मति 4
4
येसुजिक परिछा
(मरकुस १:१२-१३; लुका ४:१-१३)
1वकरपाछा पवितर-आत्मा येसुजिके सइतनवासे परिछाक तहिँया उराठ-ठउरियामा लिगलसि।#हिब्रु २:१८; ४:१५ 2वहवाँ हुने चालिस दिन हसे चालिस रातलइ किहो हइने खइलेसे हुनेक खाँ भुख लगलइ। 3तब सइतनवा हुनेक लघिना याके यसके कहलिय, “यगर यपनहुँ परमेस्वरक पुतर हखहुँ जउँ, इअ पत्थरवानिके रोटि बनेके आग्या देहुँ।” 4बाकि येसुजि वकरेके जवाफ देके यसके कहलसि, “धरमसास्तरवामा यसके लिखाइल बडइ, मन्से रोटिसे मतरे हइने, बाकि परमेस्वरक मुहँवासे निकडलि हरेक वचनसे बचसइ।”#व्यवस्था ८:३
5वकरपाछा सइतनवा येसुजिके पवितर सहर यरुसलेममा लिगलिय हसे मन्दिरवाक टिस्कुनियामा पुगाके 6कहलिय, “यगर यपनहुँ परमेस्वरक पुतर हखहुँ जउँ, यहवाँसे तर उफरहुँ, केहकेकि धरमसास्तरवामा यसके लिखाइल बडइ,
‘परमेस्वर यपनहुँके बचावेके तहिँया यापन स्वरगदुतवाके आग्या देबसि
हसे यपनहुँक टङडियामा पत्थरावासे चोट झिन लगइ कहके स्वरगदुतवाह यपनहुँके हथवामा लोखतइ’।”#भजन ९१:११-१२
7तब येसुजि वकरके जवाफ देके कहलसि, “धरमसास्तरवामा फेनि यसके लिखाइल बडइ, ‘तुइ परमप्रभु यापन परमेस्वरक परिछा झिन करसि’।”#व्यवस्था ६:१६
8बाकि सइतनवा येसुजिके फेरि एगुडा उँच पहाडमा लिगलिय हसे हुनेके संसारक जम्मे राजसभ तके वकर महानता देखोते 9कहलिय, “यगर यपनहुँ मोरके ढोग करके मोर उपासना करबहुँ जउँ, मुइ इअ जम्मे यपनहुँके देबहिँ।” 10तब येसुजि कहलसि, “अरे सइतनवा, तुइ यहवाँसे जइबे करहि! केहकेकि धरमसास्तरवामा यसके लिखाइल बडइ,
‘तुइ परमप्रभु यापन परमेस्वरक उपासना करसि हसे हुनेक मतरे तुइ सेवा करसि’।” #
व्यवस्था ६:१३
11तब सइतनवा येसुजिके छाडके गेलिय हसे स्वरगदुतवाह याके हुनेक सेवा करलइ।
गालिल छेतरमा येसुजिक सेवाक काम सुरु
(मरकुस १:१४-१५; लुका ४:१४-१५)
12जब बप्तिसमा देलाहर युहन्ना थुनाइल बडिय कहके येसुजि सुनलसि, तब हुने गालिल छेतरवरि गेलसि,#मति १४:३; मरकुस ६:१७; लुका ३:१९-२० 13हसे नासरत छाडके कफरनहुममा जाके रहे लगलसि। इअ गालिल तलवाक लजिके जबुलुन हसे नप्तालि छेतरमा परसिय।#युहन्ना २:१२ 14यसइया अगमवक्तावाक कहलि वचनवा यसके पुरा भेलइ:
15“यरदन लदियाक वाहिकरवा तलवा जइनवा पइडवामा भेलि जबुलुन, नप्तालि कुलक मन्सावाह,
हसे गालिल छेतरमा रहलाहर अयहुदि मन्सावाह!
16यन्हारिमा रहलहरा मन्सावाह एगुडा जबड इजोर देखतइ
हसे मृत्युक छहरियाक देसवामा रहलहरानि वपरा,
एगुडा जबड इजोर चमकतइ।”#यसइया ९:१-२
17उहे जुनवासे येसुजि यसके कहते परचार सुरु करलसि, “तोहरा यापन-यापन मनवा पापसे फिरोह, केहकेकि स्वरगक राज लजिके यासकल बडइ।”#मति ३:२
पहिलोठि चेलवाह
(मरकुस १:१६-२०; लुका ५:१-११)
18एक दिन येसुजि गालिल तलवाक तिरवामा बुलइखुनि दु जन मछुरियानिके तलवामा जाल खेपइकि देखलसि। हुनुका पतरुस कहल सिमोन हसे वकर भयवा अन्द्रियास रहलइ। 19येसुजि हुनुकाके कहलसि, “मोर पाछा लगह हसे मुइ तोहराके मन्से यनलाहर मछुरियासभ बनोबहिँ।” 20इअ सुनतेकि हुनुका यापन जलवाह छाडके येसुजिक पाछा लगलइ।
21वहवाँसे इचिका वताहुँ गेलेपर हुने जब्दियाक दु जन बेटा, याकुब हसे युहन्नाके देखलसि। हुनुका यापन बाबा जब्दियासाङे डोङवामा जलवा सनइ रहलइ। येसुजि हुनुकाके फेनि बलोलसि। 22तब हुनुका वइघरहिँ डोङवा हसे यापन बाबाके छाडके येसुजिक पाछा लगलइ।
येसुजि बहुत मन्सेसभके डउल बनोलसि
(लुका ६:१७-१९)
23वकरपाछा येसुजि हुनुकर सभाघरवाहमा सिछा देते, परमेस्वरक राजक बारेमा खुसिक समाद परचार करते हसे जम्मे खलिक रोग लागल मनियाइल मन्सेसभके डउल बनोते जम्मे गालिल छेतरभर घुमलसि।#मति ९:३५; मरकुस १:३९ 24यसने हुनेक बारेमा सिरिया देसवाभर फइललइ हसे मन्सावाह जम्मे खलिक रोग लागल हसे मनियाइल, दुस्ट-आत्मा लागल, मिरगि रोग लागल हसे धार-हइने चल्ना रोग लागल मन्सेसभके फेनि हुनेक लघिना यनलइ तके हुने जम्मे जनके डउल बनोलसि। 25तब हुनेक पाछा बहुत मन्से लगलइ। उअ मन्सावाह गालिल छेतरक, डेकापोलिसक#४:२५ डेकापोलिस : डेकापोलिसक यरथ दस गाउँ हखइ। , यरुसलेम सहरवाक, यहुदिया छेतरक हसे यरदन लदियाक वाहिकरवासे फेनि याइल रहलइ।
Currently Selected:
मति 4: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society