1 Samuel 6
6
Li filistaetique la staquic sutel li xcaxail smantal Diose
1Li xcaxail smantal Muc'ul Diose vucub u te oy ta yosilal li filistaetique. 2Li filistaetique la staquic ta iq'uel li paleetic xchi'uc jt'unuletic yu'unique, jech la sjac'beic:
—¿C'usi ta jpascutic ta sventa li xcaxail smantal Muc'ul Diose? Albuncutic c'u x'elan xu' ta jtaccutic sutel —xutic.
3Itac'ovic:
—Me chasutesic batel li xcaxail smantal Dios yu'un israeletique, mu me xocoluc xataquic batel. Aq'uic batel matanal sventa stojol amulic, jech chacolic, xchi'uc jech chlic ana'ic c'u yu'un ti mu x'ech' li avocolique —xiic.
4Itac'ov li filistaetique:
—¿C'usi tsc'an chcac'cutic ta sventa li stojol jmulcutique? —xiic.
Itac'ovic:
—Aq'uic vo'bej c'anal taq'uin jech smuc'tiquil jech chac c'u cha'al apun, xchi'uc vo'cot ch'o pasbil ta c'anal taq'uin. Ja' jech yepal tsc'an jech chac c'u cha'al yepal li banquilaletic avu'unique. Yu'un co'ol li vocol chavich' acotolic c'alal ta banquilaletic avu'unique. 5Pasbeic sloc'obal li apunetic xchi'uc li ch'oetic ti la soquesic cosilaltique, xchi'uc albeic slequilal li Dios yu'un israeletique. Oy yic'al ja' to jech chacolic o ta stojel amulic, xchi'uc li dios avu'unique, xchi'uc li avosilalique. 6¿C'u yu'un chapas ta tsots avo'ntonic jech chac c'u cha'al li egiptoetic xchi'uc li faraón ti ja' to la scoltaic batel li israeletic c'alal tsots ipasbatic yu'un li Dios yu'un israeletique? 7Ja' lec aq'uic ta pasel junuc ach' careta. Tsaquic cha'cotuc me' vacax ti oy yolique, ti mu'yuc to bu abtejeme; ja' xachucbeic batel li caretae. Pero li yolique mu me xacoltaic batel; comtsanic ta sna. 8Li xcaxail smantal Muc'ul Diose ja' te xatiq'uic batel ta yut li caretae. Li c'usitic loc'tabil ta c'anal taq'uin sventa stojol amulique, tiq'uic ta junuc caxa; te xavaq'uic batel ta sts'el li xcaxail smantal Diose. Ja'o xacoltaic batel li vacaxe; ja' jech ac'o batuc li caretae. 9Q'uelic lec bu chbat. Me te chbat ta Bet-semes ta yosilal stuque, ja' svinajeb ti ja' Dios laj yac' taluc li vocol li'i. Yan me muc tuc'uc chbate, ja' svinajeb ti ma'uc Dios laj yac' taluc li vocole, yu'un no'ox jech ital stuc li vocole —xiic.
10Li viniquetique la spasic jech. La stsaquic li cha'cot me' vacax ti oy yolique; la smacbeic lec comel li yole, jech lic xchucbeic batel li caretae. 11Te la scajanic batel ta careta li xcaxail smantal Muc'ul Diose, xchi'uc te tiq'uil batel ta cajón li sloc'obal ch'oetic ta c'anal taq'uine xchi'uc li sloc'obal apunetique. 12Li me' vacaxetique ibatic ta sbelal Bet-semes. Tuc' ibatic ta tuq'uil be; te xme'etic batel ta xanubal, me jutuc mu'yuc bu x'ochic ta bats'ic'ob, o me ta ts'etc'ob. Li banquilaletic yu'un filistaetique te nabalic batel ta spat c'alal to ta sts'aquic xchi'uc Bet-semes. 13Li Bet-semesetique te chtuch' strigoic ta stenlejaltic. C'alal la stoy satique, ja' to laj yilic ti ja' li caxae. Toj xcuxet no'ox yo'ntonic. 14Li caretae te ic'ot ta yosil Josué ta Bet-semes; te ipaj yo' bu oy jbej muc'ta ton. Li boch'otic te nacajtic ta Bet-semese la slilinic ta si' li caretae; la xchic'beic smotonin Muc'ul Dios li me' vacaxetique. 15Yu'un li levietique la syalesic li caxae xchi'uc li scajonal c'usitic pasbilic ta c'anal taq'uine; te laj yaq'uic ta sts'el li muc'ta tone. Jech te lic xchic'beic smoton Muc'ul Dios li jnaclumetic ta Bet-semese, xchi'uc lic smilic yantic matanaletic. 16C'alal laj yilic banquilaletic yu'un filistaetic ti te tuc' ic'ot li caxae, isutic batel ta Ecrón ta jun no'ox sc'ac'alil.
17Li vo'ob sloc'obal apunetic pasbil ta c'anal taq'uin sventa stojol smulic filistaetique, ja' ta sventa li vo'ob lum li'i: Asdod, Gaza, Ascalón, Gat, xchi'uc Ecrón. 18Yan li ch'oetic pasbil ta c'anal taq'uine ja' jech yepal jech chac c'u cha'al yepal lumetic yu'un li filistaetic ti sventainojic li vo'ob banquilaletique, xchi'uc c'alal ta lumetic ti lec setbilic ta tsatsal coraltone xchi'uc li bic'tal tsobtsobnaetic ti mu'yuc macbilique. Li muc'ta ton ti bu laj yaq'uic li xcaxail smantal Muc'ul Diose te to oy o tana ta yosil li Josuee.
19Li Diose laj yac' chamicuc lajuneb xchanvinic (70) li viniquetic te ta Bet-semese, yu'un la sq'uelbeic yut li xcaxail smantal Muc'ul Diose. Li yajvaltac lume i'oq'uic ta scoj li tsatsal vocol i'ac'batic yu'un Muc'ul Diose. 20Li jnaclumetic ta Bet-semese jech laj yalic: “¿Boch'o xu' yu'un chva'i ta sat li Ch'ul Muc'ul Diose? ¿Bu chbat noxtoc c'alal me ilaj yo'nton li' ta jtojoltic li vu'utique?”, xiic. 21La staquic batel mantal ta stojol li jnaclumetic ta Quiriat-jearime, jech laj yalbeic batel: “Li filistaetique laj xa sutesic tal li xcaxail smantal Muc'ul Diose, ja' yu'un la' me ich'ic”, xutic.
Currently Selected:
1 Samuel 6: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.