Judas 1
1
Judas itijwile papo Sinia' jilis
1Asampey i'lijwas, ya'am Judask'i'm#Mt 13.55 Sijwajieti Jesús jikawok'i'm 'neje, siu'neje ti ya'am ti Santiago ji'yinik'i'm. Asa'am ti ajlo'wase 'ni ip'isinik, ti asa'am ti jlemijna'ase'm pi Sinia', siu'neje ti jla'am ti ta'nase. 'Yina asa'am 'neje ti Sijwajieti Jesús ijiat ti i'ye'nase'm. 2'Esiji ka ijiatayiji siunie Sinia' jikap'ijliuskiye ka ne'yasap, jla'yi ni jikamankiye, siu'neje ni jlemijnaye.
Siunapo ti je ijiat ka inka'neyasajnayewosa'
3I'lijwas ti yimijna'ase'm, je jlase' ni awo ti siwa'asitieyi'ni ti awo ka ip'isinik itiejiet'ase ka ijwil pet ask'ioye siujlie'e sijwajieti ti lajk'ipa ka lajayijap ti yits'e. Ijiatjliyi 'nakayi alesane kajeyepa 'es ka kia'inwoyi, ti wuj ti anip'elisi'niase ka ijiatayiji pet ka anilana'yi ape'e siunie intankiujnieye ti 'es, siunie ti etiet'ipi wek na Sinia' ti iwijna'm napo jilis sekatajak'i. 4Kajeyepa ti po' siunapo i'nio' ijiuski'lajne'n ti ini'not'i aswa'm ti yi' aska kiowe'e, 'yiniye ka ijiatayiji ka intaj'l aswa'm, lapakawo ti inip'o'nase wek. Sekyi'i ti ijwila ka ijiatayiji ka ineki siunie jikap'ijliuskiye ni Sinia', 'yina nak isienayi siuniwa ti iyo ni siuniwa itiliaja ka iwoyi siuniwa je isis. Ijiate ti 'yakajanitk'i ti 'yakakiu pi Sijwajieti Jesús, ti jla'am ti ijwienjli ti saka anechiyas. Napoka siunapo i'nio' ijwilt'ipi siuniwa inamtis ti isis, ti 'yaka ti jajnoyi ni siunie jiwet'ia napo ti netiajne'n.
5Pajatak'i ti 'najanayi siu'nie, 'yina ti awo'ate ka je inkiwaliyeyi'i pet. Ijiatataja ti paka Saka'niona ti yame ti tajlajaja'm japa Egipto ti ijwiejiete'n papo Israel jika kia'lis,#Ex 12.37-42 'yina ti jikakiujnieye po' papo i'niot'ipi, pak it'imint'iyijpe ti Sinia' itij'we ti iliajne'n papoka.#Núm 14.29-30 6Pojon'nejepe papo injlojwajnas poli jlele ti ijliasate'n siupa Sinia', iyontaja ti yinta'ak'i siupa jikijmaye iyone, je 'esiji jla'm ti taj'lik'i siupuwa ji'wetis.#Gén 6.1-4 Papoka ti Sinia' ilie'niti puwa wikijnies ti jajnok'i'ni ti ja inkipijnasa', sekyi'i itiete jikiowe'e ni ajnatiok jajnok'i'ni paj ka ineyeyinie'e siojona jloma ti ja ke jwajla'aja, janaka siojona ja tenajaja ti ja ti'yena napo i'nio' pi jitis iyo. 7Kiak iyo siupapo i'niot'ipi ti yiji puwak isi'il Sodoma siu'neje japa Gomorra, puwaka 'neje jla'am siupuwa isi'il je tosape'n. Ijiat ti je 'wena ijio'we siupi jiket'i iyoyipi papo injlojwajnas poli jlele t'ipi. Papoka i'niot'ipi ijiat ti 'yaka'm ape'eyi siupa iyoyi ti je ilisaniji siunie tiwoki ti ayijniests'e'm, siu'neje ti asejnia, siuniwa t'isienis 'yijie'ne siuniwa wask'i'nelaja siunie kawo ka inteliaja niwaka siuniwa ti ijiateje ti je isis. 'Yina it'imina ti totieje siunie jiwet'ia, naka siunie jwat ti je ti'wena ka'no'me, ja 'nakayeyi pet ti jan'we'en wikie'eyi siunapo i'nio', sek jane'yi ti ja jitiej inenayisi'nina 'ate naka.#Gén 19.1-25
