Proverbios 1
1
Sc'oplal bic'tal lo'iletic sventa chanubtasel
1Bic'tal lequil chanubtaseletic yu'un Salomón#1 R 4.32; Pr 10.1; 25.1. xnich'on David, ajvalil ta Israel,
2chtun ta sventa bijubtasel,#Stg 1.5; 3.13-17. xchi'uc ta sventa xchanel c'usitic lec,
yu'un ja' chac' jna'tic lequil chanubtaseletic;
3chac' jna'tic lequil tojobtasel, tuq'uibtasel,
sventa chquich' lec jmelol jamtic.
4Chtun ta sventa chbijubic li boch'otic mu sna'ic c'usitic lec ta pasele;
xchi'uc ta sventa ta xjam lec satic li alab nich'nabetique.
5Li boch'o bij ti xa'ibe lec smelole, ta to xbijub batel;
ep to ta xchan batel c'usi lec ta pasel.
6Jech chlic ya'ibe lec smelol c'u x'elan li chanubtasel xchi'uc tojobtasele;
cha'ibe lec smelol c'usitic chalic li boch'otic bijique, xchi'uc li c'usitic vocol ta a'ibel smelole.
7Li sliqueb c'u x'elan chijbijube ja' ti chquich'tic ta muc' li Muc'ul Diose;#Job 28.28; Sal 111.10; Pr 9.10; 15.33.
li boch'otic bolique ta sbajic li bijubtasel xchi'uc chanubtasele.
Bijubtasel ta sventa alab nich'nabetic
8Jnich'on, a'yo me lec ava'ay c'u x'elan chaxchanubtasot li atote;
mu me xabaj li bijubtasel chayac'bot ame'e.
9Yu'un ja' scoronail ajol chc'ot ti lec c'upil sbae,
xchi'uc ja' anats' chc'ot.#Pr 6.20-21.
10Jnich'on, me oy tsc'an chaslo'laot li jpasmuliletique,
mu me xach'un.#Sal 1.1.
11Me oy jech chayalboxuque: “La' chi'inuncutic;
jq'ueltic c'u x'elan xu' ta jmiltic li boch'ouc no'ox chjelove;
la' cac'betic li boch'o mu'yuc smule,
12cuxul la' jtsactic jech chac c'u cha'al boch'o chbalch'uj yalel ta xabe;
scotlijil la' jmich'tic jech chac c'u cha'al boch'o ch-och ta ch'ene.
13Jech ta jtatic ep ta chop jc'ulejaltic;
xu' ta jnojes jnatic yu'un li c'usitic ta jpojtique.
14La' me, la' naban aba ta jtojolcutic ec,
jech co'ol cu'untic scotol li c'usitic ta jtatique”, me xayutique,
15mu me xbat achi'in;
mu me co'oluc xaxanov achi'uc, voc'o me aba.
16Yu'un ja' stamojbeic sbelal li c'usi chopole;
ja' no'ox oy ta yo'ntonic ti chbat milvanicuc ta orae.#Is 59.7; Ro 3.15.
17Altic tspas syoquic
ti me i'ilatic yu'un li mutetique.
18Ja' no'ox ta xuts'inta sba stuquic;
ja' no'ox ta smil sba stuquic.
19Ja' jech tstaic li boch'otic ja' no'ox tsa' c'usi tsc'an yo'ntonic ta sventa uts'intavaneje,
jech xu' chmilatic o yu'un li c'usi chich'ique.
Li bijubtasele xvulvun ch-ic'van
20Li bijubtasele te xvulvun ta xoraltic,
x'avet no'ox ta ch'ivit.
21Te chc'opoj ta yavil muc'tiquil tsobajel;
te ta xal ta sti' yochebal lum li tojobtasel yu'une.#Pr 8.1-3.
22Jech ta xal li bijubtasele:
“Vo'oxuc ti mu c'usi xana'ique, ¿me lec no'ox chava'yic ti jech oyoxuc oe?
Vo'oxuc li jlabanvanejoxuque, ¿baq'uin to chacomtsanic li labanvaneje?
Vo'oxuc ti boloxuque, ¿baq'uin to chacomtsanic sna'leel li chanubtasele?
23La' a'yo ava'yic li taq'uiel cu'une.
Ta jbusanboxuc li sbijil jol co'ntone;
ta xcac'boxuc ana'ic li c'usi oy ta co'ntone.
24Laj xa quic'oxuc pero mu xach'unic;
la jbech li jc'obe, pero muc xavich'ic ta muc'.
25Ja' no'ox laj abajic li tojobtasel cu'une;
mu'yuc stu laj ava'yic li taq'uiel cu'une.
26Li vu'une xitse'in no'ox ec ti c'alal chata avocolique;
ta jlabanoxuc ec ti c'alal oy xi'el chava'yique.
27C'alal ta xa xasmiloxuc o chava'yic li xi'ele,
xchi'uc c'alal toj tsots chtal avocolic jech chac c'u cha'al sutub iq'ue,
xchi'uc c'alal toj tsots at-o'nton, toj abul xa aba chava'yique,
28ja'o te chlic c'opojanic ta jtojol, pero mu'yuc ta jtac'boxuc;
chasa'icun pero mu xataicun,
29yu'un laj abajic li chanubtasele;
muc xac'an xavich'ic ta muc' li Muc'ul Diose.
30Muc xach'unic li jmantale;
muc xavich'ic ta muc' noxtoc li taq'uiel cu'une.
31Te chalo'be sat atuquic li c'usi chats'unique;
te chlic yac'boxuc avocolic li c'usi chopol chanopique.
32Yu'un li stoyobbail boch'otic mu'yuc bijique te chmilatic o yu'un;
li c'usi lec tsta scuyojic li boch'o bolique te chlaj o xchi'uquic.
33Yan li boch'o tspas c'usi chcale, jun no'ox yo'nton;
mu xlo'ilaj yo'nton, mu xi' me oy c'usi xi'bal sba chtal ta stojole”, xi li bijubtasele.
Currently Selected:
Proverbios 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.