Romanos 7
7
Sinia' jilis tijwajyi ki inka'neyasajnaye ti pajk'i ti iyo jikipijnasa'
1I'lijwas intant'iejayi ki iyo nak inka'neyasajnaye, siu'neje ti 'najanayi pi jiwonayi siunie ni jijweye iyo. Jijweye po' jiwek ape'e siuti 'wasa'n ni i'nio. Jlampet ti netia'n, lajk'i pet pa. 2Iyoye 'ate siojona asejnia ti tijwa'yi, siunie inka'neyasajnaye nak yiyis kiajwe siuti 'wanjle'e pi jik'iemjla. Jlampet siuti 'ya'al pa ayinie, siunie jijweye naka inka'neyasajnaye tijwayeje pet. 3Jak je iyoyiji pet siojona ti 'yuyi'ni pi jikiecha jik'iemjla ka kiak je tiwonaja 'ate 'ojietaki. Jlampet siojona ti 'ya'al pi jik'iemjla, ijiate siojona asejnia iliyi ti yi kiajwe pak inka'neyasajnaye, jak je iyoyiji 'wanjliyi ka injwa'yi kiujwe 'yina 'esiji, kajeyepa ti je naka ka 'no'ni.
4'Yina kiak jiwoyeyi pit, i'lijwas, ti asa'am ti aslaye iniuyeyi wita'm pa Sijwajieti ti 'ya'al. Jlampet ti asa'am masests'iase'm jitieyi'i nak inka'neyasajnaye, 'yina ti jleye kiajwe ni jikiecha aska'niona, naka Sijwajieti jla'am ti iniu kisie'e ti tajli pi a'no'. Jak je iyoyiji ka iyokieyinie'e ni 'es ti janiukieje ni Sinia'. 5Kajeyepa ti siuti je alekk'iyi siunie iyoyi naka inke', 'yiniye ka i'nojwatk'ijin'ni niwaka, niwaka siuniwa sakeyis ti kasteliaja. Sekyi'i ti siu'niwa ts'isienis kia'iyoye'ijyi pet ti wa'asitieyeyi'ni ka woyi ni siunie je 'es, jlam'ne kassoyiji jana ts'ajlati. 6Jlam'ne 'nakayi ti masests'e'm jitieyi'i naka inka'neyasajnaye, ijiate ajwayeje siukia iyonts'e, ti iyonts'e jikipijnasats'e'm. Sekyi'i anisakanaja pet ti anokieje ni Sinia', kajeyepa ti je pa awakie kiajwe ni siuniwa inlesajna' ti naka inka'neyasajnaye, anokiek'i pet siunie ji'niayi iyo janak Sinia' jikimet, janaka in'wasankiye ti ink'ie'.
Siunie inke' ti yi' iwia'm
7'Yina ¿jajwila ka je 'esie nak Moisés jika'neyasajnaye? ¡Jeyi! Jlam'ne naka ti ts'eyasa'n, je kia'iyotaja'ni pet kats'ajane paka iyone naka inke'. Ka lajak'i ti iyo'ate, “Ke inteliaja paka k'iejliyeyi”,#Ex 20.17 kia'iyo ka je ts'ajanataja paka iyone siunie i'nio' itiliaja siunie je 'es. 8'Yina naka inke' isijmajne'n niwak inamtis ti inkajlujniet, sekyi'i 'yiniye ka i'nojwatk'iji'n wikie'eyi siuniwa ti itiliaja ti je isis.
Siut'itie ka lajak'i puwa niwak inamtis, siunie inke' ka masajata peyit. 9Po' jakia jloma je ts'ajanjli'ijyi paka iyone niwak inamtis, i'wiesankiye pope. Siuti yimet niwaka inamtis, sekyi'i siunie inke' jijweye poye'eje pet, 10sekyi'i ts'al'ne. Siukiwa inamtis ti jlam ti jota si'manit, soyeyiji'ijyi jakia 'yejlati. 11Kajeyepa ti ni inke' isijmajne'n niwa inamtis, sekyi'i wuj ti siliaki, sekyi'i naka'ne ti isienk'i ti iyo isieye ti silia'an.
