ມັດທາຍ 23
23
ເຕືອນໃຫ້ລະວັງພວກໜ້າຊື່ໃຈຄົດ
(ມຣກ 12:38,39; ລກ 13:34,35; 20:45,46)
1ແລ້ວພຣະເຢຊູເຈົ້າກໍກ່າວແກ່ປະຊາຊົນ ແລະ ພວກສາວົກຂອງພຣະອົງວ່າ, 2“ພວກຄູສອນກົດບັນຍັດ ແລະ ພວກຟາຣີຊາຍນັ່ງຢູ່ເທິງບ່ອນນັ່ງຂອງໂມເຊ, 3ດັ່ງນັ້ນ ພວກເຈົ້າຕ້ອງລະມັດວະວັງທີ່ຈະເຮັດທຸກຢ່າງຕາມທີ່ພວກເຂົາບອກພວກເຈົ້າ. ແຕ່ຢ່າເຮັດໃນສິ່ງທີ່ພວກເຂົາເຮັດ, ເພາະພວກເຂົາບໍ່ໄດ້ປະຕິບັດຕາມສິ່ງທີ່ພວກເຂົາໄດ້ສັ່ງສອນ. 4ພວກເຂົາມັດພາລະໜັກ, ບັນທຸກເອົາສິ່ງຫຍຸ້ງຍາກແລ້ວເອົາວາງໄວ້ເທິງບ່າຂອງປະຊາຊົນ, ແຕ່ພວກເຂົາເອງແມ່ນແຕ່ມືນີ້ວດຽວກໍບໍ່ຍົກຍ້າຍສິ່ງເຫລົ່ານັ້ນໄປ.
5“ພວກເຂົາເຮັດທຸກສິ່ງເພື່ອໃຫ້ຄົນເຫັນ ພວກເຂົາເຮັດແອບໜັງທີ່ບັນຈຸຂໍ້ພຣະຄຳພີ#23:5 ຄື ກ່ອງບັນຈຸຂໍ້ພຣະຄຳພີມັດຕິດທີ່ໜ້າຜາກ ແລະ ແຂນຂະໜາດໃຫຍ່ ແລະ ຂອບເສື້ອຄຸມຂອງພວກເຂົາກໍເຮັດຍອຍຍາວອອກໄປ. 6ພວກເຂົາມັກບ່ອນນັ່ງທີ່ສຳຄັນທີ່ສຸດໃນງານກິນລ້ຽງຕ່າງໆ ແລະ ມັກບ່ອນນັ່ງທີ່ສຳຄັນໃນທຳມະສາລາ; 7ພວກເຂົາມັກໃຫ້ຄົນມາຄຳນັບທັກທາຍໃນບ່ອນຊຸມນຸມຊົນ ແລະ ມັກໃຫ້ເອີ້ນພວກເຂົາວ່າ, ‘ຣັບບີ’.#23:7 ເປັນພາສາອາຣາມິກ ແປວ່າ ເຈົ້າຊີວິດ ຫລື ອາຈານ ເຊັ່ນດຽວກັບຂໍ້ 8
8“ສ່ວນພວກເຈົ້າຢ່າໃຫ້ຜູ້ໃດເອີ້ນວ່າ, ‘ຣັບບີ’ ເພາະພວກເຈົ້າມີອາຈານພຽງແຕ່ຜູ້ດຽວ ແລະ ພວກເຈົ້າທັງໝົດເປັນພີ່ນ້ອງກັນ, 9ແລະ ຢ່າເອີ້ນຜູ້ໃດເທິງແຜ່ນດິນໂລກນີ້ວ່າ, ‘ບິດາ’ ເພາະພວກເຈົ້າມີພຣະບິດາເຈົ້າອົງດຽວ ແລະ ພຣະອົງສະຖິດຢູ່ໃນສະຫວັນ. 10ຢ່າໃຫ້ຜູ້ໃດເອີ້ນພວກເຈົ້າວ່າ, ‘ຄູສອນ’ ເພາະວ່າພວກເຈົ້າມີຄູສອນພຽງຜູ້ດຽວຄືພຣະຄຣິດເຈົ້າ. 11ຜູ້ເປັນໃຫຍ່ທີ່ສຸດທ່າມກາງພວກເຈົ້ານັ້ນ ຕ້ອງເປັນຜູ້ຮັບໃຊ້ພວກເຈົ້າ. 12ດ້ວຍວ່າ ຜູ້ໃດທີ່ຍົກຕົນເອງຂຶ້ນຜູ້ນັ້ນຈະຖືກເຮັດໃຫ້ຖ່ອມໂຕລົງ ແລະ ຜູ້ໃດທີ່ຖ່ອມໂຕລົງຈະຖືກຍົກຂຶ້ນ.
