Matteyo 7
7
Eram ono Aŋoco
Lk 6:37-38, 41-42
1Heŋototo obo atulo bwo obeŋ adi Hollum oŋot itai.
2Nyo ihwa iŋototo tai obo, oŋot adi bwo fe Hollum itai. Bwo fe te efahita hun isyatta tai obo, ittigemyo adi Hollum itai. 3?Aŋai adi igonyu obo alatai alle honyek al awon jo illanyi bwo obeŋ inyi igigilo te etoi on obolo’to otto honyek honyi? 4?Kuyya aŋai ikyana adi obo alatai jyo illanyi jo, Hadi, agorotu ni alle honyek to honyek hoi bwo owon etoi on obolo’to otto ononyi? 5Ara olo ahenyabani. Oŋida ahosyere ogorotu inyi etoi on obolo’to otto honyek honyi attadi inyi remehina igonyuna ligorotuniere alle honyek otto honyek illanyi.
6Hesyatta erre hun odwari’to jyo ebokwo bwo fe hebironia onoroi hun obwori’to jyo afotirak ŋadi irrirrye isi onoroi huna te ejek hosi ette bwo fe yito lirremyere itai.
Ifiyete, Ottifyati, Inninnaŋata Ekat
Lk 11:9-13; 6:31
7Ifiyete, bwo isyo adi Hollum jihatai. Ottifyati, bwo inyurana adi itai. Inninnaŋata ekat, bwo aŋa adi inyi jihatai. 8Nyo lya al ifiyo’to jyo Hollum ifwotu adi. Lya ol ottifya’to onyurak adi, bwo fe lya al inninnaŋyo’to ekat aŋai adi jihonyi. 9Obeŋ adi obo atulo tehiji hatai isyo lonyi honyi amorwo al amojo inyi aŋirya. 10Bwo fe kuyya omojo inyi ahami, ?isyo adi monyonyi inyi amunu? Obeŋ. 11Itai hul irrohojata’to, kuyya imijana tai lisyoryere erre hun oyiji’to jyo aduri hatai, ?obeŋ adi Monyatai ette dou isyo erre hun oyiji’to bebe jyo hul ifiye’to inyi? Isyo adi. 12Erre daŋ hun iwahata tai ihanie laati jihatai, oŋida bwo fe itai ihaniete on orryama jihosi. Nyo igyoroni huna ifahita bwo fe igyerita huno leyak sayyo.
Ekoi ol Ottida’to
Lk 13:24
13Adahati te ekoi ol ottida’to; nyo alat nekoi on orihoro’to laati liye, inyi on olwajarik ladak te ekoi ania. 14Ati ottida lekoi ol orihoro’to laati lisu inyi ol omutararik ladak te ekoi alya.
Ayyani iko Aŋer Honyi
Lk 6:43-44
15Ihumata mijo ebwanak hul inyobye’to. Nyo adahatye isi jihatai ihwa akyoro, ati litajya hosi arai isi ihwa elewwo hun oniamai’to. 16Imijana adi itai isi ta aŋer huno ehanita hosi. Ahode ittallihi laati huruna naŋer ajalaŋi to hikwa, bwo fe ittallihi huruna aŋer ŋaboli to laŋi. 17Tania ayyanio daŋ hun oyiji’to oŋijuni adi naŋer hosi hun oyiji, bwo fe ayyanio daŋ hun orrohoji’to oŋijuni adi hunosi hun orrohoji. 18Ati obeŋ ayyani on oyyu’to oremik nijuna aŋer hun orrohoji’to. Bwo fe obeŋ ayyani on orroho’to oremik ŋijuna aŋer hun oyiji’to. 19Oyefuni adi laati ayyanio daŋ hun obeŋi’to oŋijuni aŋer hun oyiji’to ette bironia lihima. 20Tania imijana adi itai isi ta aŋer hosi.
Abeŋ ni Amijak Itai
Lk 13:25-27
21Obeŋi adi laati daŋ hul ojori’to jihoŋ, Hobu, Hobu, ojiŋani lidou, ati ojiŋak adi lya al ihanio’to awahan ono Monyoŋ ette dou. 22Iholoŋ ania ojori adi laati arryai jihoŋ ojo, Aii, Hobu, Hobu. ?Ebeŋ nya hohoi ekikila ta afure hoi? ?Ebeŋ hohoi efuhak ajohin ta afure hoi? ?Ebeŋ hohoi ehanio ehanita arryai hun obolori’to ta afure hoi? 23Attati ni jaran jihosi jo, Abeŋ ni amijak itai ’tuŋ. Ifwatta addi jihoŋ, itai hulya hul ihaniete’to ehanita hun orrohoji’to.
Laduhok Arrihai
Lk 6:47-49
24Laati daŋ hul itaniŋuni’to ekyanita hoŋ bwo fe oniŋye ekyanita hwa arai adi isi ihwa olofere ol oduhok’to aji honyi lihide bak. 25Asayo ahide, ohuco oyyami bwo fe aari oŋettyo, attadi ahide ania ibak naji ati ittallik naji ania kwaharo nyo ara awoyo ohitir honyi ebak. 26Laati daŋ hul itaniŋuni’to ekyanita hoŋ bwo fe obeŋi oniŋye ekyanita hwa arai adi isi ihwa olosita ol oduhok’to aji honyi lisuluŋayo. 27Asayo ahide, ohuco oyyami bwo fe aari oŋettyo, attadi ahide ania ibak naji bwo naji ette kwaharo an atturo.
Elaballok ono Yesu
Mk 1:22
28Ninya latuhok Yesu nekyanita hunia, illillihai laati, 29nyo ittiyenio inyi isi ihwa aboloni, obeŋ inyi ittiyenio isi ihwa legyorok.
Currently Selected:
Matteyo 7: LOT1969
Highlight
Share
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.