Lukas 10
10
Yesus nampahuro pitu mpulu dua to pantuku-Na
1Poma nahae lako humawee lauria, Pue Yesus nampelihi pitu mpulu dua to pantuku-Na to ntanina pade nampahurora rodua-rodua rau moilodo i butu ngata to Nakaratai. 2Iulika-Nara, “Hompoia nadea, naupawee hodi moto to pobago. Etumo, perapimi hi Tumpu hompoia, bona Nahuro to pobago mobago i bone-Na. 3Epe, koimo komi! Aku nantudu komi rau ewa ana bimba i lentongo serigala. 4Nemo mangkeni pobolia doi, boku ba hapatu ropasa. Ane metabe komi hante tauna to mipotomu i dala, nemo madea jaritami. 5Ane mehua komi i hangu hou, uli olu petabemi, ‘Katuwu to nanone i hou ei.’ 6Ane i rara hou ee maria tauna to nampokono katuwu to nanone, petabe to iulimi ee maboli hi hia. Bo ane moma, to iulimi ee manculi hi komi moto. 7Po'ohamo komi i hou tauna to nadota nantarima komi. Koni pade inumi napa to rawaikara komi. Habana, to pobago mahipato mantarima tomona. Nemo komi moencu lako hou ee.
8Ane mehua komi i hangu ngata, pade ratarimara komi, konimi napa to rapariaka komi. 9Pakauriramo tauna to nadua i hee pade kewokara ane nopamulami Alatala noparenta halaku Magau i lentongora. 10Naupawee ane mehua komi i hangu ngata pade moma komi ratarimara, koimo komi i dala-dala rara ngata ee pade ulimi iwei, 11‘Awu lako ngatami to nerika i paa kami kana kitontahi i tingoomi, halaku pepalingai ane Nahuku komi mei Alatala. Naupawee, bona mincani, namohumi tempona Alatala moparenta halaku Magau.’ ” 12#Kej. 19:24-28Laipadola-Na mui Yesus, “Ku'ulika komi, ane temponapi Alatala mampabotuhi manuhia, mangaapi huku to rakolora to Sodom lako tauna i rara ngata ee mai.”
Yesus nangkamaro tauna i bahangkua ngata to Yahudi
(Mat. 11:20-24)
13“Mahilakamo komi to Khorazim! Mahilakamo komi to Betsaida! Apa ane ke i ngata Tirus pade Sidon laibabei hangu hangaa to nepakahera ewa to laibabei hi komi, naupa momara to Yahudi, bela nahaeramo nampake waru to laipake tempo kamatea halaku tanda ane nancororamo lako dohara. 14Aji, tempo eo pobotuhia mei, mangaapi pehuku to ratarimara to Tirus pade to Sidon lako pehuku to mitarima. 15Pade komi to Kapernaum! Iulimi komi, raongko rau i huruga komi mei? Moma! Kana rapopanau rau i Po'ohaara to Mate komi.”
16Napu ee iuli-Na Yesus hi to pitu mpulu dua to nantuku-'I, “Ba hema-hema to mangepe komi, nangepe Aku mui'i, pade hema-hema to moma mantarima komi, hia mui moma nantarima-'A. Pade ane hema-hema to moma mantarima-'A, hia mui moma nantarima Hia to nampahuro-'A.”
Panculira pitu mpulu dua to pantuku Yesus
17Bahangkua kahaena lako ee, to pitu mpulu dua to pantuku Yesus nanculi hante nagoe mpuu pade nanguli, “Pue, nau anudaa nanturuhi kami ane kiparentara nampake hanga-Mu.”
18Iulika-Nara Yesus, “Laihilo-Ku Magau Heta nanawu lako langi ewa kila. 19Epe, laiwaika-Kumo komi baraka bona mamala komi mantodu ule pade ntole, pade baraka mampadagi humawee baraka balimi Magau Heta hampena moma maria napa-napa to mampakahilaka komi. 20Naupawee nemo komi magoe habana anudaa nanturuhi komi. Kagoemo komi habana hangami laitulihimi i huruga.”
Peune Yesus pade baha kagoea
(Mat. 11:25-27; 13:16-17)
21Tempo ee mui, Inoha to Nagaha nampakagoe Yesus, lauparia iuli-Na, “Nosukuru-'A hi Iko, Tuama-Ku, Pue langi bo dunia, habana humaweena lauria laipopalerui-Mu hi tauna to nataualu bo to naria hikolara, naupawee laikewoka-Mu hi hira to moma naria hikolara. Oo Tuama, ewa eemi to ipokagoe-Mu.”
