo oremik ifitana inyi ara dwo bu ta aririk. 4Nyo oŋitek arryai ifitani inyi ta aririk bwo isyahini abilat ihejek honyi. Bwo inyi ofut aririk bwo aŋany abilat. Obeŋ tulo oremik bwarana inyi ta arrama. 5Ta arwejin iko noloŋi daŋ itoŋo inyi ihiji lumyo iko idoŋyok. Iwuwoŋita inyi dia bebe bwo fe oŋoco ahwan honyi ta namorwoi. 6Ninya igonyu inyi Yesu hottu alamarai, oŋer inyi jihonyi ette rigoŋi ihosyere honyi. 7Bwo fe oyyo inyi bebe ette iwaha jihonyi ojo, Yesu Lonyi Hollum, Eleittok, ?anyo hiram iwak iye jihoŋ? Ta afure Hollum amojo ni jihoi hettigemyo nani. 8Nyo ikyana dwo Yesu jihonyi ojo, Itai, ajohin hun irrohojata’to, ifwanna addi jihonyi. 9Ifiyo Yesu atulo olosita ojo, ?Ŋai afure hoi? Bwo inyi itarraŋ ojo, Afure hoŋ Legon on ojo elwaja hohoi arryai bebe. 10Omojoi isi jyo Yesu bebe oŋida obeŋ inyi ifuha isi alamarai jyo amaji ana. 11Ihwania owoni eluluŋ bataha hun olwaji hun oŋiye amiyaŋ itwa doŋe. 12Tania olwahai ajohin jyo Yesu ojori, Ifuha hohoi ihiji bataha oŋida ejiŋak hohoi itwajin hosi. 13Bwo fe iruk inyi isi hetefwahi. Bwo ajohin hun orrohoji’to ette fwan addi totwa tulo ette jiŋana itwajin bataha. Ette neluluŋ bataha ŋyoron ilotifor, hutu, hutu, hutu, ette kwahino itwa hari ette dyoro bwo fe ette ye iko dia. Arai isi alif arrihai.
14Ihwania ofuhoi leyyak bataha bwo fe iramani laati hutto miji bwo laati hutteger miji daŋ. Attati laati fwanna mijo anyo ihanie isi dia. 15Al afwonni isi jyo Yesu igonyuni isi atulo odwo isita’to ta ajohin hun orrohoji’to itoŋo ifau. Iyyafak inyi aboŋojin bwo fe obeŋ isita ette isi baŋi bebe. 16Laati hyodwo igonyuni’to eram ania iramani isi eram ono atulo odwo isita’to. Bwo fe iramani isi eram ono abataha. 17Tania ifuharai laati Yesu to fau hosi addi. 18Al isurok inyi itwa togol ifiyo atulo odwo isita’to Yesu lifwatari ikonyi. 19Ati obeŋ Yesu iruk afwatan ikonyi ati ojo inyi jihonyi, Ilo imiji hatai, iramak mottyarak hoi erre hun obolori’to hun ihanio Hobu jihoi bwo fe amehino honyi jihoi. 20Attati inyi leten ette itteryo iramana laati daŋ hutto misihi ’tomon erre hun ihanio Yesu jihonyi, attati laati daŋ hul itaniŋuni’to illilliha.
Ŋarri Yario iko Aŋotte on Owouno Hoto Honyi
Mt 9:18-26; Lk 8:40-56
21Allaŋ Yesu aŋati hari tolya ta atogol ette wotya ilotifor hari. Ofwonni eluluŋ wati hul olwaji bebe ette kolonia inyi ihiji. 22Attati lobo atulo ’tuna, afure honyi Yario, inyi eleittok olo aji imojit. Igonyu inyi Yesu ette rigoŋi jihonyi. 23Ette inyi mojo bebe ojo, Ojo ŋarri hoŋ aye. Waŋ ilo iyyabak aani hoi jihonyi oŋida odyoto ette su. 24Ette inyi leten ikonyi.
Ijifatye eluluŋ wati inyi ette susularo inyi. 25Bwo fe ottu nobo aŋotte on owouno hoto to hwan honyi ta aŋasi ’tomon harrihai. 26Bwo ottohoro inyi ittigemyo iko aŋwai honyi. Adaha inyi jyo akimi arryai bwo fe otuhok inyi agurusi honyi, ati obeŋ inyi oŋida, arasa inyi ŋwai. 27Itaniŋu nya inyi ta neram ono Yesu ette ’tuna te eluluŋ wati ihorwoŋ Yesu ette ’tir aboŋo honyi. 28Nyo igigilo inyi ta atwa honyi ojo, Ara dwo bu attir ni aboŋo honyi hama attadi ni ŋidari. 29Teyya teyya ette nooto honyi wotya bwo fe omijak inyi jo aŋida ahwan honyi. 30Omijak Yesu ihwania itaŋida adwaran honyi aŋotte ette inyi yito orwaŋai ihiji wati ette ifiyo ojo, ?Ŋai ottir aboŋo hoŋ? 31Ati ojori leyiyanak jihonyi, Igonyu iye eluluŋ wati osusularai iye bwo fe iye ifiyo, ?Ŋai ottir ani? 32Ati ofyalatyo Yesu oŋida igonyu inyi ŋai dwo ihanio ariŋ ania. 33Ihwania omijak aŋotte ariŋ an ihanio jihonyi. Dwadi abaŋ inyi bwo fe ikikiro, ottu inyi t’ehiji wati addi, ette rigoŋi ihosyere hejek Yesu ette iramana jihonyi erre daŋ. 34Bwo fe ojo Yesu jihonyi, Hanioŋ, itaŋida neruk hoi iye. Ilo ta nelik taji, hotoŋidara ahwan hoi ta aŋwai hoi.
35Hekyana inyi ihwania ofwonni omuk laati to haji Yario ojori, Aye ŋarri hoi. ?Nyo inyyak iye iloŋo ettiyanani? 36Ati obeŋ Yesu ihum igigilo ta nekyana ania ati ikyana inyi jo eleittok olo aji imojit ojo, Hebaŋ, iruho hama. 37Obeŋ inyi iruk obo ofwoi ikonyi arari Petro iko Yakobo bwo illanyi Yoane. 38Al afanyi isi ihaji leittok olo aji imojit, igonyu Yesu eluluŋ wati hul oyyoi’to bwo fe ilulwoi bebe. 39Attati inyi jiŋara itwa haji ette jaran jihosi, ?Anyo iwuwoŋitati tai bwo fe iyyoti? Obeŋ eito ania oye, ojoto joto. 40Ette isi suhotyo bebe. Ifuhak inyi isi daŋ alet. Iyaro inyi monye hito iko honyonyi iko leyiyanak hul ofwonni dwo ikonyi. Bwo fe ojiŋari isi imaji on oferyori neito. 41Ette inef aani honyi bwo fe ojo jihonyi, Talita kumi, on ojo, Ŋarri hoŋ, ajo ni jihoi odyotoi. 42Teyya attati neito dyoto ette itteryo adaha nyo arai aŋasi honyi ’tomon harrihai. Teyya teyya ette isi illilliha bebe. 43Attati inyi ifahina isi ta agolon jo oŋida obeŋi iramani obo atulo eram odwo, bwo fe iramak inyi isi hetesyaraniehe eito obo naŋiyo.
Currently Selected:
Marko 5: LOT1969
Highlight
Share
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.