2 Corintios 12
12
Siuniwa Pablo ti'wenkinaja'm
1Ijiat ti lajtak'iyipa ka inkajliji ni i'nio' ti iniwunit. 'Yina ejlowek lapakawoyi ti janiwuniti ni siuniwa Saka'niona i'winkink'i'm, siu'neje niwa ti ya'am ti yini itieyija'm. 2Ya'am sitiant'ieje ja i'nio' ti ijiate ti je 'yakakiu pa Jesús, 'nak catórceja kiwa itij'w isia'm najkapis ti tokiji ti si'wenkinaja siunie yi'i ni poli ti tomi pijiame niwa poliyis ti najape. 'Yina nak je ts'ajane'ne ka jiwats'oye, ni'ne ka jisiak'ala wek pa ti tikiniejayipe. ¡Sinia' jla'am ti 'yijene pi iyone! 3-4Ekiajlayi'iji ti awo'ate, jlam ti'wenkinaja wek pa Sinia' ji'wet ti 'es yi 'niji sitipe'e. (Najata wek jla'am ti ts'ajane pi awone, jlampet ka tiniayeje wita'm ni'ne ka jisiak'ala wek pa ti tikiniejayipe nak je ts'ajane; Sinia' jla'am ti 'yijene naka). 'Yina sekyi'ipe ti tipechiyeyi siuniwa inamtis ti je tiwenaja'm ka i'nio' 'najane paka wone ka injwele pijia'm.
5Naka ni siunie kiak iyoyi, nak ka iniwunitta ape'e, 'yina jlampet siuti ya'am jeyi ka kiak iniwone ka iniwunit. Najata pet ni siunie awoyi ti lajk'iyi pa ka iyoyi ka poye pa ka ijwiyeja', nak pet ti aniwuniti. 6Siuti kiak jayoyi ti janiwunit, 'yina je ijiuski'la kajeyepa ti jlam je awoyi siunie awoyi. 'Yina je awo ka kia'iyoyi lapakawo ti ja 'nakayeyi ti siunapo i'nio' ja ke inwunit siuniwa ti yamkata ti si'wenkinaja, janiwakatajana'a jla'am siunie awoyi, siu'neje niwa amtiyi ti i'yenis. 7Siuti Sinia' je iyojonk'iye ka iniwuniti niwak siuniwa ti isis ti jla'am ti i'winkink'i'm, sekyi'i'ne ti iwink'i'm siu'nie iyo ni iwit'ia ti anilayiti ti iyot'i 'ate pa k'itie'n ti 'yita'm ni 'najwes, 'yiniye ka sitiejiejwa imosik intajle ka jlam kiak iwonk'i.
8'Yina 'nakayi najapejayiji ti 'altaja'ni pa Saka'niona ka inla'n itipe'e siunie ijliak'ali, 9sekyi'i ti kiak iyonk'i 'ate, “Siunie ikap'ijliuskiye e'na'm 'etsaka. Jlampet siunie ijwiye 'yaka ti yiji naka ti laj jijweyeja'.” Jak je iyoyi ni siunie inikanitieyi atajlaja'm naka ni siunie awoyi ti laj it'iuniye, jak je iyoyiji pet siunie jijweye ni Sijwajieti jane'yi itipe'e. 10'Yina awo'neje 'ate, inikanitiejeye yiji ti kiak awoyi laj it'iuniye, siu'neje ti ajyi naka ti siliakik, siu'neje ti po' jana jloma ti lajk'iyi pa ka k'iejliyeyi paka i'wi'in, siu'neje ti po' napo ti teje ijyilia'm, siu'neje ti akk'i pi Sijwajieti ti ijiate ti istie' ni i'niayi. 'Yina siupet ti kia'iyo ti laj ijwiyeja', sek tajla'aja pet ni ijwiye ti Saka'niona iwink'i'm.
Papok it'imina Sinia' jilis yi' Coríntojo ti jijliak'ali po' pa Pablo
11Asa'am ti jit'iminak'i siunie aniwone ti awo'ate ni 'ne'lia. 'Yina ijiate ti 'yuta'ase'm ka sijwela' siukia iyopi ki aniwone ti 'es ti akijme'n ti aye aska kiowe'e. 'Yina ejlo'owek ti je woye ijiaye, ti jijwela je awo'ate ‘siunapo injlojwajnas’ ti jlonitie ka ijiatayiji. 'Yina ya'm ijiatataja wek ya'am ti aka'm ape'e napoka. 12Kajeyepa siukia isijmaye ti ijiate ti anilayiti ti awoyi, siukiwa ti tenajapi pi k'iejliyi, siu'neje niwa ti inesi'lietak'i ti ji'wenayeta, niwak sakajanit ti ya'am ti ijiate wek ti injlojwanikk'i'm. 13Ijwienjliyeta siunie it'imina ti siunapo Sinia' jilis 'neje ti 'yakama'yi astepe'e, naka ti po' siojokia iwinisk'i'm ti ijiutis'ni wita'm its'ioye, 'yina je awojonk'iye ka iyoye ajlokiek'i'm ti ya'am. ¡Siuti janakaye ti jet'i jleminak'i, 'yina ká awoyeyijna'a itisa', anip'elisi'niase!
