JEREMIA 51
51
Epangulo lyaBabilonia
1Omuwa ota ti: “Otandi ka tukulutha ombepo yehanagulo, yi kondjithe Babilonia naLeb-Kamai. 2Otandi ka tuma aakwiilongo ya hanagule po Babilonia ya fa ombepo tayi pepe po etutu. Esiku ndyoka lyehanagulo uuna nali thiki, otaye ke shi homona taa ziilile koombinga adhihe notaa mbugaleke oshilongo. 3Inamu pa oondjumbeta dhasho ompito okulukila omatati gadho nenge dhi homate omahwahwa gadho. Inamu hupitha ko aagundjuka. Etangakwiita alihe okomupeshe! 4Otaa ka ninga oomwahe nokusila momapandaanda giilando yawo. 5Ngame, Omuwa, Kalunga Omunankondoawike, inandi etha Israel naJuda, nando oya yono kungame, Omuyapuki gwaIsrael. 6Tembukii mo muBabilonia! Ka holekeni okafudho keni! Inamu dhipagelwa uulunde wAababilonia! Ongame mwene tandi ikwatele ko noku shi geela ngaashi shi ilongele. 7Babilonia osha li sha fa oshitenga shoshingoli miikaha yandje; osha kolitha uuyuni auhe. Iigwana oya kolwa komaviinu gasho noya pwidhuka moondunge dhayo. 8Babilonia osha teka po ohaluka nosha hanagulwa po. Shi lileni! Shi gwayekeni omuti piilalo yasho, pamwe tashi vulu okwaaludhwa. 9Aakwiilongo mboka ya kala mo, oya ti: ‘Otwa kambadhala okukwatha Babilonia, ihe ethimbo olya pu po. Tu tembukii mo, tu shune kaandjetu. Kalunga okwa geela Babilonia noonkondo dhe adhihe nokwe shi hanagula po thiluthilu.’ ”
10Omuwa ota ti: “Aantu yandje taa kugu taa ti: ‘Omuwa okwa holola kutya otu li mondjila. Tu yeni tu ka lombwele aantu muJerusalem shoka Omuwa Kalunga ketu a ningi.’ ”
11Omuwa okwa sikumudha aakwaniilwa yaMedia, oshoka okwa dhiladhila a hanagule po Babilonia. Ota ka polithila ondjahi ye musho omolwehanagulo lyotempeli ye.
Oondjayi dhiita otadhi igidha: “Upikeni iikuti yeni, kutheni omahuuyanza! 12Yelutheni epandela lyokuponokela omadhingililokuma gaBabilon! Indjipalekeni aatonateli! Langekeni aapekapeki! Tuleni aantu miilangela!”
Omuwa ota gwanitha shoka a tile, ote shi ningile Aababilonia. 13Oshilongo shoka oshi na omilonga odhindji nomaliko ogendji, ihe ethimbo lyasho lya pu po, nongodhi yasho yomwenyo ya tokoka. 14Omuwa Omunankondoawike okwa gana momwenyo gwe kutya ote eta aantu oyendji, ya ponokele Babilonia ya fa oshiluku shoombahu, oyo notaa kugilile kenyanyu lyekandanga.
Ondjimbo yokuhambelela
15Omuwa okwa shiti evi koonkondo dhe;
nokuunongo we okwa umbu uuyuni nokwa alele omagulu.
16Okoohapu dhe omeya gomeyalelo taga ndunduma;
ote eta iikogo okuza kooha dhevi.
Ota shelitha oombadhi miikogo,
nota tumu ombepo tayi zi moompungulo dhe.
17Omuntu kehe omugoya noke na ontseyo;
mboka haa hongo iimenka, oya thethelekwa,
oshoka iimenka mbyoka ya hambula,
oyiifundja nokayi na omwenyo.
18Oyo iinima yowala noyi na okudhinika;
otayi ka hanagulwa po,
Omuwa ngele te ya e yi pangule.
19Kalunga kaJakob ine yi fa;
oye ngoka a shiti ayihe,
nokwa hogolola Israel a ninge oshigwana she mwene.
Omuwa Omunankondoawike olyo edhina lye.
Osilwa yOmuwa
20Omuwa ota ti:
“Babilonia, ngoye osilwa yandje,
omatati gandje miita.
Onde ku teyitha po iigwana niilongo,
21u tunte uukambe naakayili yawo,
u tunte omatembakwiita naahingi yago,
22u dhipage aasamane naakulukadhi,
u tsele aakuluntu naanona,
u kombe po aamati naakadhona,
23u kutule aasita niimuna yawo ominino,
u ndande aapululi noonani dhawo,
u mbandule omalenga naambala.”