8Siunapo inka'neyasajnayewos napo ajwel'ni, ijiate kiak iyoyetaja siunie iniwonisi ti yamisi siuniwa jijwejlikis iyo, siu'neje ti ikajyi'n niwa t'ajwes, siu'neje ti ikakiuyis ni Saka'niona ti anechiyas. Iliakiyis 'neje siuniwa poli jlele ti jijweye po'. 9Siupa injlojwanik poli jlele Miguel, ti jlamata pet ti ijia jika anechiyas,#Dan 10.13,21; 12.1; Apoc 12.7 'yina t'otale je t'oni ka kiak ji'lij iwone, siupa ti iniewiti pa imosik ape'e pa t'ajwes masa pa Moisés.#1.9 Judíojos jip'esinikjimpe jle' iyo'ate “Moisés tikinieje poliyi” ijwi'il pet ti siupa imosik ti iyotaja ka inijnajiet'e pa t'ajwes masa pa Moisés t'ipi. 'Yina ti ijwi'il “kalankijieta”, pakayi ti ilia'an pa jikiecha masa Egipto jlele (Ex 2.11-12) (9). 'Yina Miguel je yits'e ka kiak iwone 'ate pa imosik, “¡Ates po'!”, 'wenajliyi ti iyone 'ate, “¡'Esiji ka Saka'niona jlama jla'am ka insela'm!” 10'Yina napoka i'nio' ti ajwel'ni, ji'lij siunie je 'es yinayits'i niwaka wask'i'nelaja ti je 'yijenisi paka iwonisi, jlampet ni siunie ti ijiate ti 'yijenisi pi iyonisi. Niwaka ni siuniwa ti tajle pet niwa t'isienis 'yijijie'ne ka woyi, 'yina je tajle siuniwa jlosikis. Niwak iyo'ate siuniwa pini' 'lan jlele pet, ti laj jlosikie', 'yina siuniwa jikeyis niwaka ti ijioyija'm ni jiwet'ia.
11¡Jiwet'ia japoye napoka siunapo ti yame pet siunie ji'niayi iyot'iyipi pa Caín!#Gén 4.3-9; Heb 11.4; 1 Jn 3.12 Siojona wikiniet'aj janak 'yakajmank'iji'n kajeyepa ti jikiowe yijni, iyo'ate pak Balaam t'ipi.#Núm 22.4-35; 31.16; Apoc 2.14 Inilajnen'ni iyoye'ate pa Coré t'ipi,#Núm 16.1-35 siu'neje pa jiwet'ia iyo ti no'we papo i'niot'ipi ti 'yajle'n. 12Jak je iyoyiji siuti jinikijwana ti jiwoyeta aslakijnieyeja' ape'e ni Saka'niona jlemijnaye ni siunie yi'asap, 'yina je iyo jlosikie'ase, jak je iyoyiji wuj ti i'najwejlanatak'i wita'm asam ti jikijwanayi. Iyo'ate siunapo sontas jiwos ti je 'yakojniejne'n ni siuniwa jiliajwas, 'yina ti'yekiujni'n jla'am jiwekie'e. Iyo'ate siuniwa polis ti i'niat je yijits'i, jak je iyoyiji siunie jlajwu ti yejwuti itiete'ni. Iyo'neje 'ate siuniwa a'la' ti je iyo jlaye' ti yiyetaja siunie ti jota iwo jlaye'. Timesiji'ni ti 'yajlits'i siu'neje ti jitiskiu'l tiniayejek'i ti tilienak'i pijia'm. 13Niwak iyo'ate siuniwa ji'wukijlimpejes ti tiwakits'i pijia'm yi' ni i'niat lajlik'i, jlampet siuniwa ti je isis ti iyoyi, nak 'yiniye pet siunie ti iyo siepa' ti yi' ape'e ti ijiut'ni jikiusi. Iyo'ate siuniwa katese'l ti 'yakamk'iji'n, 'yina Sinia' 'yotat pet k'iye siunie ji'wet, jikiowe'e ni siunie ajnatiok, jajnok'i'ni pet ti sek jane'yi.
