SAN MATEO 2
2
Tej cypon jxin at cynaabl tuꞌn t-xiꞌ cyyeecꞌaxin nimbil twitz neeꞌ Jesús
1Itzꞌjtzen Jesús tuj tnom Belén tuj departamento te Judea, bix ja tzunj jxin Herodes rey tej titzꞌjkꞌa. Tej titzꞌj Jesús, e pon juun xjal nim cynaabl tuj Jerusalén. Otk chi tzaj te jun tnom te ocne. 2Bix e xiꞌ cykanenxin cye xjal:
—¿Jaaꞌ taꞌ jxjal at tuꞌn tcawen cyibaj xjal judío? Jaxte ma tzꞌitzꞌj, cuma ma kila jun cheꞌw ocne tzin tyeecꞌan ma tzul cawel cye xjal judío. Kaja tuꞌn t-xiꞌ kyeecꞌana knimbila twitz―tz̈i ke jawnex xjal te juntl tnom ocne.
3Tejtzen tbinte rey Herodes otk tzꞌitzꞌj juntl rey cye xjal judío, biꞌx e tzaj ttz̈i tiꞌjxin, bix e tzaj ttz̈i cyiꞌj aj Jerusalén. 4Oc tchmoꞌn Herodes cykilca nejenel cye pala cyuyax ke txꞌolbal ley, bix e xiꞌ tkanenxin cyexin jaaꞌ tuꞌn titzꞌja Cristo, jxjal Scyꞌoꞌn tuꞌn Dios te Cawel. 5Bix aj cytzakꞌbeꞌnxin texin:
—Tuꞌn titzꞌj tuj tnom te Belén tuj departamento te Judea, cuma e cyaj tzꞌiꞌbet tuꞌn jun tyolel Dios cyjulu: 6“Tz̈i Dios, ‘Jay, tnom Belén, amale chꞌineta cyxol tnom te Judá, pero nintzaja, cuma tuyey tzula itzꞌja jun Cawel tuꞌn tajben te Cylel te ntanema Israel,’ tz̈i Dios,” tz̈i jun tyolel Dios―tz̈ike.
7Tej tel tniyꞌ Herodes tiꞌj otk tzꞌitzꞌj jun cawel, bix e tzaj ttxcoꞌnxin kej xjal nim cynaabl, pero tuj ewjel, bix e xiꞌ tkanenxin cyexin:
—¿Jtoo ul jlet cheꞌw te ocne?―tz̈i rey.
8Tej tbaj yolen Herodes cyuya aj naabl te ocne, e xiꞌ tsmaꞌnxin ejeeꞌxin tuj tnom Belén, bix e xiꞌ tkbaꞌnxin cyexin:
—Cyucxa cyey tuj tnom te Belén, bix chebe chebe chi jyona tiꞌ neeꞌ. Ojtzen tcnet cyuꞌna, cykbantza weya, tuꞌntzen jax juꞌx weya tuꞌn nxiꞌya yecꞌl nnimbila twitz―tz̈i Herodes, pero ẍtakꞌ yol.
9Tej cybintexin tyol rey, exkexin, bix tujx naj tul jlet cheꞌw juntl maj otk cyilxin tej cytenxin ocne. Bix e cub nej cheꞌw cywitzxin, bix tej tpon cheꞌw tibaj jaaꞌ jaaꞌ taꞌ neeꞌ, e weꞌ cheꞌw. 10Tejtzen cylontexin cheꞌw, nimxsen e jaw tzalajkexin. 11Bix ocxkexin tuj jaaꞌ, bix e cyilxin neeꞌ tuya ttxu, ja María, bix e cub mutzkꞌajkexin twitz neeꞌ tuꞌn tjaw cynimsaꞌnxin ja. Otk txiꞌ cyiiꞌnxin chꞌin tiꞌj cykꞌinemalxin, bix e jaw cyjkoꞌnxin. E jatz cyiiꞌnxin cyoybilxin, bix e xiꞌ cykꞌoꞌnxin tekꞌa oro tuya incienso tuya jun wik cꞌocꞌsbil mirra tbi. 12Pero tej tpon tumel tuꞌn cyajxin, e tzaj tkbaꞌn Dios cyexin tuj cywitziyꞌxin tuꞌn miꞌn chi aj meltzꞌajxin tuya Herodes. Juꞌ tzunj, ajkexin tuj cytanemxin tuj junxitl be.
