Gálatas 5
5
Ka je ink'asayik'i pet pijia'm siunie ti asa'am ti je inkipijna'ase'm
1Sijwajieti jlam ti kas'manit, ti sa'am ti inkipijnasts'e'm, it'imina ti 'nakayi ajwayeje ni siwet'ia.#Jn 8.31-36 'Yina siuti kia'iyo 'naka'ne ti astaj ja enayi 'ate ti janit'onitieyi pijia'm, je 'es ka ekiajla astepe'e siuniwa asjloye ti kiak jiwoyeyi ti jleyepe kiajwe.
2'Yejne'n, ya'am Pablok'i'm ti jayo'ate ti jajwi'lase'm, siuti kiak janiwonayi 'ate iyo napoka yame pet ki iyo napo Judíojos, ti t'isie'n jiwa tejwak'i, ijiate siunie Sijwajieti ja ke insisieyi'iji pet. 3Jayikiajle'eje k'iye siunapo ti kiak iniwone ti t'isie'n jiwa yiwa'a, ti je 'es 'neje pet ka je ilesaniji wikie'eyi siunie iyo niwaka iyo ka tiwoki ni Moisés jika'neyasajnaye. 4Asa'am ti jijwela' ka nak int'emina ka Sinia' lesana', kawoyeyi nak Moisés jika'neyasajnaye, jlam'ne je ijnaljliyejiape'n pi Sijwajieti. Siunie iyo pi Sinia' ti takap'ijliuski, kiak iyojliyi intojwajiape'n. 5'Yina jlam pet ti sa'am, ti je akinieje naka, naka kasts'isisi pet siojona Sinia' jikimet, jla'yi ki iyo siunie ti je akakiunieje. Sekyi'i it'imina'ne pet ti sinijijwiye po' pet ka Sinia' kasnajietits'i. 6Jak je iyoyi siunie ti ini'nopijieteje ni Sijwajieti, 'yina 'wanjliyi ka kia'iwo pa ka kiak tiwonaja ka t'isie'n jiwa tejwak'i, ni'ne ka lajak'ipa ka neyi naka. Jla'm ijiate jla'am siunie sitienkiujnieye ti 'es ti po' ti laja po', 'yina naka'ne siunie ti janwo asemijnayeja', ti ja ena'yi napo as'lejwas.
7Wuj ti 'es siukia jiwoyeyi ti 'nelanjie'e. 'Nakayi, ¿ten t'ipi pa siupi it'imina ti jijliena niwaka inamtis ti isis? 8'Yina je jla'am pa Sinia', siuti jla'am ti ta'nase, ka kiak iwo'nase siunie jiwoyeyi. 9'Najanayi siunie jike' napo i'nio' ti ijwilis ti iyo'ate, “'Wanjliyi ka jwamjla'aja ni jijlinkit ni inwakiwa mak titietajaja je iyojliyi ti ijliasat pijia'm.”#1 Co 5.6 10'Wanjliyi kia'iyoyetaja siunie yi'ase, 'yina je sikiwit'ase'm ka k'iejliyeyi'i paka astankiujnieye ka je 'esie ka woyeyi, lapakawo ti po' pak Saka'niona. Jlampet siunapo ti tom'ni ask'ioye, Sinia' je ijiat ka je insa'ak'i, 'yina je i'ye'en paka 'naja'an, ni'ne ka nakaye ni siunie ti lajk'iyipa kawo ti je 'yije'en.
11Jlampet ti ya'am, napo i'lijwas, siut'itie ka kiak iyo ka je iliyi ka iyo yamtikie' ka iyo'ate, “Siunapo i'nio' itienkiuni pi Jesús ti je 'yakakiu, je 'es pet ka kiak je iwoyi ti ja jijwa'al tejwak'iji'n”, ijiate ka tilikietak'i siunie tiwonak'i, sekjane'yi siunie ajwe'el ti Sijwajieti tik'iejwata'a japa cruz ja ká ani'na'tinietieyi. 12¡Awo'ate ti ajwe'el, napo ti je inena'ni 'ate, ka jlamayis jla'am paka iniwonisi ka laja jikianisisie'!