ວິບັດເຈັດຢ່າງສຳລັບພວກຄູສອນກົດບັນຍັດ ແລະ ພວກຟາຣີຊາຍ
13“ວິບັດແກ່ພວກເຈົ້າ ຄູສອນກົດບັນຍັດ ແລະ ຟາຣີຊາຍ ພວກຄົນໜ້າຊື່ໃຈຄົດ! ພວກເຈົ້າອັດປະຕູອານາຈັກສະຫວັນຕັນໜ້າຄົນ. ດ້ວຍວ່າ ພວກເຈົ້າເອງບໍ່ເຂົ້າໄປແລ້ວຍັງຂັດຂວາງຄົນທີ່ພະຍາຍາມຈະເຂົ້າໄປ. 14ວິບັດແກ່ພວກເຈົ້າ ຄູສອນກົດບັນຍັດ ແລະ ຟາຣີຊາຍຄົນໜ້າຊື່ໃຈຄົດ! ພວກເຈົ້າເອົາສິ່ງຂອງ ຂອງບັນດາແມ່ໝ້າຍ ແລະ ທຳທ່າອະທິຖານຢ່າງຍືດຍາວ ດັ່ງນັ້ນ ພວກເຈົ້າຈະຖືກລົງໂທດໜັກທີ່ສຸດ.#23:14 ເອກະສານເກົ່າທີ່ຂຽນດ້ວຍມືບາງສະບັບວ່າ: ໄດ້ເຂົ້າໄປ
15“ວິບັດແກ່ເຈົ້າ ຄູສອນກົດບັນຍັດ ແລະ ຟາຣີຊາຍ ຄົນໜ້າຊື່ໃຈຄົດ! ພວກເຈົ້າທຽວເດີນທາງໄປມາທັງທາງບົກ ແລະ ທາງນໍ້າເພື່ອຈະໄດ້ຜູ້ໜຶ່ງມາເຂົ້າສາສະໜາ ແລະ ເມື່ອໄດ້ມາເຂົ້າແລ້ວພວກເຈົ້າກໍເຮັດໃຫ້ຄົນນັ້ນເປັນເດັກຂອງນະລົກ ຊົ່ວຮ້າຍຫລາຍກວ່າພວກເຈົ້າອີກສອງເທົ່າ.
16“ວິບັດແກ່ພວກເຈົ້າ ຜູ້ນຳທາງຕາບອດ! ພວກເຈົ້າເວົ້າວ່າ, ‘ຖ້າຜູ້ໃດສາບານໂດຍອ້າງໃສ່ວິຫານກໍບໍ່ມີຜົນຫຍັງ, ແຕ່ຖ້າຜູ້ໃດສາບານໂດຍອ້າງໃສ່ຄຳໃນວິຫານ ຜູ້ນັ້ນກໍຕ້ອງເຮັດຕາມທີ່ຕົນໄດ້ສາບານໄວ້’. 17ພວກຕາບອດທີ່ໂງ່ຈ້າເອີຍ! ສິ່ງໃດທີ່ສຳຄັນກວ່າກັນ ຄຳ ຫລື ວິຫານທີ່ເຮັດໃຫ້ຄຳນັ້ນສັກສິດ? 18ແລະ ພວກເຈົ້າຍັງເວົ້າອີກວ່າ, ‘ຖ້າຜູ້ໃດສາບານໂດຍອ້າງໃສ່ແທ່ນບູຊາກໍບໍ່ມີຜົນຫຍັງ, ແຕ່ຖ້າຜູ້ໃດສາບານໂດຍອ້າງໃສ່ເຄື່ອງຖວາຍເທິງແທ່ນບູຊາ ຜູ້ນັ້ນກໍຕ້ອງເຮັດຕາມທີ່ຕົນໄດ້ສາບານໄວ້’. 19ພວກຄົນຕາບອດເອີຍ! ສິ່ງໃດທີ່ສຳຄັນກວ່າເຄື່ອງຖວາຍ ຫລື ແທ່ນບູຊາທີ່ເຮັດໃຫ້ເຄື່ອງຖວາຍນັ້ນສັກສິດ? 20ເຫດສະນັ້ນ ເມື່ອຄົນໃດຈະສາບານໂດຍອ້າງໃສ່ແທ່ນບູຊາ ກໍໃຫ້ສາບານໂດຍອ້າງໃສ່ແທ່ນບູຊາ ແລະ ເຄື່ອງຖວາຍທັງໝົດເທິງແທ່ນບູຊານັ້ນເໝືອນກັນ, 21ແລະ ເມື່ອຄົນໃດສາບານໂດຍອ້າງໃສ່ວິຫານ ກໍໃຫ້ສາບານໂດຍອ້າງໃສ່ວິຫານ ແລະ ພຣະເຈົ້າຜູ້ສະຖິດໃນວິຫານນັ້ນເໝືອນກັນ. 22ແລະ ເມື່ອຄົນໃດສາບານໂດຍອ້າງໃສ່ສະຫວັນ ກໍໃຫ້ສາບານໂດຍອ້າງໃສ່ບັນລັງຂອງພຣະເຈົ້າ ແລະ ພຣະອົງຜູ້ທີ່ນັ່ງເທິງບັນລັງນັ້ນເໝືອນກັນ.