Tej cyxiꞌ ok José tuj Egipto tuꞌn min cub byet neeꞌ tuꞌnj rey Herodes
13Cyajlenxitltzen ke aj naabl, at jun e baj. Ul jlet jun tsanjel Dios tuj cyaꞌj tuj twitziyꞌ José, bix e xiꞌ tkbaꞌn te José:
—Weyꞌtztzen, bix kꞌinxa neeꞌ tuyax ttxu, bix juꞌ txiꞌy tuj Egipto, bix ajkelbilx tuꞌna, bix jatztzen ctemeley ojxe t-xiꞌ nkbaꞌna tey tuꞌn tul meltzꞌaja, cuma tzul Herodes jyolte neeꞌ tuꞌn tcub tbyoꞌnxin―tz̈i ángel.
14Bix e jaw weꞌ José, bix tex koniyan e xiꞌ tiiꞌnxin neeꞌ tuya ttxu, bix e xiꞌ okxin tuj Egipto. 15Bix e tenkexin tuj Egipto tejxe tcyim Herodes. Juꞌtzen eꞌla jaxxix tyol Dios. E cub ttzꞌiꞌben jun tyolel Dios cyjulu: “Tuj Egipto qꞌueletz ntxcoꞌna Ncwala,” tz̈i Dios tej xin tyolel.
16Yaltzen te Herodes, tej tbintexin otk cub sbuꞌnxin cyuꞌn aj naabl te ocne, nimxsen e tzaj tkꞌojxin, bix e xiꞌ tsmaꞌnxin tsoldadoxin tuꞌn tcub cybyoꞌnxin cykilca cwal xinak tuj Belén bix cyuj ke aldea tuj tcwent Belén. E xiꞌ tkbaꞌnxin tuꞌn cycub byet cykilca cwal nitzꞌj hasta te caꞌba jnabkꞌike, cuma el tniyꞌxin tiꞌj tuꞌn cyyol aj naabl otk bint caꞌba jnabkꞌi tej tul jlet jawnex cheꞌw te ocne. 17Juꞌtzen eꞌla jaxxix tyol Dios e tkba tyolel Dios Jeremías. E cyaj ttzꞌiꞌben Jeremías cyjulu: 18“Cbijel jun s̈itz̈ꞌbil tuj Ramá, jatzen kꞌajkꞌajel cywiꞌ xuuj te nimxsen bisbajil. Chi ookꞌel ke cyiyꞌjil Raquel cyiꞌj ke cyal, bix mlay bint tuꞌn tcyiwsaj cycꞌuꞌj, cuma min-altl cyal,” tz̈i Jeremías jatxe ootxa.
19Tejtzen tcyim Herodes, at juntl e baj. Juntl maj ul jlet jun tsanjel Dios tuj cyaꞌj tuj twitziyꞌ José tuj Egipto. Bix e xiꞌ tkbaꞌnxin te José:
20—Weyꞌtztzen, bix kꞌinxa neeꞌ tuyax ttxu, bix cu txiy tuj txꞌotxꞌ te Israel, cuma o chi cyim kej xjal e cyajbe tuꞌn tcub byet neeꞌ―tz̈i ángel.
21Juꞌ tzunj, e jaw weꞌ José, bix e xiꞌ tiiꞌnxin neeꞌ tuyax ttxu, bix e ponkexin tuj txꞌotxꞌ te Israel. 22E tajbexin tuꞌn tnajanxin tuj departamento te Judea, pero tej tbintexin otk tzꞌoc Arquelao te cawel te t-xel Herodes tuj Judea, e tzaj ttz̈i tiꞌjxin tuꞌn tnajanxin tuj Judea. E tzaj tkbaꞌn Dios texin tuj twitziyꞌxin tuꞌn miꞌn pon meltzꞌajxin tuj Judea. Juꞌ tzunj, e xiꞌkexin tuj departamento te Galilea, 23bix e ponkexin tuj jun tnom Nazaret tbi. Juꞌtzen eꞌla jaxxix jtyol Dios e cub ttzꞌiꞌben jun tyolel Dios tiꞌj jxjal Scyꞌoꞌn tuꞌn Dios. Tz̈i cyjulu: “Jun aj Nazaret cꞌoquele tbi.”
Currently Selected:
SAN MATEO 2: mamTS
Highlight
Share
Copy
Want to have your highlights saved across all your devices? Sign up or sign in
© 2000, Wycliffe Bible Translators, Inc. All rights reserved.