13I'lijwas, asa'am ti Sinia' ta'nase ti iyo ka wo'ate siunapo i'nio' je inkipijnas. 'Yina ká awoye 'ate, “'Esiji, 'nakayi jayoyi siunie awo ka yoyi.” 'Esiji ka emina' napo as'lejwas jla'yi ti janip'elisina' ja kiajatak'i'ni, siuti akiecha insetia'n noyeje kiak jawo'ojyi pet ti a'am janoye'a'm.#Mt 20.26 14'Yina siuniwa Sinia' jlamtis ti tajla'm ni Moisés jika'neyasajnaye, ijwienjli yi'ne niwa ijia, siunie ti iyo'ate, “Emi'n ni akiecha, niwone 'ate ti a'am ti jininemi'n.”#Lev 19.18; Mc 12.31; Lc 10.25-37; Rom 13.8-10 15Joskiyeyi naka, siuti kiak jawoyeyi ti janinokieja, janitejwa'yi.
Siuniwa iyo niwa ts'isienis teje'yi ilia'm ki iyo jana Sinia' jikimet
16Jayo'ate ti jajwi'lase'm: Jla'm ijiate ka kiniets'i ki iyo jana Sinia' jikimet, ja 'nakayeyi ti ja ke ak'iuyeyi siuniwa iyo niwa 'assienis ti inteliajayi ka woyeyi. 17Kajeyepa ti siuniwa iyoyi niwa ts'isienis ti kasteliaja teje'yi ilia'm jana Sinia' jikimet. Siojona Sinia' jikimet kia'iyojlijyi pet teje'yi ilia'm niwaka ts'isienis iyoyi. 'Yina po' siuniwa je yimink'i janaka Sinia' jikimet, kia'iyojliyi ni jikiecha, naka'ne ti it'imina ti je paj ka akajlajyi kawoyeyi siunie 'es ti jlalasa' ka woyeyi.#Rom 7.15-23 18Jak je iyoyiji pit siuti jakiniets'i ki iyo janak Sinia' jikimet, ijiate ja ke aye kiajwe nak Moisés jika'neyasajnaye t'ipi.
19Je istie' siuniwa wask'i'nelaja ti tajle pit ki iyo niwa ts'isienis. Po' napo 'yuyijk'i'ni napo ijia jwa'yis; po' napo iyoyi siunie ti ijiate ti je 'es; po' napo inisayi siuniwa wask'i'nelaja yi' ape'e 'ni ajnat ti ikajyi'n niwa ts'ajwes. 20Po' napo yamisi siunie iyo niwa sisajma'l ti tewitanajak'i pi k'iejliyi ti iyunitis, siu'neje ti yame ti iyo aye'wula. Ne'wajamk'i napo ijia, yimi'n ti iniewiti napo ijia; jla'yi ti elijietas; jijwesi je tojwits'i; takalakijiejne'n; 'yakajyi'n napo ijia ti ijwienjli yita'a. 21Jolsijnietas, 'yatas, jlak je iliatk'iji'n. Po'neje siuniwa ti jwajla'a ti kia'iyo, ti a'yejnap, ti iyoyisi napoka. 'Yejne'n siu'nie jayoyi, iyo'ate siukia awo'nasepi ti pajk'i ti ajwe'el: Napoka siunapo ti kia' iniwone ja ke pajana'a ka 'noyi nak Sinia' jika anechijiayas.
22Jlampet siuniwa tajle janak Sinia' jikimet naka ni inemijnaye ti ijiatk'i, inikanitiejeye, inkamankiye, siu'neje ti je inip'elisin'ni pa ti k'iejlitieje pa ti jiwet'ia iyo; siu'neje ti jlosik po' ni i'nio'; wuj ti takap'ijliuski; jla'yi ti intaj tiwomaja. 23Je initonit pi i'nio'; to'm ilia'm siuniwa inkajejlasayejes ti tajle siunie 'nisie'n iyo pit. 'Yina lajk'ipa ka inka'neyasajnayeja' kanjwe'el ka inta'yi ilia'm 'niwaka. 24Siunapo Sijwajieti Jesús jikawos pet, napoka ti pajk'i ti its'iejwatis pijia'm niwaka siuniwa jikeyis ji'yusis, siu'neje niwa iyoyisi ti itiliajasi ti wuj ti je isis.#Rom 6.3-14; Gl 2.20; 6.14 25'Nakayi siuti janaka Sinia' jikimet ti kasts'isisi, kiak jayoki'ijyi pet 'esiji ka najk'i siunie iyo. 26Wuj ti je 'es ka initonitie; jla'yi ti je 'es ka ani'na'tinitiek'i'ni wita'm; je 'es ka eliyets'i wita'm.
Currently Selected:
Gálatas 5: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.