Romanos 10
10
1I'lijwas, siunie ti ijiateje ti awoyi itienkiujnieyeja', siu'neje ti awoyi 'yejlayeja', naka ti siunapo i'lijwas Israel jika kia'lis ka injwajyi'n pet. 2'Yina a'we'en ti ijiate ti iyo ka ijiatayiji ka 'noyits'i ka noyisieje ni Sinia', 'yina je naka ni siunie 'najankijnieye ti ijiatk'i. 3Jlam'ne nakata jla'am ni Sinia' ti ilisajne'n napo i'nio', 'yina ti Israel jika kia'lis je 'yijene paka wonisi naka, sekyi'i ijwilayis ka niwakaye ka 'esieyisi siuniwa iyoyi, jak je iyoyiji ka iwoyisi ka ininekiaj'lisi ni Sinia' ti nakaye ti ja 'esieyisi. 4Siunie Moisés jika'neyasajnaye, Sijwajieti pak jlam ti iyo jlaja, kajeyepa ti naka ti 'yijene pi iyone siunie ijialasink'iye ni siunie je 'yakakiu, 'yina janakaye'eje pet ti Sinia' janlesajne'n.
Wikie'eyi siunapo i'nio' tajnink'iye ni Saka'niona napok janjwajyi'n
5Siunie i'nio' ti iyoyi nak Moisés jika'neyasajnaye, 'yina ti ijwilta ka nakaye ka Sinia' ilesajne'n siuti iyoyi, siupa Moisés iyoyet'ipi 'ate, “Siunie i'nio' ti iyoyi siuniwa inamtis yiji nak inka'neyasajnaye, naka ti ja'wasana.”#Lev 18.5 6-7Jlampet ti ijwil siunie i'nio' ti je takakiu'n siunie ka 'esieyi iyo'ate, “Ajosik ká awone 'ate, ¿Tempa jankajli ka ijno poliyi? ni'ne ka wone'ate pa ajosik, ¿Tempa jankajli ka ijno ajnat kiajwe?” (Kajeyepa ti siuti kia'iyo 'yiniye ka iyo pa Sijwajieti ka ina'm ajnat'e, siu'neje ti 'yiniye 'neje ka iyo ka inekiajle'e pa Sijwajieti ka ino kisie'e ka intajli pa a'no'.) 8Moisés kiakt'e iyopi'iji 'ate, “Siuniwa Sinia' jlamtis je ka tojwaja'najap. Yiji ni ajosik, jla'yi ti yiji ni akiwet.”#Deut 30.12-14 'Yina niwaka siuniwa ti awoki'ni samtikie' ti ajwela naka intankiujnieye ti 'es. 9Siuti jiwoyi amtisie' ti jijwel pa Jesús pak aka'niona, siu'neje ti ijiate ti jlejni ni ajosik ti je kakiuni ti naka ti iniujwa'n kisie'e ti tajli pa a'no', jajwa'a. 10Kajeyepa ti jayini'ni isiowe'e siunie awoyi ti je akakiu, siuti awo ka Sinia' silisajne'n. Sek jane'yi ti jayoyi pet yamtikie' siunie ti je akakiu, 'nakayi ti jajwie'.
11Siuniwa Sinia' jlamtis iyo'ate, “Siunie ti ja ke inkakiu, ja lajak'ipa ka k'iejliyeyi ka ink'emijiet.”#Is 28.16 12'Yina ti je ti'nialkita papo ka ijna'yi siunie 'es. Iyone napo jika kia'lis, 'yina wikie'eyi napo i'nio', 'wanjliyi ka Judíoja' pa, ni'ne ka pakaye je Judío, kia'iyo jika'nionajas pet. 'Yina yi'i pa ti tajnink'iye nakaye'eje ti Sinia' kiak iyone, ti iniuyeje ti iwijna'm niwa isis. 13Kajeyepa siuniwa Sinia' jlamtis 'neje iyo'ate, “Wikie'eyi siunapo tajnink'iye pa Saka'niona ka inoyeje, ja napokaye ti janjwa'.”#Jl 2.32
14'Yina awo'ate, ¿tepa jawo ka intanisink'iye ti 'yakakiuyis? ¿Tepa jawo ka impe'yayis ti lajk'ipa ka iwoyi jlamtikieyi? 15'Yina, ¿tepa jawo ka inamtik jiwos ijnoyi ti lajk'ipa ka injloyi? Iyo niwa Sinia' jlamtis ti iyo'ate, “¡Ijiat ti 'es wat ti 'nes'ni siunapo ti name nak inka'niye ti 'es!”#Is 52.7
16'Yina je wikie'eyi ka iwoyi nak inka'niye, iyo'ate iyot'iyipi pa Isaías ti iyo'ate, “'Yaka'niona, ¿tempa je kaskakiuk siunie iyo ni ajwela?”#Is 53.1; Jn 12.37-38 17'Yina ijiate ti siunie ti tipe'yak, nak tajle siunie intankiujnieye ti je takakiuk. Ijiatjliyi siunie tipe'yak nak Sinia' jika'niye ti ijwi'il pa Sijwajieti.
18Sekyi'i awo'ate, ¿ent'a napo Israel jika kia'lis jet'i ipi'yayis nak Sinia' jika'niye? Ipi'yayis, tepa jawo ka je impe'yayis, jlam'ne siuniwa jlamtis ni Sinia' iyo'ate:
“Itijwi'n ape'e 'ni ajnat ni jla'lap napoka Sinia' jikawos,
yame siuniwa ajnatis tome jlaja niwa jlamtis.”#Sal 19.4
19Jayikiajle'eje ti jayo'ate, ¿'nakat'iyi jla'am siunapo Israel jika kia'lis ti je 'yijene paka iwone niwak Sinia' jlamtis? Je ajwel ka je 'najanisi paka iwonisi, 'yijenisi pi iyone. Janiajnat siunie Moisés iyot'iyipi ti iyo'ate:
“Siuti ja'yejne'n siunapo i'nio' ti je 'yaka kia'lis
napok jant'emina ti jawakiayek'imna'a.
Jlampet siunapo ti laj jlosikie'
napok jant'emina pet ti ja injwesisa'.”#Deut 32.21
20Sekyi'i pa Isaías ji'lij je jnechi pijia'm ti iyo'ate:
“Siunapo ti je siwojyi'n,
napokaye'eje jla'am ti si'wenis, iyo ni Saka'niona.
'Yina jlampet siunapo ti je ti'yasank'i,
napokaye'eje pet ti anikajanitia'm.”#Is 65.1
21Isaías ti ijwi'il papok Israel jika kia'lis, iyoyet'ipi 'ate:
“Atejwik'i wek ki jloma ti isio' ajatieje'ni
napoka i'nio' ti je tipechiji'n siu'neje napo ak'aliyijin'ni.”#Is 65.2
Currently Selected:
Romanos 10: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.