Babilonia tashi geelwa
24Omuwa ota ti: “Otamu ka mona ndje tandi galulile Babilonia naantu yasho uuwinayi mboka ye u ningile Jerusalem. 25Babilonia, owa fa ondundu tayi hanagula po uuyuni auhe, ihe ngame, Omuwa, ongame omutondi gwoye. Otandi ke ku kwata, noku ku yelekanitha nevi e tandi ku thigi momutoko. 26Mungoye itamu kuthwa we emanya tali longithwa metungo. Oto ka mbugala sigo aluhe. Ongame, Omuwa, nda popi.
27“Yelutheni epandela, mu homone! Hikeni enkuma, opo iigwana yi uve ko! Dheulileni iigwana iita yokukondjitha Babilonia! Lombweleni aakwaniilwa yaArarat, Minni naAshkenas, ya homone. Langekeni ondjayi yokuwilika eponokelo. Eteni po uukambe wa fa oshiluku shoombahu. 28Dheulileni iigwana iita yokukondjitha Babilonia. Tumeni mu hiye aakwaniilwa yaMedia, aawiliki nomalenga gawo nomatangakwiita giilongo ayihe mbyoka taye yi pangele. 29Evi otali kakama notali imanana, oshoka Omuwa ota gwanitha omadhiladhilo ge, a mbugaleke Babilonia, kaamu kale we nando omuntu. 30Aakwiita Aababilonia oye etha okukondja, otaa kala momapopilongulu gawo. Oya kanitha omukumo; oya fa aakulukadhi. Omiyelo dhoshilando odha teywa po, nomagumbo ga tomekwa omulilo. 31Aatumwa ya tsatsakana otaa matukile komukwaniilwa gwaBabilonia, ye mu lombwele kutya omiyelo dhoshilando odha teywa po koombinga adhihe. 32Aatondi oya kwata po onkondo yomulonga noya tomeke omapopilongulu omulilo. Aakwiita Aababilonia oya haluka. 33Ohaluka aatondi taye ya hata pevi e taye ya lyatagula ya fa iilya polupale. Ongame, Omuwa Omunankondoawike, Kalunga kaIsrael, nda popi.”
34Omukwaniilwa gwaBabilonia okwa keke po Jerusalem
e te shi li po.
Okwa koona oshilando sha fa ombiga;
okwe shi ndhilagula po a fa evukule.
Okwa yugu po shoka a hala
e te ekelehi iihupe.
35Aasioni naa tye:
“Babilonia nashi geelwe
molwiikolokosha she yi tu ningile.”
Aajerusalem naa tye:
“Babilonia nashi geelwe
molwashoka she tu hepeke.”
Omuwa ota kwatha Israel
36Omuwa okwa lombwele Aajerusalem ta ti: “Otandi ke mu popila moontamanana dheni e tandi ka galulila aatondi yeni shoka ye mu ningile. Otandi ka pwinika oonza dhomeya gaBabilonia, omilonga dhasho otadhi ka kukuta. 37Oshilongo shoka otashi ka ninga ondumba yomakulukuma, moka tamu kala iithitukuti. Otashi ka ninga ehaluthitho; kamu na omuntu ta ka kala mo, noshaa ngoka te shi mono, ota ka haluka. 38Aababilonia ayehe otaa ndunduma ya fa oonime notaa gono ya fa uunkoshigona. 39Aafukedhi ano? Otandi ke ya hangela oshituthi e tandi ya kolitha ya nyanyukwe. Otaa ka kotha e taa kothelele. 40Otandi ke ya fala koshidhipagelo, ya ka kutulwe ominino ya fa oonzigona, iikombo noonzi. Ongame, Omuwa, nda popi.”
Oshiponga shaBabilon
41Omuwa ota popi Babilon ta ti: “Oshilando shoka sha li hashi tangwa kuuyuni, otashi kwatwa po! Babilon otashi ningi emoniko lyehalutho momeho giigwana. 42Efuta otali kungulukile Babilon e tali shi siikile nomakuthikuthi taga pupu. 43Iilando otayi ningi ontale, ombuga ya kalanda yaa na omeya. Kaku na we aantu taa kala mo nenge taa pitile mo. 44Otandi ka pangula Bel muBabilonia noku mu ethitha iinima e yi yugu po; iigwana itayi ke mu longela we.
