Job 34
34
Li Eliue laj yal ti ja' tuc' yo'nton stuc li Diose
1Jech laj yal noxtoc li Eliue:
2—Vo'oxuc ti bijoxuque, a'yo ava'yic c'usi ta xcal;
vo'oxuc ti lec chanubtasbiloxuque, tuc'ulanbicun ava'yic li ca'yeje.
3Yu'un li jchiquintique xa'ay me lec li c'usi chcaltique,
jech chac c'u cha'al lec xa'ay me mu ve'lil li jpac'otique.#Job 12.11.
4Ja' jech li vu'utique ac'o jt'ujtic ec ti bu tuq'ue;
ac'o cotquintic ti bu leque.
5Yu'un li Jobe jech laj yal: ‘Li vu'une tuc' co'nton;
ja' no'ox Dios muc xac' vinajuc ti mu'yuc jmule.
6Me chcal ti oy jmule chi'epalc'opoj;
ac'o me mu'yuc c'usi chopol jpasoj, pero mu xcol o li jbec'tale’, xi.#Job 27.1-5.
7Mu'yuc boch'o yan jech chac c'u cha'al li Job
ti mu tsotsuc ta labanel cha'ay Dios
jech chac c'u cha'al vo' ti mu vocoluc ta uch'ele.
8Jech noxtoc toj lec cha'ay chchi'in li boch'otic chopol c'usi tspasique;
co'ol chanov xchi'uc li boch'otic chopolique,
9xchi'uc chal ti mu'yuc c'usi tsta
li boch'o tsa' c'u x'elan lec ch-ilat yu'un Diose.
10“Vo'oxuc ti oy abijilique, a'yic lec li c'usi ta xcale.
Li Diose mu snop c'usi chopol;
li Boch'o ech'em svu'ele mu spas c'usi mu'yuc lec.
11Yu'un ja' chac'be stojol jujun cristiano ti c'u x'elan la spasique;
ja' jech chac'be ti c'u x'elan lec xtojolin yabtelique.#Sal 62.11-12; Pr 24.12; Jer 17.10; Ez 18.30; 33.20; Mt 16.27; Ro 2.6.
12Ta melel li Diose mu sna' spas c'usi chopol;
li Boch'o ech'em svu'ele mu spas c'usi mu'yuc tuc'.
13Mu'yuc boch'o i'ac'bunuc yabtel ti ja' sventainoj li banamile,
ti ja' la xchapan lec scotole.
14Me tsc'an tsmacbe yo'nton,
me tsc'an tstu'pbe yic' li cristianoetique,
15ta ora chchamic scotolic;
chc'atajic ta pucuc yan velta.#Sal 104.29.
16“Me bijote, a'yo lec;
tuc'ulano lec li c'usi chcale.
17¿Li boch'o chopol chil c'usi tuq'ue me xu' tsventain scotol?
¿C'u yu'un ti chatic'be smul li boch'o bats'i tuc' yo'ntone?
18Me chil ti chopol li ajvaliletique,
me mu'yuc lec yabtelic li banquilaletique,
chalbe ta sat: ‘Toj chopoloxuc, mu'yuc atuic’, xut.
19Li stuque mu'yuc tst'uj boch'o chc'uxubin, ma'uc tscolta li banquilaletique,
ma'uc ech'em chich' ta muc' li jc'ulejetique, ma'uc tsjip li me'onetique;
co'ol tspasbe, yu'un ja' spasoj scotol.
20Li cristianoetique ta jliquel no'ox xu' chchamic;
ta o'lol ac'ubal no'ox xu' chch'ayic batel;
li boch'otic tsots svu'elique muc ta stsatsaluc cristiano chchamic.
21Yu'un li Diose yiloj scotol c'usi tspas li cristianoetique;
sq'ueloj scotol li jujujet yacan chanovique.
22Mu'yuc bu ta tael bats'i ic' osil ti mu xa xvinaj,
ti xu' te tsnac' sbaic li boch'otic chopol c'usi tspasique.
23Li Diose mu persauc chal c'usi ora chic' ta stojol cristiano
sventa tsq'uelbe c'u x'elan li yabtelique.
24Xu' tsbic'tajes li boch'o muc' yabtelique;
mu persauc tsjac' ba'yuc c'u x'elan yabtelic,
jech chlic stic'be yan xq'uexol.
25Yu'un xotquin scotol li c'usitic tspasique;
me tsc'an tsoques ta junuc ac'ubale,
j'ech'el mu'yuc stu chcomic o.
26Ta satilal lec chac'be stoj smul
ta scoj li xchopolilique,
27yu'un la sva'lupatinic comel li Diose;
muc ja'uc la spasic li c'usi yaloje.
28Laj yac'beic ya'ay Dios yoq'uel yavanelic li me'onetique,
xchi'uc li boch'otic abul sbaique, li Diose laj ya'ay.
29Pero me mu'yuc c'usi chal li Diose, ¿boch'o xu' tstic'be smul?
Me tsnac' sat li Diose, ¿boch'o xu' tsq'uel?
yu'un ja' stuc sq'ueloj jujun lum xchi'uc jujun cristiano.
30Ja' chal ti mu xu' ch-och ta pasmantal li chopol vinique,
yu'un jech mu soques o li slumale.
31“Ta jna' ti tsc'an jech chavalbe li Diose:
‘Laj xa quich'be stojol li jmule; mu'yuc xa ta jpas yan velta.
32Ac'bun quil li c'usi mu xquile.
Me oy la jpas c'usi chopole, mu'yuc xa ta jpas yan velta’, tsc'an xachi ta stojol.
33¿Me yu'un chac'an ja' chaspasbot li c'usi lec chava'ay atuque?
yu'un li vo'ote laj abajbe li c'usi la spasbote.
Vo'ot tsc'an chat'uj, muc vu'cun chacalbot;
alo ca'itic c'usi chac'an.
34“Li boch'otic bijic ti cha'ibeic smelol c'usi ta xcale,
xchi'uc li boch'o oy c'usi lec sna'ique, jech chlic yalbicun:
35‘Li Jobe mu'yuc stu li c'usi chale;
mu'yuc smelol o li sc'ope.
36Tsc'an chich' a'yel lec c'u x'elan chlo'ilaj li Jobe,
yu'un ti c'u x'elan chtac'ove ja' jech chac c'u cha'al chtac'ov jun chopol vinic.
37Ma'uc xa no'ox oy smul; ja' jtoyba noxtoc,
yu'un xt'ax no'ox sc'ob ta jtojoltic,
xchi'uc toj ep xa ijelov ye ta stojol li Diose’, xi chlic yalbicun —xi li Eliue.
Currently Selected:
Job 34: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.