MIKHA 4
4
Yhensain Nyenstap Guon
(Esa 2.2-4)
1Jweh los das buisnyeis lyis,
Yhenmuh joq dah boms gas dvnganh thoq lyis nyhang thank nghuot das.
Jing jens dvnganh thoq lyis zes nyhang joq.
Dius nyau jens nyoshoq houmha tsain yaus wvng los das.
2Nyamoq dius jens taiq das zis gas,
Yang Israel Mangso dah Yhenmuh joq,
Yhensain jing mas tsain doq loh goh.
Nyang yang lyis kuot nhang mes zis jyauh das las,
yang gas nyang khyen toh dah cho chank suh das.
Khasoeh ge lyis nyang jyauh cho ka Yerusalem masyah los.
Nyang nyah dius jens lyis Zion masyah taiq.
3Nyang gas we mas ni mas#Yol 3.10
yomsoq bos dah dius nyau jens jo mas
phyen-goh cho lhyi tamp das.
Nyamoq gas nyamoq moengsa lhyi khont-suh,
lham lhyi banlyenh bat das.
Dius nyau jens khanhamp eq
jeszan das xiklyis ma doms sont lo das.
4Yuk khanghmuh nyamoq nyang dah zvbiq khyam,#Zek 3.10
maiphang zains bos yvmas nyenstap zis yah nyeis das las
nyamoq lyis hank ma kyuk das.
Maukhung Jesphung Yhensain
haih zis dangthoengh toh goeus.
5Dvnyau dvnyau vsainnyang dah mangso lhyi paiq las domsyos gyo das, nghuot laus eq ngamoq gas Yhensain, ngamoq dah Mangso lhyi vcaiq vto paiq las domsyos gyo das.
Israel jens Jonsdoeus masyah Tauh los das
6 Yhensain taiq, Ngos dius jens lyis joeng las jons loh zis xauh goeus bang lyis dvgeh shwih tsainh das shishenh jweh los. 7Nyamoq gas khyei dyoq las yhen yah we joq. Nghuot laus eq nyet shih bang lyis vsaiq xi das las nyamoq dius nyau zainsmuh bweh das. Ngos nyamoq lyis Zion boms mas hauh shishenh masyah vcaiq vto guon das.
8Yvng yoeuh soeu ka nyah yvng jens lyis tyoeuqzvm masyah yoeuh teh, Mangso ka nyah dius jens lyis yoeuh zungh nyeis dah Yerusalem nvng eh, nvng gas nah munghdan dah wusmuh dvlhain doms bweh das. 9Nvng hou iq chamus kaiq ngaus nyeis? Lokhoeu nos nos dah vmesbih teh chamus nos xauh nyeis? Nvng mas hwankti ma bos yvmvyah lhyeh? Nah xamchangh jens dye shei goeus las, 10Yerusalem bang eh, gvshih namoq gas wus lyis tyamp las pa mha xauh nyeis das las lokhoeu nos nos dah vmesbih teh lhyent las noskyingh nyeis geh. Namoq gas Babilon wus pheh loh chah das. Nghuot laus eq houmha Yhensain ka namoq lyis namoq dah jeswus jens masyah khyuot yoeus das. 11Nvng lyis zan das zis dius nyau jens nyoshoq huom toh goeus. Nyamoq gas, Yerusalem dyoqbis chah. Haih wus dyoq gyoh joq zis ngamoq nyvng das, ge. 12Nghuot laus eq haih dius nyau jens gas, Yhensain dah ehnyet mas cha bos yvlyis ma seq. Jyo nang das zis tsainh toh yhangteh nyamoq lyis joeng das zis dvgeh tsainh toh goeus yvlyis ma soh kat.
13 Yhensain taiq, Yerusalem dius jens eh, namoq dah jeswus jens lyis loh joeng geh. Ngos namoq lyis thyeq khyau yahge thunk khu bos dah noeulu teh yombos nhang das. Namoq gas dius nyau jens nyoshoq lyis thungh thyi das. Nyamoq lhuot yoeus toh dah zisyos lyis, ngos, mungkvn gonh dah Yhensain, lhyi dyei das.
Currently Selected:
MIKHA 4: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.