Lukas 12
12
Pepaingai hi tau-tauna to nabelo wongko
(Mat. 10:26-27)
1Tempo ncobuna tauna nahiromu hampena nonetugi-tugi i humpii Yesus, nopamulami Yesus nopatudu, koropokona hi hira ana guru-Na, iuli-Na, “Maingahawo hi ragi to Farisi, batuana kabelo wongkora to Farisi. 2Moma naria to laitabuhini to moma rahungke pade moma naria to laipopalerui to moma makewa. 3Habana humawee to miuli i rara kalimauana kana raepe i rara kabaana, pade napa to mipometewaii i rara kamara kana rakarebai lako wumu hou.”
Maeka hi Alatala
(Mat. 10:28-31)
4“Ku'ulika mui komi, dohe-dohe-Ku, nemo komi maeka hi hira to mamala mampatehi wotomi naupawee momaramo mamala mobabei napa-napa. 5Ku'ulika komi hadua aga to kana mipokaeka. Kaekamo komi hi Alatala to moma wuwu nabaraka mepatehi, naupawee nabaraka mui-'I motadi tauna rara naraka. Ku'ulika mpuu komi, kaekamo komi hi Hia.
6Alima maa tonci rone laipobalu rompeka doi see aga. Naupawee moma naria hamaa to laikalingani Alatala. 7Butu ngkau wuluami napumi laibila Alatala. Etumo, nemo maeka apa nelabipi pampotowe-Na komi Alatala lako nadea maa tonci rone.”
Mampangaku Yesus i tingoo humawee tauna
(Mat. 10:32-33; 12:32; 10:19-20)
8“Ku'ulika mui komi, hema-hema to mampangaku-'A i tingoo manuhia ane hia to pantuku-Ku, Ana Manuhia mui mei mampangaku'i i tingoora malaeka Alatala. 9Naupawee hema-hema to mampehapuka-'A i tingoo manuhia, hia mui mei Kupehapuka i tingoora malaeka Alatala. 10Hema-hema to manguli hangu hangaa mampopore Ana Manuhia, mamaladipi ra'ampuni. Naupawee hema-hema to mampopore Inoha to Nagaha moma'i ra'ampuni.
11Ane rakeni komi i tingoora to pangkeni hou pepuea ba i tingoora to poparenta, nemo mamere rarami nangkambelai bewa pade napa to kana miuli mampotolawai wotomi. 12Habana tempo ee mei, Inoha to Nagaha mampatudukii komi napa to kana miuli.”
Porapa nangkambelai to hugi to nadoyo
13Hadua lako tauna to nahiromu ee nanguli hi Yesus, “Guru, ulika'ikuwo ompiku bona nawaika'a bagiaku lako gagu totua kami.”
14Naupawee Yesus nanguli, “Ompi, moma hema to no'ongko-'A mawali totua ada to pobagi gagu ba to momanoroi komi.” 15Lauparia iulika-Na muira tauna to nahiromu ee, “Maingahawo hante ingku to maliu ganta, habana naupa meliu mpuu kadea gagu hadua tauna, moma kahugiana ee to mampakatuwu'i.”
16Napu ee laituturaka-Nara hangaa porapa, iwei, “Naria hadua to nahugi to nadea mpuu wua tinudana i rara bonena. 17Nepekunemi i rara bongona, iulina, ‘Napa to kana kubabei? Apa momami naliu gampiriku kupobolii wua tinudaku.’ 18Kahuduana iulina, ‘Iwei to kubabei! Kugerohi pura olu gampiriku pade kubabeiki to nelabipi kabohena bona mamala'i kupobolii humawee gandoku pade gaguku. 19Napu ee ku'ulikami wotoku moto iwei: Nadeami anu laibolimu to nabelo. Naganami rakoni bahangkua mpae. Pondodomo, pangkonimo, panginumo pade kagoe-goemo.’ 20Naupawee, Alatala nangulika tauna ee, ‘Iko tauna to nadoyo, ngkawengia ei mui Kualami inohamu. Aji, rawaika hema humawee wua tinuda to laibolimu etu?’
