Zakarya 14
14
Wəgay an bayma də əzza na Yawe
1Pay na Yawe tay əgap yaŋka, kawɗakni wərəh nok addəvko Yerusalem. 2Wanəkkelet ɗiy naket dəlveŋge meɓɓet pak a Yerusalem vi kawgaya. Kawgəmni walaŋgəla-metiŋ, kakkporti zəgeɗ səŋgili, kawvoŋgiti gil na gagay. Wəɗak net ɗiy kawsimgiti na gagay, en dədappaŋ kawzeti sə walaŋgəla-metiŋ van ɓa. 3Vasna, Yawe wagil kalpa dit dəlveŋge meɓɓetiski, walpə dənɗaŋ, va adaɗɗa pay nalpa. 4Pay nan na, waziw aka mossorgo metiŋ net heremeɗi, məs aba Yerusalem dəmmba pay nampum. Mossorgo metiŋ net heremeɗ van wapɗak səddakni, walaŋ metiŋgin wagəɗ diyɗa sə dəmmba pay nampum gap na moskoyo. Pərasl na mossorgo metiŋ wadder kəla disiŋ, maɓɓan kəla dohoŋ. 5Wakənzoŋ də walaŋ net mossorgoɗe gugriɗ nawa, vi walaŋ net mossorgoɗe gugriɗ van wagap a Asal. Wakənzoŋ va kənzoŋ aba wəkker na dəlvafuŋ aka pay na Oziyas, məlĩ na Yuda. Sissiŋ Yawe Maŋgəlva naw wade, sap dit maslayɗe nani. 6Pay nan na, əkeɗeɗe tay ɓa, səmyã keɓkeɓ ɓa may ɓeɓrezle ɓa. 7Wasan pay təttaka kpesli, Yawe asənəka. Kapay asan na ɓa, dəfəɗ ɓa, ya də pay moskoy na, təki wakekeɓe'i. 8#EZE 47:1; YOH 7:38; HNH 22:1Pay nan na, iŋkile məzva wagilyoŋ sə Yerusalem, wəɗak nan kəla pehe dəmmba pay nampum, wəɗak meɓɓet kəla pehe dəmmba pay na moskoyo. Vas adawsan dabya də təlapay pakə. 9Yawe yi nawsan məlĩ naka dəlvafuŋ gboŋgu. Das na, Yawe yi təttaka kpesli, iya nan pak taka kpesli.
10Dələv pak wakkpaŋ mukuro, təŋ sə Geba hã gap a Rimmon, a dohoŋ na Yerusalem. Yerusalem wasili, ɗiy wassoŋ də gəla a gəleti, təŋ sə maddamba na Benyamin hã gap a maddamba məzvani, gap aza maddamba na bezler, təŋ səza gəla na zəray na Hananeyel gap aza təki nawɗot megezlembirkeɗ na məlyã. 11#HNH 22:3Wassoŋ də gəla addəvni, mefɗeke asan na akan əmpa ɓa, ɗiy wassoŋ a Yerusalem fendeŋgi.
12Zəgeɗ na dərwa dədawrih ɗiy dəɗɗaŋ əgay də Yerusalem yeŋki: Sluw zit waŋgən aka tilit ziwziwi; heret waŋgən addəv gəlani, hərzlumit waŋgən a bereti. 13Pay nan dəpas na, Yawe waki geslne diyɗa aketi, naway pak wampa baynani, wabayanən ziti. 14Yuda pak wasap addəv əgay na Yerusalem. Arya net dəlveŋge na maŋgava pak kawndeti: meleŋge, təbəz babara, gəm lukutɗe ɗigit ɗigiti. 15Tatwãh warih pilseŋge, koropilseŋge, zlogomeɗi, korɗe dit zəgeɗ memeyẽɗ net na dibirgidik baymeti: wasan tatwãh məstaka nawrihti.
16 #
MƏS 23:39-43
En dəppaŋ mederet səret ɗiy en dəzzoŋ əgay də Yerusalem waddoŋ əppu' va aza əzva agəɗ pak aba məlĩ Yawe Məzuɓappakə, gəm kaɗɗa wəzləra net guɗukɗe. 17Ya mahəlfa məs dəmbat əppu' aba məlĩ, Yawe Məzuɓappak a Yerusalem ɓa na, buwən azi sit na ɓa. 18An mahəlfa na Eziptə azzan ɓa, tatwãh an Yawe adawbey dəlveŋge en məs dəmbataŋ a wəzləra net guɗukɗe ɓaŋ warəha. 19Vaski əzga' adawsan sən Eziptə dit dəlveŋge meɓɓet məs dəmbataŋ a wəzləra net guɗukɗe ɓeŋki.
20Pay nan na, weweɗe net pilseŋge, əver wasan azet na: «Ammba Yawe əŋgə»; mesteɓeɗ naddəv Gəla na Yawe na, wassoŋ va maɗaweɗ aba gəlamatuya. 21Mesteɓe na Yerusalem də an na Yuda pak wassoŋ sən Yawe Məzuɓappakə. En dədawzaɓaŋ-Maŋgəlva pak wagəmaŋ səret kawdan addəvti. Məman van wasan addəv Gəla na Yawe Məzuɓappak əmpa pay nan ɓa.
Currently Selected:
Zakarya 14: GB
Highlight
Share
Copy
Want to have your highlights saved across all your devices? Sign up or sign in
All right reserved