Matteyo 22
22
Narryamara ono Alomone
1Inyyak Yesu ikyana jihosi ta narryamarita. 2Ara olobye Hollum ihwa hobu al ihuhumak alomone to lonyi honyi. 3Ifak inyi apiti honyi iloŋuniere laati hunya onyimuni jyo alomone ania ati ihari isi. 4Inyyak inyi ifahina apiti omuk ette jaran, Iramana aati hyodwo anyimu ni jojo, Imijyete, ehuhumak ni aŋiyo, esyak ni eteŋ iko atawwa hul ofiri’to bwo fe aŋidari erre daŋ. Ifwanna jyo alomone. 5Ati osuhotyerek isi ette fwatan imasik hosi, olo obo imana honyi bwo obo olo igyama honyi. 6Attati omuk inefuna apiti honyi ette ihanio on orroho jihosi ette ’tohoro isi. 7Al itaniŋu hobu erre huna iloŋojita inyi bebe. Ifak inyi oseŋer honyi ette ’tohoro lattok hulya ette swahina amiji hosi. 8Attati inyi jaran jyo apiti honyi ojo, Ehuhumak ni alomone ati orrohoji laati hunya eloŋu ni. 9Ifwatta ikoi otto homom miji bwo fe iloŋuniete laati daŋ hul inyurana tai jyo alomone. 10Attati apiti fwatan ikota iloŋuniere laati daŋ hul onyurani isi; laati hul orrohoji iko hul oyiji’to, ette aji ifut ta atamonok lor lor.
11Ojiŋak hobu imijyere atamonok hulya ette igonyuna obo atulo ol obeŋ iyyafak aboŋo ono alomone. 12Ojo inyi jihonyi, Illa, ?aŋai ijiŋak iye dini al ibeŋ iyyafak aboŋo ono alomone? Ati ittallik lya itarraŋ. 13Tania ojo Hobu jyo apiti jo, Ifitata ahas iko ejek honyi bwo ibironia inyi ilet imaji ono edumele. Owon adi ayyo iko aŋutta hala dia. 14Nyo iloŋuni laati arryai ati omutari hul onyimuni.
Eram ono Amusuru
Mk 12:13-17; Lk 20:20-26
15Attati Farisei fwatan iwwahari aŋai adi inefuni isi Yesu ta nekyanita honyi. 16Ojo teyya ette isi ifahina leyiyanak hosi arabotye iko Erodiahyen jihonyi ette jaran, Hettiyanani, emijak hohoi jo owon nelahode jihoi bwo fe iye ittiyenio ekoi ono Hollum ahode. Ibeŋ iye ibaŋ obo atulo bwo ibeŋ igigya laati. 17Iramak ati hohoi, ?Igigilo iye anyo? ?Oyyu idumari amusuru jyo hobu Cesare kuyya obeŋ? 18Ati omijak Yesu enyobita hosi ette jaran, Jai, henyabak, ?ikemyete tai ani nyo? 19Itahutana jihoŋ arobia, ette isi itahutana arobia jihonyi. 20Ojo inyi jihosi, ?Anaŋai arrijori ana bwo fe anaŋai afure ana? 21Ojori isi, Huno Cesare. Tania itarraŋ inyi ojo, Isyatta jyo Cesare erre Cesare bwo fe jyo Hollum erre huno Hollum. 22Al itaniŋuni isi nekyanita hunia illillihai isi bebe ette busana inyi ette fwatan addi.
Eram ono Nebuhuna
Mk 12:18-27; Lk 20:27-40
23Iholoŋ ania ofwonni Saducehyen jihonyi hul ojori jo obeŋ nebuhuna bwo ifiye isi inyi ojo, 24Hettiyanani, ojo Mose jo, “Kuyya oye atulo hobeŋi aduri jihonyi, oŋida illanyi ojuŋori ŋorwoi honyi isiuniere aduri te illanyi.” 25Owoni nya illarak hattarik. Oyemu oloŋeu aŋotte ette ye hobeŋi duri, ette illanyi juŋori ŋorwoi honyi. 26Ihanie etarrihi iko etahunihi ihwo nya many isi daŋ hattarik. 27Ihalu aye aŋotte bwo fe. 28?Iholoŋ ono ebuhuna ottu adi inyi itoŋo ŋorwoi ŋai? Nyo isi daŋ hattarik ojuŋorik inyi.
29Itarraŋ Yesu jihosi ojo, Ipalata tai nyo ibyaŋata tai imijana egyerita kuyya bu nadwaran ono Hollum. 30Iholoŋ ono ebuhuna obeŋi laati ayamai bwo fe obeŋi aŋatani iyamari, ati arai isi ihwa anjelohyen hutte dou. 31Ati te eram ono nebuhuna ono layak, ?ibyaŋata tai iheniete nerre hunya ikyana Hollum jihatai? Ojo inyi, 32“Ani Hollum olo Abramo, Hollum olo Isako, bwo fe Hollum olo Yakobo.” Obyaŋara inyi Hollum olo layak ati ara inyi olo leswok. 33Itaniŋuni eluluŋ wati erre huna ette isi illilliha bebe ta nettiyenita honyi.
Nefahi on Obolo’to
Mk 12:28-34
34Ottubanie Farisei arabotye al itaniŋuni isi jo itadwa inyi Saducehyen. 35Obo olosi al ara’to ahaŋotoni hirre awak kemyo inyi ette ifiyo inyi ojo, 36Hettiyanani, ?anani efahi on obolo’to jyo efahita daŋ? 37Ojo inyi jihonyi, “Oŋida itai imunoti Hollum Hobu hatai ta atajya hatai daŋ iko to oloyirihyen hatai daŋ bwo fe te egigilita hatai daŋ.” 38Ara ana efahi on obolo’to agalik daŋ. 39Ara etarrihi ihwa inyi. “Oŋida itai imunoti hutto lonyihari hatai ihwa ahwattek hatai.” 40Arai efahita huna arrihai awoyo hiram ono efahita daŋ iko egyerita huno eyak sayyo.
Efiyo ta Lonyi Davide
Mk 12:35-37; Lk 20:41-44
41Ottubanie Farisei arabotye bwo Yesu ette ifiyo isi ojo, 42?Igigiloti tai anyo to Kristo? ?Inyi lonyi ŋai? Itarraŋi isi jo, Inyi lonyi Davide. 43Ojo ati inyi jihosi, ?Kuyya inyi lonyi Davide, nyo ati iloŋo Davide inyi jo Hobu? Nyo ifut inyi iko Oloyiri ol Olibo bwo ojo inyi,
44“Ojo Hobu Hollum jyo Hobu hoŋ,
Itoŋoi oŋyatai hoŋ
Many ehananiere ni amyorok hoi ebalori hejek hoi.”
45Kuyya iloŋo Davide inyi jo Hobu, ?aŋai ara inyi o lonyi honyi? 46Obeŋ obo oremik itarraŋ Yesu to obo nekyana ’tuŋ, bwo fe to oloŋ ania abaŋi isi daŋ ifiyere inyi omuk erre.
Currently Selected:
Matteyo 22: LOT1969
Highlight
Share
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.