22Lauparia iuli-Na Yesus hi to pantuku-Na, “Hangu hangaa laiwaika-Na Aku purami Tuama-Ku. Moma hema haduaa to nangincani hema Ana Alatala, wuwu Alatala Tuama aga to nangincani. Pade moma hema haduaa nangincani Tuama, wuwu Ana Alatala aga to nangincani, pade hema-hema to Napodota Nakewoka nangkambelai hema Tuama.”
23Lauparia, Yesus neili hi to pantuku-Na pade nanguli muntu hi hira, “Norahi mpuu matami nampanaa to ihilomi. 24Ku'ulika komi, nadea nabi pade magau mingki mampahilo to laihilomi, naupawee momahawo laihilora. Mingkira mangepe napa to iepemi, naupawee momahawo laiepera.”
Porapa nangkambelai to Samaria to natowe hi hingka manuhia
25Hangkani tempo, hadua to nataualu buku Taurat nokangkore nampehori Yesus pade nanguli, “Guru, napa to kana kubabei bona mamala'a mamparata katuwua to moma maria kahuduana?”
26Yesus nangulika'i, “Napa to laitulihi rara patudu Taurat? Napa to ibahamu i ria?”
27 #
Im. 19:18; Ul. 6:5 Nehono tauna ee, “Potowemi Pue Alatalamu hante humawee noto raramu, hante humawee inohamu, hante humawee rohomu pade hante humawee pampekirimu, pade potowe hingka manuhia ewa pampotowemu wotomu moto.”
28Iuli-Na Yesus, “Nakono to iulimu! Poingkukami ewa ee bona murata katuwua to moma maria kahuduana.”
29Naupawee to nataualu buku Taurat ee mingki mampemakono wotona moto, iulina, “Hema'i hingka manuhiaku ee?”
30Yesus nampahonoi'i hante hangu porapa, iwei, “Naria hadua tauna nomako lako ngata Yerusalem nanau rau ngata Yerikho. I lentongo dala tauna ee lailawa to perampaki. Lairampakira humawee to ikenina. Laikadungkuira'i duuna ke nono mamate pade laipalahirami i ria. 31Tempo ee mui, naria hadua imam noliu i dala ee. Hangka laihilona tauna ee, pelelikana'i pade nomako dolami. 32Wee moto mui hadua to Lewi to nobago i Hou Alatala narata i hee. Hangka laihilona tauna ee, pelelikana'i pade nomako dolami.
33Naliu ee naria hadua to Samaria noliu mui i dala ee. Hangka laihilona tauna ee, nehuwumi ahi rarana. 34Laimohukinami tauna ee, laigeheina hante lana pade ue anggur, pade laiwewenami bakana. Napu ee laiongkonami tauna ee rau i lolo keledai to ihawina, laikenina'i rau hou pehania pade laipodoona i ria. 35Kanailena, hangka meongkopi mopadola pomakoana, to Samaria ee nampawaika tumpu hou pehania ee rompeka doi halaka#10:35 Hampeka doi halaka nahibali hante tomo tauna nobago haeo. pade iulina, ‘Merapi tulungi, uruhi belo'i. Ane melabi balancamu lako ei, kupahawa panculiakudimi.’ ”
36Napu ee, nepekunemi Yesus hi to nataualu buku Taurat ee, “Bewa popantaruimu, hemara lako to tolu dua ee hingka manuhia tauna to lairampaki ee?”
37Nehono to nataualu buku Taurat ee, “Tauna to na'ahi rarana nampatulungi'i.”
Yesus nangulika'i, “Koimoko pade poingkukami ewa lauria.”
Maria pade Marta
38Napu ee Yesus pade to pantuku-Na nopadola pomakoara pade nehanira i hangu ngata. I ngata ee naria hadua bangkele to ikahangai Marta nantarima-'I i houna. 39Marta ee mai naria ompina to ikahangai Maria. Maria ee mai noncuna i humpii paa Pue Yesus, nangepe patudu-Na. 40Naupawee Marta nahehe mpuu rarana nopahadia pangkoni. Lauparia narata'imi hi Yesus, iulina, “Pue, palele-Mu moto'ada nobago haduduaku, moma'akuwo laitulungina ompiku. Tudu'ikuwo mantulungi'a.”
41Iuli-Na Pue, “Marta, Marta, namere gaga raramu pade nadea ngaa gaga to ipohehamu. 42Naupawee hangaa aga to iparaluu. Maria ei mai nampelihi to nelabi kabelona to moma hema mampa'alai'i.”
Currently Selected:
Lukas 10: MYL
Highlight
Share
Copy
Want to have your highlights saved across all your devices? Sign up or sign in