Hezrà 6
6
Valin-tenin’ny amperôra Dariôsa
1Dia nanome baiko ny amperôra Dariôsa mba hizahana ny trano fitehirizan-taratasy sady fitehirizan-drakitra tao Babilôna. 2Saingy tao Akmeta#6.2 Akmeta I Akmeta, renivohitry ny fanjakàn’i Media teo aloha, dia nisy fonenam-pahavaratra ho an’ny amperôra (i Hamadàna ankehitriny any Iran izany)., izay tanànamimanda ao amin’ny faritr’i Media, no nahitana horonan-taratasy anankiray mirakitra izao filazana an-tsoratra izao:
3«Tamin’ny taona voalohany nanjakàn’ny amperôra Kirôsa, dia namoaka didy izy nanao hoe: Ny amin’ilay tranon’Andriamanitra dia aoka haorina indray izany mba hanoloran-tsorona, ka ny fototra taloha no hampiasaina. Ho telopolo metatra ny haavon’ny trano ary ho telopolo metatra koa ny sakany; 4vato vaventy telo andalana sy hazo matevina iray andalana#6.4 Jereo 1 Mp 6.36. no hampifandimbiasina amin’izany. Aoka haloa avy amin’ny tranon’ny amperôra izay lany. 5Ny fanak’ilay tranon’Andriamanitra koa, izany hoe ireo fanaka volamena sy volafotsy izay nalain’i Nebokadnetsara tao amin’ny tempolin’i Jerosalema ka nentiny ho any Babilôna, dia aoka haverina ho any amin’ny tempolin’i Jerosalema indray ka samy hapetraka amin’ny toerany ao an-tranon’Andriamanitra».
6Noho izany dia nalefan’i Dariôsa izao taratasy izao:
«Any ianareo, ry Tatenay governoran’ny faritra andrefan’ny ony Eofrata sy ry Setara-Bôzenay mbaminareo namany mpifehy#6.6 Jereo 5.6 sy nta. ny Afarsekita any andafy andrefan’ny ony.
«Mihataha tao ianareo 7ka avelao hotohizana ny fanaovana io tranon’Andriamanitra io; aoka ilay governoran’ny Jiosy sy ireo loholony hanorina indray io trano io amin’izay toerany taloha. 8Izao no didy avoakako ho anareo any amin’izay tokony hataonareo amin’ireo loholona jiosy hanorenany indray izany trano izany: aoka ny haren’ny amperôra, dia ny hetra avy amin’ny faritra andrefan’ny ony no handoavana izay lany marina ho an’ireo lehilahy ireo mba tsy hiatoatoan’ny asa. 9Ny zavatra ilain’ny mpisorona ao Jerosalema dia omena azy isan’andro isan’andro tsy tapaka: na ny ombilahy sy ondrilahy ary zanakondry hanaovana sorona dorana manontolo ho an’Ilay Andriamanitry ny lanitra, na koa ny varimbazaha sy sira na divay sy menaka, samy araka ny fandaharana ataon’ireo mpisorona. 10Dia afaka hanolotra sorona ho hanitra ankasitrahina ho an’Ilay Andriamanitry ny lanitra ry zareo, no hivavaka mba ho ela velona ny amperôra mbamin’ny zanany. 11Mamoaka didy koa aho fa na iza na iza mandika izao teny izao, dia aoka hangalana hazo anankiray avy amin’ny tranony ary hatsatoka izany ka hahantona eo ny tenany#6.11 hahantona na hoe hofantsihana. ; fa ny tranony kosa dia aoka hatao fanariam-piringa. 12Ary Andriamanitra Izay efa nampitoetra ny anarany eo amin’io toerana io anie handringana ny mpanjaka sy firenena rehetra izay handika ny didiko ka haninji-tanana handrava io tranon’Andriamanitra any Jerosalema io. Izaho Dariôsa no namoaka ny didy; aoka hotovina an-tsakany sy an-davany izany».
13Tamin’izay ry Tatenay governoran’ny faritra andrefan’ny ony Eofrata sy ry Setara-Bôzenay mbamin’ireo namany dia nankatò an-tsakany sy an-davany izany teny nalefan’i Dariôsa ho azy izany.
Fahavitan’ny tempoly sy fitokanana azy
14Dia nanohy ny taotrano ireo loholona jiosy ka nambinina, araka ny hafatra nentin’ny mpaminany Hagay sy ny mpaminany Zakarià#6.14 Jereo Hag 1.1; Zak 1.1. zanakalahin’i Hidao. Nanorina ka nahavita ny tempoly ry zareo, araka ny didin’Ilay Andriamanitr’i Israely sy araka ny baikon-dry i Kirôsa sy i Dariôsa ary i Artakserksesa, amperôran’i Persia. 15Tamin’ny andro fahatelon’ny volana Adara, nandritra ny taona fahenina nanjakan’ny amperôra Dariôsa, no nahavitan’ny tempoly#6.15 Adara volana faha-12 (izany hoe febroary-marsa) teo amin’ny taona manomboka lohataona. –taona fahenina: taona 515 tal J.K.. 16Ny Israelita nody avy any an-tsesitany, na mpisorona na levita na ny sarambabem-bahoaka, dia nitokana ny tranon’Andriamanitra tamim-pifaliana. 17Ny sorona natolotra tamin’io fitokanana io dia ombilahy zato sy ondrilahy roanjato ary zanakondry efajato; ary ny ho sorona fanalana ny ota ho an’ny vahoaka Israely manontolo dia osilahy 12, izany hoe anankiray isam-poko. 18Dia nisy fanendrena ny mpisorona sy ny levita ho amin’ny antokony avy sy araka ny andraikiny avy, mba hanao ny fanompoana an’Ilay Andriamanitra Izay ao Jerosalema, araka ny voasoratra ao anatin’ny bokin’i Mosesy.
Fankalazana ny Paska
19Ny andro faha-14 tamin’ny volana voalohan’ny taona manaraka dia nankalaza ny Paska ireo olona nody avy any an-tsesitany#6.19 Manomboka eo amin’ny 6.19, dia miverina ho hebreo indray ny rijan-teny fototra. –ny Paska: jereo Eks 12.1-20. –volana voalohany: marsa-aprily.. 20Samy efa nanao fidiovan-tena rahateo ny mpisorona sy ny levita, ka dia nadio izy rehetra; hany ka afaka namono ny zanakondrin’ny Paska ireo levita na ho an’ny sarambabem-bahoaka na ho an’ny mpisorona mpiray foko aminy na ho an’ny tenany. 21Nihinana ny sakafo Paska avokoa ny Israelita rehetra nody avy any an-tsesitany; niaraka taminy koa ny namany efa nandao ny fiainan-dratsin’ireo valovotaka sy nanompo an’Ilay TOMPO Andriamanitr’i Israely. 22Tamim-pifaliana no nanaovan’ireo Israelita ny fankalazana ny mofo tsy misy leviora nandritra ny fito andro. Fa nampifaly azy tokoa ny TOMPO noho Izy nampiova ny amperôra#6.22 Ny rijan-teny hebreo eto dia miteny ny hoe amperôran’i Asiria: anaram-boninahitra manondro ny amperôran’i Persia izany noho izy nanitatra ny fanapahany hatrany amin’ny fanjakana asirianina fahiny. hamindrafo amin’ny Israelita; izany rahateo no nampahery azy tamin’ny asa momba ny tranon’Andriamanitra, dia Ilay Andriamanitr’i Israely.
Currently Selected:
Hezrà 6: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.