Matiye 6
6
Əyak aka wən nabbah sit məssehẽŋɗe
1 #
MAT 23:5
Məsla zukum, kədaɗɗanən təstəs nokum ama heret ɗiy ammba dulukuməngən ɓa. An vaski ɓa na, gegesiŋ tay məs kədawrəhaŋ səva Afukum na disiŋ ɓa.
2An mok aka ulasahã kan na, kədaɗɗan vi kawgəm maɗɗulet ɗiy akok va net muluvuluvuɗe adaɗɗaŋ addəvit gəlaɗe nakkal net mə Yudeɗi gəm aket tiveɗ vi ɗiy dəgagdaketingin ɓa. Gesiŋ nədawnah sukum: Arəhənək əfaɗ net səkay. 3Ya nok an mok aka ulasahã, vok zlaɓay adawsən an dəzəŋ adaɗɗa ɓa. 4Vi ulasahã nok dəsangən məɗamma, Afuk məzula an məɗamma wafaɗ suko.
Əyak aka wən na əkkama
(LUK 11:2-4)
5An munokum tat əkkama, kədassoŋ va net muluvuluvuɗe ɓa, vi aŋglaŋgək iziw addəvit gəlaɗe nakkal net mə Yudeɗi gəm aka zlazlaŋgbra tiveɗ əkkam vi ɗiy duleningəni. Gesiŋ nədawnah sukum: Arəhənək əfaɗ net səzeti. 6Ya noko, an kəŋgələk əkkama, atoŋ addəv gəla noko, ampan maddamba noko, akkaman Afuk an na təki nawlay ɓa, Afuk an məzula an məɗamma wafaɗ suko.
7An kakkamaŋ na, kədamsakaŋ aka əpel taka təl diyɗa va net ɗiy-ɗar adaɗɗaŋ ɓa. Gegesiŋ azet na vi əpel net diyɗaŋ na kaprəm siti. 8Kədaɗɗaŋ va net ɓa, vi gegesiŋ Afukum asənək an wəraykum azan dafsən əkkam nokum. 9Vaŋki kan kədakkamaŋgə:
Afəm an na disiŋ,
iya nok dəsan salala.
10Məlĩ nok dəde.
Əŋgla nok dəsan aka dəlvafuŋ va asan a disiŋ.
11Pay pak apsəm way an nawtərsəm wəraya.
12Avviyon səm heslepe namə,
vi nam pak mənam tat əvvuyon sit ɗiy en dəɗɗaŋ səmən heslepe.
13Akõhgəm səddəv əraka.
Ya agilgəm səddəv mbərayən.
Vi məlĩ noki də gbogboŋgo də gagdaka, hã faɗə. Amen.
14Gesiŋ an munokum tat əvvuyon sitin heslepe net ɗiyi, Afukum na disiŋ wavvuyon sukum tamə. 15Ya an kavvuyon sitin ɗiy ɓa, Afukum avvuyon sukum na heslepe nokum ɓa.
Əyak aka wən na əɗɗa meme
16An munokum tat əɗɗa meme na, kədassoŋ so'or so'or va net muluvuluvuɗe ɓa, gesiŋ tay ərosnən ki hereti, vi karban sit ɗiy na tay əɗɗaŋ meme. Gesiŋ nədawnah sukum: Net arəhənək iya neti. 17Ya nok an istat əɗɗa meme na, appay mẽl sən kiko, aɗa horoko, 18vi kədarba ama heret ɗiy na istat əɗɗa meme ɓa, abbər ama hara Afuk an nawlay ɓa. Afuk məzula an məɗamən wafaɗ suko.
Aryeɗ a disiŋ
(LUK 12:33-34)
19 #
YAK 5:2,3 Kəldazaɓanən arya nokum aka dələv ɓa, a təki məsuksləma də əzələh adawraygən ɓa, a təki mehelɗe adaflikeŋ kawhalən ɓa. 20Ya məzaɓan arya nokum a disiŋ dərəŋgə, a təki məsuksləma mãy əzələh araygənən ɓa, a təki mehelɗe afliknən na kawhalən ɓa. 21Vi a təki arya nok asani adak mokrok adawsani.
Əkeɗeɗe na gəɓa zə ɗəfa
(LUK 11:34-36)
22Lalam na gəɓa zə ɗəfa ndəni harani. An horok tay moggoni, gəɓa zuk dəwən nan wasan kerkeri. 23Ya an horok mbərayni, gəɓa zuk dəwən nan wasan guzliyo. Ya an əkeɗeɗe nazok van guzliyi, guzli nan wasan tigbizlimi.
Maŋgəlva awaniɓa koɓo
(LUK 16:13)
24Ɗəf tay naɗɗa wəza viyit ɗiy gugriɗ sula ɓa. An wazel ɗəf aŋka waŋglu andaka yi, awaniɓa wabay zən aza ɗəf aŋka wazelen andaka. Kəɓapaŋ na əgəɗ sən wəza sən Maŋgəlva gəm sən arya ɓa.
Əppan maɗula aka Maŋgəlva
(LUK 12:22-31)
25Vi vaski nədawnah sukum: Kədawgəgrəŋgaŋ sən ənziya egge nokum vi an kədawzəmaŋgə awaniɓa an kədawsaŋ ɓa, mãy aka gəɓa zukum na mi kədawguloŋ di ɓa. Vi zeŋgile yi day ki əzəma, gəɓa zə ɗəf tam day ki lukut ɓa sa? 26Mule biŋgeɗ na disiŋ, aslgaŋ ɓa, awbəlaŋ ɓa, zəga tay adakalanən a mahẽɗ ɓa, ya Afukum na disiŋ tay əzəmgiti. Kədayaŋ kiyit də sləma ɓa sa? 27Naway səmmbokum də əgəgrəŋ nan nawɓap əzzeken wəzva nan siɗikke dayday di?
28Vimi kədawgəgrəŋgaŋ sən zəga na əgul di? Mule uffiyeɗ nawra va adaffiyoŋgu. Aɗɗaŋ wəza ɓa, awɗəmaŋ gaɗmay ɓa. 29#1MI 10:4-7; 2AL 9:3-6Ya in tat ənah sukum: Salmoŋ də gagdak nan diyɗaŋ zlaŋ dəgul ɗah lukut moggon va nan ɓa. 30Ya an Maŋgəlva tay əgul lukut sən kevile nawra vas na, məs dəsan dəpaŋka ya pumpum na offo wazla. Agul sukum na day ki as ɓa sa, munokum məs ətaf nokum məgəsnəŋka? 31Kədawgəgrəŋgaŋ dawnəh na: Mi mədawzəm di? Awaniɓa mi mədawsa di? Awaniɓa mi mədawgul di ɓa? 32Vi zəgeɗis pak ɗiy-ɗar tay əkeyetin met homtokhomtoku. Vi Afukum na disiŋ asənək na mokum tay aket zəgeɗis pakə. 33Məkayan məlĩ na Maŋgəlva də təstəs nan daabəŋ, asna wapsukum zəgeɗis pakə. 34Kədawgəgrəŋgaŋ vi pumpum ɓa: Vi pumpum wagəgrəŋ ammba kiy zəni. Pay digil pak tatwãh nan məksəni.
Currently Selected:
Matiye 6: GBD
Highlight
Share
Copy
Want to have your highlights saved across all your devices? Sign up or sign in
All right reserved