“Omadhingililokuma gaBabilon oga kumuka po. 45Aaisraeli, zii mo musho. Fadhukii po, mu ka holeke oomwenyo dheni kuupyundjahi wandje. 46Inamu tyololoka nenge mu tile molwomitoto ndhoka tamu kundana. Omumvo kehe omutoto ogwi ili tagu taandelithwa — omitoto dhiikolokosha moshilongo, aakwaniilwa sho taa kondjithathana. 47Onkee ano tandi ti, ethimbo otali ya, uuna tandi ka geela iimenka yaBabilonia. Oshilongo ashihe otashi ka sithwa ohoni, naantu yasho ayehe otaa ka dhipagwa. 48Shaa shoka kombanda yevi nomegulu otashi ka ligola, uuna Babilonia tashi hanagulwa po kaantu mboka taa ziilile kuumbangalantu. 49Babilonia osha dhipagitha aantu akuhe muuyuni. Ngashingeyi Babilonia otashi teka po, oshoka osha dhipagitha Aaisraeli oyendji. Ongame, Omuwa, nda popi.”
Elaka lyOmuwa kAaisraeli muBabilonia
50Omuwa ota lombwele aantu ye muBabilonia ta ti: “Omwa hunuka meso! Indeni! Inamu dhikala! Nando omu li kokule negumbo, dhimbulukwii ndje, Omuwa gweni, ne mu tedhe Jerusalem. 51Otamu ti: ‘Otwa sithwa ohoni notwa gugwa; otu uvite twaa na omwago, oshoka aakwiilongo oya kwata po omahala omayapuki motempeli.’ 52Onkee ano tandi ti, ethimbo otali ya, uuna tandi ka geela iimenka yaBabilon, noomwahe otadhi ka tongagana noshilongo ashihe. 53Babilon nando oshi vule okulonda kegulu e tashi itungile ko epopilongulu, otandi ka tuma ko aantu ye shi hanagule po. Ongame, Omuwa, nda popi.”
Babilon ta yonwa po
54Omuwa ota ti:
“Pulakena, oku na onkugo tayi zi muBabilon,
elilagano omolwehanagulo moshilongo.
55Otandi hanagula po Babilon,
otandi shi mweneke thiluthilu.
Omatangakwiita otage shi ulumine
ga fa omakuthikuthi taga pupu,
notage shi nukile noshihomo sheigidho.
56Oye ya okuhanagula po Babilon;
aakwiita yasho otaa kwatwa po,
nomatati gawo taga teywa po.
Ongame Kalunga tandi geele uuwinayi,
notandi ningi Babilon, ngaashi shi ilongele.
57Aaleli yasho otandi ya kolitha —
aanongo, aawiliki naakwiita.
Otaa ka kotha e taa kothelele.
Ngame, omukwaniilwa, nde shi popi,
ongame Omuwa Omunankondoawike.
58Omadhingililokuma gaBabilon oshinankondo otaga ka kumunwa po,
nomiyelo dhasho dhoondungululu tadhi ka fikwa po.
Iigwana otayi ivulitha miilonga yaa na omupondo;
oonkambadhala dhayo otadhi yi momulilo.
Ongame, Omuwa, Omunankondoawike, nda popi.”
Elaka lyaJeremia tali tumwa kuBabilon
59Seraia yaNerija, omutekulu gwaMakseja, okwa li elenga lyomekolo lyomukwaniilwa Sedekia. Momumvo omutine Sedekia sho a li omukwaniilwa gwaJuda, Seraia okwa yi kuBabilonia pamwe naye, nonde mu pe omakumagidho gamwe. 60Onda nyolele membo ehokololo alihe tali ka adha Babilonia naayihe ya pamba Babilonia. 61Onda lombwele Seraia nda ti: “Nge wa thiki kuBabilon, dhimbulukwa okuleshela aantu mokule ashihe nde shi nyola. 62Galikana ihe u tye: ‘Omuwa, owa ti, oto yono po ehala ndika, opo mulyo mwaa kale nando oshishitwa, omuntu nenge oshinamwenyo, notali ningi ombuga sigo aluhe.’ 63Seraia, nge wa hulitha okuleshela aantu embo ndika, li mangela kemanya e to li umbile momulonga Eufrat 64e to ti: ‘Babilonia osho tashi ka ningwa ngeyi — otashi ka kopita noitashi anduka ko we, omolwehanagulo ndyoka Omuwa te li shi undulile.’ ”
Oohapu dhaJeremia odha hulile mpaka ihe.
Currently Selected:
JEREMIA 51: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.