12Jak je iyoyiji ti kiak awoyi, siunie inka'neyasajnaye Sinia' 'yotat kajeyepa siunie ijwi'il 'es, jla'yi ti tijnajyi. 13'Naka ni siu'nie 'es, ¿'nakat'e ja soyiji jana 'yejlati? ¡Je'e! ¡Je soyiji! 'Yina siunie inke' ti iyo ka silia'an, jak je iyoyiji'ni isijmajne'n ni siunie 'es, sekyi'i ti inikajanitieyi ti naka inke'. Puwaka'ne jla'am puwa inamtis ti inkajlujniet ti it'imina ti 'yaka naka ni inke' ti ijiate ti je 'es.
Siuniwa tajle ni 'nisie'n je ininene 'ate siuniwa tajle pet jana Sinia' jikimet
14'Yina jlam'ne kasts'ajane ti siunie Moisés jika'neyasajnaye Sinia' ti jlamtis niwaka. Siuti ya'am ti i'niok'i'm, 'yina jikijmaye iyo pit ni 'isie'n, 'yina 'naka'ne pet ti siwe'en ti sekiajla ni inke' iyone jikipinikiek'i'm. 15Ijiate ti je ts'ajaneje siu'nie awoyi. Kajeyepa ti je awoyi siunie ti ya'am ti awotaja ka iyoyi, 'wenajliyi ti siunie ajwelta ka se'waja'm, 'yina nakayep'ajne ti awoyi.#Gl 5.17 16Jak je iyoyiji siuti awoyi niwaka, siuniwa ti je awotaja ka iyoyi, 'yina naka'ne ti it'imina ti ts'ajane pi awone ti nak inka'neyasajnaye je ka jiniliakie. 17Jak je iyoyiji siuniwa awoyi je ya'am ka intalk'i, 'yina siunie inke' ti yi' itiowiji naka ti tajle. 18Kajeyepa ti siuti ya'am ti i'niok'i'm, 'ne iwia'am, lajk'ipa ka 'esie ka nejyi. 'Wanjliyi ka sitiliaja ka iyo ni siunie 'es, 'yina je akajli. 19'Yina siunie je 'es ti je awotaja ka iyoyi naka ti awoyi, jlam'ne ka iyoyi ni siunie 'es ti sitiliataja. 20Jak je iyoyiji siuti awoyi ni siunie je sitiliaja ka iyoyi, ijiate nakaye'eje pet ti je ya'am ka intalk'i, 'wenajliyi ti tajle siunie inke' ti yi' iwia'am.
21Naka pet ti a'we'en ti 'wanjliyi ka ijialas ka iyoyi ni siunie 'es, 'yina nakata jla'am ni siunie je 'es ti akajli ti awoyi. 22Iwia'am emi'n pet niwa Sinia' jlamtis, 23'yina ani'we'en ti po' siunie ti yiji 'ni 'isie'n ti yelk'a'ni k'iye 'ni itienkiujnieye iyoyi; nakayeta jla'am ni siunie inke' ti si'yaka'n ti silie'nit. 24¡Sip'elisiep'an! ¿Tempa ja si'manit ti siunie 'isie'n ti soyiji jana 'yejlati? 25¡Sinia' nakata jla'am ti ja sijwajiet je lajk'i pa iyo pa Saka'niona Jesús ti Sijwajieti ti kia'iyo!
Ts'ijiye jlaja awo'ate: a'we'en ti ijiate ti je 'es ka je iyoyi niwaka niwa iyo ka tiwoki siuniwa Sinia' jlamtis, jlampet ti i'niok'i'm, awoyi ni siunie jikijmaye pet ni inke'.
Currently Selected:
Romanos 7: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.