23“ວິບັດແກ່ພວກເຈົ້າ ພວກຄູສອນກົດບັນຍັດ ແລະ ພວກຟາຣີຊາຍຄົນໜ້າຊື່ໃຈຄົດເອີຍ! ດ້ວຍວ່າ ພວກເຈົ້າຖວາຍໜຶ່ງສ່ວນສິບຂອງເຄື່ອງເທດຂອງເຈົ້າ ຄືຜັກຫອມລາບ, ແກ່ນຜັກຊີ ແລະ ຜັກຄູມິນ#23:23 ເປັນສະໝຸນໄພຊະນິດໜຶ່ງ, ພາສາໄທເອີ້ນວ່າຜັກຢີ່ຫລ່າ. ແຕ່ພວກເຈົ້າໄດ້ລະເລີຍສິ່ງທີ່ສຳຄັນກວ່ານັ້ນໃນກົດບັນຍັດ ຄືຄວາມຍຸຕິທຳ, ຄວາມເມດຕາ ແລະ ຄວາມສັດຊື່. ພວກເຈົ້າຄວນປະຕິບັດສິ່ງເຫລົ່ານີ້ໂດຍບໍ່ປະຖິ້ມສິ່ງອື່ນດ້ວຍ. 24ພວກຜູ້ນຳທາງຕາບອດເອີຍ! ພວກເຈົ້າຕອງເອົາແມງມີ່ອອກແຕ່ກືນອູດທັງໂຕ.
25“ວິບັດແກ່ພວກເຈົ້າ ພວກຄູສອນກົດບັນຍັດ ແລະ ພວກຟາຣີຊາຍຄົນໜ້າຊື່ໃຈຄົດເອີຍ! ພວກເຈົ້າລ້າງຈອກ ແລະ ຖ້ວຍຊາມໃຫ້ສະອາດແຕ່ພາຍນອກ ແຕ່ພາຍໃນນັ້ນເຕັມໄປດ້ວຍຄວາມໂລບ ແລະ ການເຮັດຕາມໃຈຕົນເອງ. 26ຄົນຟາຣີຊາຍຕາບອດເອີຍ! ຈົ່ງລ້າງຈອກ ແລະ ຖ້ວຍຊາມພາຍໃນກ່ອນ ແລ້ວພາຍນອກກໍຈະສະອາດກ້ຽງດີເໝືອນກັນ.
27“ວິບັດແກ່ພວກເຈົ້າ ພວກຄູສອນກົດບັນຍັດ ແລະ ພວກຟາຣີຊາຍຄົນໜ້າຊື່ໃຈຄົດເອີຍ! ພວກເຈົ້າເປັນເໝືອນອຸບມຸງຝັງສົບທີ່ທາດ້ວຍປູນຂາວ ເຊິ່ງເບິ່ງພາຍນອກງົດງາມແຕ່ພາຍໃນນັ້ນເຕັມໄປດ້ວຍກະດູກຄົນຕາຍ ແລະ ຄວາມບໍ່ສະອາດທຸກຢ່າງ. 28ໃນທຳນອງດຽວກັນນັ້ນ ພາຍນອກພວກເຈົ້າກໍປາກົດໃຫ້ຄົນເຫັນວ່າເປັນຄົນຊອບທຳ ແຕ່ພາຍໃນພວກເຈົ້າເຕັມໄປດ້ວຍຄວາມໜ້າຊື່ໃຈຄົດ ແລະ ຄວາມຊົ່ວຮ້າຍ.