21Iweemile to madupa hi butu tauna to nampehimukui nopalimpuru gagu mampakasana wotona moto pade moma'i nahugi i tingoo Alatala.”
Nangkambelai kamere rara
(Mat. 6:25-34, 19-21)
22Yesus nangulikara to pantuku-Na, “Etumo Ku'ulika komi, nemo mamere rarami mampekiri katuwumi, nangkambelai napa mei to mikoni. Pade nemo mamere rarami mampekiri nangkambelai napa mei to mipowarui wotomi. 23Apa nobunupi tuwu ee lako pangkoni, pade nobunupi woto lako powaru. 24Hilora tonci kaloaa, momara nohawu pade momara nepae. Moma naria paningkura ba marira, naupawee Alatala nampawaikara pangkoni. Neparauli komi, neliupi pobunumi i tingoo Alatala lako tonci-tonci lauria. 25Hema komi to hante kamere rarana namala notambai kalanga umuruna naupa haeo aga? 26Aji, ane to nakodi ewa ee moma namala laibabeimi, napa pade namere rarami nangkambelai pangkoni bo powaru? 27Hilo motoramo bunga to natuwu i bone. Momara nobago ntomo pade momara nobalowo. Naupawee Ku'ulika komi, Magau Salomo, naupa nahugi'i moma'i nowaru ewa karamba bunga-bunga ee mai. 28Ane iwee Alatala nampakaramba bunga-bunga i bone to welau ei natuwu pade naile ratene i rara apu, neparauli komi, natantu ami kana Nawaika komi waru to miparaluu. Nakura gagakona peparahayami!
29Aji, nemo maingu rarami mampekiri napa mei to mikoni pade napa mei to mi'inu. Pade nemo mamere rarami nangkambelai humawee lauria. 30Humaweena ee laipalira tauna i dunia ei to moma nangincani Alatala. Bo kakonona, Tuamami to i huruga nangincani ane komi namparaluu humaweena lauria. 31Aji to koropokona, pehimukuimi bona Alatala moparenta rara katuwumi. Ane iweedimi mibabei, humawee kaparaluami ntanina Nawaika moto komi.
32Komi ana guru-Ku naupa moma komi nadea, nemo komi maeka. Habana Tuamami i huruga hante goe rara-Na nampahua komi i rara Poparentaa-Na. 33Pobalumi gagumi, doina tiraka hi tauna to nakahiahi. Babeimi karepe to moma mei mauha, etumi gagu to moma maria kaopuana i huruga, i rima to pangio moma mamala mampangio'i, pade bubu moma mamala mampakamaru'i. 34Poingkukami humawee lauria habana i rima gagumi naria, i hee mui rarami.”
Kana mahadia moto oa duu karata nculi Yesus
(Mat. 24:43-51)
35Laipadola-Na mui Yesus nanguli iwei, “Kana matepou dola moto pekomi, pade kana mabaa moto oa poindomi. 36Pade komi kana ewa batua-batua to nampopea maradikara manculi lako ponikaa. Bona ane marata'i pade mokado womo dungku rabeakara'i. 37Norahi mpuura batua-batua ee mai, ane manculipi maradikara naratara bulara nainga. Mpuu-mpuu Ku'ulika komi, maradikara ee mei mahadia pade mampoponcunara bo mampojujukara konia. 38Wee mui, ane marata'i i ntongo bengi ba lau parabaa pade naratara bulara nainga, morahi mpuura.
39Naupawee Ku'ulika komi, ane tumpu hou mangincani tinti hangkua to pangio marata, natantu amimi tumpu hou ee mainga, pade moma napalele to pangio mehua rara houna. 40Wee moto mui komi. Kana mahadia moto oa komi butu eona, apa tempo karata nculi Ana Manuhia moma mincani.”
41Lauparia Petrus nepekune, “Pue, ba kamidi to iuli-Mu rara porapa ei, ba humawee taunadi?”