14Siwakal ti nak jajiojwi ti jajio'wase, nak ja najapajayiji ti jajio'wase. 'Yina je alek'i siu'nie awoyi ti je woyeyi asjlokiek'i'm. Je naka ka iyojyin'ni siuniwa ji'wena, ja 'wenayeyi ti asa'am ti jayoyejyi'n. ¿Tepi iyo ni i'nio' ti jilis po'? Jla'am ti ijliak'ajlap'ni napo jilis, iyojyi'n pa ka 'esieyi napo jilis. 'Yina je ka napokaye napo jilis ka injlak'ajlap'ni napo jiniewot, ka iwojyi'n pa ka 'esieyi. 15'Yina lapakawo ti ya'am ti talk'i siunie jayoyi ti jatij'we ti jawin'ni niwa isijmatis 'niwa a'we'en, lapakawo ti emina'. Paj ka kia'iwoyeyinie'e pet ti ya'am siwakal ti janitejwe'e astepe'e, 'yina naka ti ja'nesieyi. Ejlo'owek ti je seminayeta, siupet ti ya'am wuj ti awojon ask'ioye kajeyepa ti ts'ama'ase.
16Ekiajlayi'i ti awo'ate, jeyi ka kiak iniwone ka iniwone asjlokiek'i'm. Jlajmiliet ti po' napo ti ijwil ka jla'am iliakiye ka ijia'lase japa aska wikiniet'aj. 17¿Ent'a jijwela ka napoka iyoyi jiwosa' siojopo nak ajlojwi'nijpe ka jla'am iliakiye? ¡Jeyi kat'aja! 18Tito jak 'ejie'nepe ka ijno'wase ti jla'yi ja jikiecha sikiecha. ¿Ent'a Tito jak jla'm ijiate ti inlakiye t'eyi? ¿Ent'a kaskakiuk ti sa'am siu'nie sitienkiujnieye siu'neje na sikijmaye ti ijwienjlik'i?
19¿Ent'a jijwela ka pajak'i ka iyojonk'iye ka kasijwela ka kasts'isis? ¡Je'e, je kia'iyo! 'Wenajliyi ti enaja jitieyi'i pa Sinia' siuti kiak iyo akamtijniena, siu'neje ti sa'am ti Sijwajieti jikawosts'e'm. I'lijwas ti yimijna'yase'm, lapakawo ti wikie'eyi niwaka janakaye ti janoye'ase'm ka ineki'n siunie jiwoyeyi. 20Sikiwit'ase'm ka siuka nak ijiojwi, ka i'wina ka je iwo'ate siukia iyopi ti ajonitie. Jla'am pet ti ka si'wena ka je iwo'ate siukia awoyipi ti sonitie. Sikiwit'aseme ka ayets'i wita'm ti janawita', ni'ne ka nijnolsinayi paka k'iejliyeyi, siu'neje ni aswak ka ena'yasap, siu'neje ti jijwela napo a'lejwas ti je 'es siupi iyoyi, siu'neje ka nitonitiejyi'n siu'neje ka je inkaja siupa ka woyeyi. 21Siu'neje ni sikiwita kayiktana'a ka ijio'wase siupi Inia' ka iwo'ate, “'Yejne'n siunie iyoyisi, ijiat ti je 'es wata'a.” 'Yina siuti kiak jawo sek jane'yi ti ja wujwa ti ja ts'ajwel'ni ti ja ts'ajwe'lase, siu'neje ti itiet t'e' jatiojnate'n k'iye napoka siunapo je t'ekiyi naka ni jloski'la ti iyoyi. Kajeyepa ti je iyoyiyi ka inleyisi naka'ni ti ti'niachiki, jla'yi ti je iliyi ti iyoyi naka ti 'yuyijk'i'ni napo ijia jwa'yis, siu'neje niwa jikeyis ti iyoyi.
Currently Selected:
2 Corintios 12: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.