14Kia'iyo pak Enoc#Gén 5.18,21-24 t'ipi siupa Adán jikichas siupapo jikichas 'neje pet jlas ti tomi pijia'm. Siupa ti Sinia' ji'lij iwijna'm ti ijwi'il papoka i'niot'ipi ti iyo'ate, “A'we'en ni Saka'niona, ti na'am siu'neje ti je jlase' napo jijliujwajnas poli jlele ti namik'i, 15ti name wikie'eyi napo i'nio' ti isis ti jan'ye'en. Jan'ye'en wikie'eyi siunie iyo, sekjane'yi nak jantajlata siunie je 'es ti iyoyi, siu'neje niwa jlamtis ti itiejiet ilia'm ti jla'am.”#1.15 Siu'niwa inamtis tajla'm pet siupa Judíojos jip'esinik ti jle' iyo'ate “Enoc jip'esinik” (15).
16Napoka napo ti ajwel'ni, iwit'iajne'n siu'neje ti takalakijiejne'n, 'yina ijiate ti yame siuniwa wask'i'nelaja itiliajasi ka woyi. Wuj ti initoniti'n, 'yina ka kia'iwo ka inlakiyisi'i siuniwa jlamtis, siu'neje ti ijwil ka ijnonit jlam'ne jla'm iyonisi jiwek ti ilisanisiap'ni papo ijia.
Ká anikiwalinitie asa'am ti Sinia' jilists'ase'm
17Siupet ti asa'am, i'lijwas ti yimijna'yase'm, siunie iyot'iyipi papok Saka'niona Jesús ti Sijwajieti jijliujwajnas, nak ti ataj ja enayijpe 'ate, siunie ti iyo'ate, 18“Siuniwa jlomas jane jlaja, japoye siunapo i'nio' ti jankalakijiejne'n, najataja jla'am siuniwa ti jlamis ti itiliajasi kawoyisi ti janeki siuniwa ti je isis.”#2 Ti 3.1-5; 2 P 3.3 19'Yina napoka siunapo ti itiejietk'i wita'm napo Sinia' jilis, yamk'i pet siunie t'isie'n jikijmaye, jak je iyoyiji pet siojona Sinia' jikimet ti 'es lajk'i japa ka ineyi.
20Siuti asa'am, i'lijwas ti yimijna', 'esiji ka nit'onitieyi pijia'm siunie astankiujnieye ti ijiate jlam ti 'es ti janaka ti 'notatak'i, naka ni siunie ti je kakiuye ni Sinia'. Woye asts'ajlayeja' janaka ti astaj jawomayi Sinia' jikimet ti 'es ti jawe'nase'm ni as'nayija'. 21Ká atajlajyi' siunie jlemijnaye ni Sinia' yi'nase'm, 'yina weyejyi siunie ti janejejwiye k'iye siojona jloma ti Saka'niona Jesús ti Sijwajieti jikap'ijliuskiye ti ja kassejni siojona si'wasankiye ti t'o'n.
22P'elisijne'n siunapo ti mamjli'ijyi wata'a je ijiat ka woyi siunie jitienkiujnieye ti 'es. 23Siunapo ijioyi jana 'najlati 'wet, 'yina 'manitiejyi'n ka je ijnoyi na jwat, tonats'i kisie'e. Po'neje siunapo ijia, 'yina awo'ate p'elisina', asosikis enitiejyi'ni k'iye. 'Yina joskiyeyi siuniwa ji'wuye, kajeyepa ti yame'e ti yijits'i siunie iniwonisi.
¡Jayunitie pi Sinia'!
24-25¡Jayunitie pa Sinia' ti ijwienjli, Sijwajieti, jla'am ti 'yijene pi iyone kan'ye'nase'm, 'nakayi ti siunie ti je 'es ja ke inkajlajyi pet, siu'neje ti ja laja ast'ojliye, 'yina 'wenajliyijna'a pet ti jampo'ase siunie asnikanitieyi jitieyi'i ni jijweye iyo! ¡'Esiji ka siunie iyo ti 'es, siu'neje ni jiwunitieye, siu'neje ni jijweye, siu'neje ni jika anechijiayas, ja ke intajlap ti jla'am, ja titiajlataje pa Saka'niona Jesús ti Sijwajieti, siunie ti 'nelanjie'e t'ipi, siu'neje ti 'nakayi, 'yina jajnok'i'ni! Amén.
Currently Selected:
Judas 1: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.