29“ວິບັດແກ່ພວກເຈົ້າ ພວກຄູສອນກົດບັນຍັດ ແລະ ພວກຟາຣີຊາຍຄົນໜ້າຊື່ໃຈຄົດເອີຍ! ພວກເຈົ້າສ້າງອຸບມຸງຝັງສົບໃຫ້ບັນດາຜູ້ທຳນວາຍ ແລະ ຕົບແຕ່ງຂຸມຝັງສົບຂອງຄົນຊອບທຳໃຫ້ງົດງາມ 30ແລະ ພວກເຈົ້າເວົ້າວ່າ, ‘ຖ້າພວກເຮົາໄດ້ຢູ່ໃນສະໄໝດຽວກັບບັນພະບຸລຸດຂອງພວກເຮົານັ້ນ ພວກເຮົາກໍຄົງຈະບໍ່ມີສ່ວນກັບພວກເຂົາໃນການຂ້າພວກຜູ້ທຳນວາຍ’. 31ດັ່ງນັ້ນ ພວກເຈົ້າຈຶ່ງເປັນພະຍານຕໍ່ສູ້ຕົນເອງວ່າພວກເຈົ້າເປັນເຊື້ອສາຍຂອງບັນດາຜູ້ທີ່ຂ້າພວກຜູ້ທຳນວາຍເຫລົ່ານັ້ນ, 32ເຫດສະນັ້ນ ຈົ່ງເຮັດສິ່ງທີ່ບັນພະບຸລຸດຂອງພວກເຈົ້າໄດ້ເຮັດ ແລະ ເຮັດໃຫ້ສຳເລັດຄົບຖ້ວນສາ!
33“ພວກງູຮ້າຍ! ພວກງູພິດເອີຍ! ພວກເຈົ້າຈະຫລຸດພົ້ນຈາກການຕັດສິນລົງໂທດໃຫ້ລົງນະລົກໄດ້ຢ່າງໃດ? 34ດ້ວຍເຫດນີ້ ເຮົາຈຶ່ງໃຊ້ພວກຜູ້ທຳນວາຍ, ນັກປັດຊະຍາ ແລະ ພວກອາຈານມາຫາພວກເຈົ້າ, ບາງຄົນໃນພວກເຂົາພວກເຈົ້າກໍຂ້າ ແລະ ຄຶງທີ່ໄມ້ກາງແຂນ, ຄົນອື່ນໆອີກພວກເຈົ້າກໍຈະຂ້ຽນຕີໃນທຳມະສາລາຂອງພວກເຈົ້າ ແລະ ຂົ່ມເຫັງພວກເຂົາໄລ່ຈາກເມືອງນີ້ໄປເມືອງນັ້ນ. 35ດັ່ງນັ້ນ ເລືອດຂອງຄົນຊອບທຳທັງໝົດທີ່ຕົກໃສ່ແຜ່ນດິນໂລກ ແລະ ຈະຕົກຖືກພວກເຈົ້າ, ນັບຕັ້ງແຕ່ເລືອດຂອງອາເບັນຜູ້ຊອບທຳໄປຈົນເຖິງເລືອດຂອງເຊກາຣີຢາລູກຊາຍຂອງບາຣາຂີຢາທີ່ພວກເຈົ້າໄດ້ຂ້າລະຫວ່າງວິຫານ ແລະ ແທ່ນບູຊາ. 36ເຮົາບອກພວກເຈົ້າຕາມຄວາມຈິງວ່າ, ເຫດການເຫລົ່ານີ້ຈະເກີດຂຶ້ນແກ່ຄົນສະໄໝນີ້.
37“ເຢຣູຊາເລັມ, ເຢຣູຊາເລັມເອີຍ, ເຈົ້າຜູ້ຂ້າບັນດາຜູ້ທຳນວາຍ ແລະ ເອົາກ້ອນຫີນແກວ່ງໃສ່ບັນດາຜູ້ທີ່ຖືກໃຊ້ມາຫາເຈົ້າ, ເຮົາປາຖະໜາຫລາຍເທື່ອແລ້ວທີ່ຈະຮວບຮວມລູກຂອງເຈົ້າໄວ້ ເໝືອນດັ່ງໄກ່ແມ່ທີ່ຮວບຮວມລູກຂອງມັນໄວ້ໃຕ້ປີກ ແຕ່ເຈົ້າບໍ່ຍິນຍອມເລີຍ. 38ເບິ່ງແມ, ເຮືອນຂອງພວກເຈົ້າຖືກປະຖິ້ມໃຫ້ຮ້າງເປົ່າ 39ເພາະເຮົາບອກພວກເຈົ້າວ່າ, ພວກເຈົ້າຈະບໍ່ໄດ້ເຫັນເຮົາອີກຈົນກວ່າພວກເຈົ້າຈະເວົ້າວ່າ, ‘ສັນລະເສີນພຣະອົງຜູ້ມາໃນນາມຂອງອົງພຣະຜູ້ເປັນເຈົ້າ’#23:39 ພສສ 118:26”.
Currently Selected:
ມັດທາຍ 23: LCV
Highlight
Share
Copy
Want to have your highlights saved across all your devices? Sign up or sign in
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.