42Nehono Pue Yesus, “Rapana maria hadua batua to namala raparahaya pade nanoto rarana. Batua eemi to naongko maradikana mampanauhi batua ntanina bona mampatirakara pangkoni butu eona. 43Morahi mpuu'i batua to laiongko ee mai ane maratapi maradikana nampahilo'i nobabei ewa ee. 44Mpuu-mpuu Ku'ulika komi, maradikana ee mei mampaongko'i mawali to pouruhi humawee gaguna. 45Naupawee ane batua ee mai madaa ingkuna, nauli mei rara bongona, ‘Mahaedipi maradikaku marata.’ Lako hee mopamulami mampaduahira batua ntanina, balailo bo bangkele, pade mangkoni bo manginu duuna malangu. 46Naupawee bulana magoe-goe dohera, ngkali maratami maradikana i eo bo tempo to moma incanina. Maradika ee mei mopatehi batuana ee pade mampatadi'i rau hawalikuna hingkani-ngkani hante tauna to moma natigu.
47Batua to nangincani dota maradikana, naupawee moma'i nainga pade moma'i nampoingkuka dota maradikana, kana rakadungkui madea mela. 48Naupawee batua to moma nangincani dota maradikana pade nampoingkuka to nahala to mahipato rakadungkuika'i, moma'i rakadungkui madea mela. Wee moto mui hema to laiwaika nadea, kana raperapi madea lako hi hia, pade hema to laiparahayaka Alatala nadea, madea muipi to Naperapi Alatala lako hi hia.”
Yesus nangkeni pohihala
(Mat. 10:34-36)
49“Aku narata motene apu i dunia, pade harumaka-Ku mpuu apu ee mabaami. 50Naupawee Aku kana mangkolo kahehaa. Nokalihe mpuu rara-Ku kapomana kahehaa ee mai maliu. 51Nemo mipekiri ane Aku narata nangkeni kanonea i dunia. Ku'ulika komi, Aku nangkeni pohihala. 52Apa mopamula lako welau ei, kana maria pohihala. Rapana alima dua tauna hancou hore mome'ewa. Tolu dua mampaewa rodua pade to rodua mampaewa to tolu dua. 53Hira kana mome'ewa, to tuama mampaewa anana balailo pade ngana balailo mampaewa tuamana, to tina mampaewa anana bangkele pade ngana bangkele mampaewa tinana. Paniana to bangkele mampaewa maniana bangkele pade mania to bangkele mampaewa panianana bangkele.”
Mampetandai tari dunia
54Iulika-Na muira Yesus tauna to nadea ee, “Hangka laihilomi gawu nengkahe mali kaholoa, iulimi, ‘Marata mei uda,’ pade nadupa mpuumi ewa to iulimi. 55Wee moto mui ane mihilo ngolu mantawiri lako selatan, iulimi, ‘Makara eona,’ pade nadupa mpuumi ewa to iulimi. 56Komi to nabelo wongko, laipahami nangkahilo tari dunia pade langi, naupawee napa pade moma ipahami napa to nadupa i dunia tempo ei?#12:56 Yesus nanguli ane hira ee mai tauna to nabelo wongko apa hira nampopahiloi ane laipopeara karata Magau to Pepakahalama to laitipa Alatala, naupawee hangka naratapi Yesus hante humawee tanda to laibabei-Na, moma-'I laitarimara.
57Napa pade moma laibotuhimu moto napa to nakono? 58Ane rauko hante balimu hi to pobotuhi, pehimukuimi bona mohingkabelomo komi i lentongo dala. Ane moma, nakeniko mei rau hi to pobotuhi pade to pobotuhi ee mampopewaiko hi to nampodoo tarungku to mopahuako i rara tarungku. 59Ku'ulikako, moma amiko mehuwu lako ria kapomana mubayari mpapu indamu.”
Currently Selected:
Lukas 12: MYL
Highlight
Share
Copy
Want to have your highlights saved across all your devices? Sign up or sign in