MATIYE Kalge ɓil kefder seno
Kalge ɓil kefder seno
Matiye yer diŋ Wããre ma de Cõõre mani Yeso no. De maga Yeso hay ti tamsir la caw ɗa, wããre maga á wãɗ ra, joŋre maga á joŋ ra mo deŋ ɓuy wo diŋ ma kaŋ nen naa ga Baa da naa. De maga Yeso huu go, Baa fer go birgi ɓe blam sen caw pa, Baa joŋ sen diŋ ma kaŋ nen naa go ti ɓe ga á diŋ je ma tenen caw ga kol jar ma de húulí wo go tenen blam húulí ɓaara tiʼ lay diŋ se.
Á joŋ sen diŋ ma ɓoʼ faage wo go ne re ma pele. Ɓil kefder Baa le ti Tayge jag ma Taŋgun, wããre maga de wããge ti Yeso, bay laa wer doo jar ɓuy wa. Wããre yaŋ de wããge ti Yeso wer sar sar day laa wer go poɗag lay diŋ ɓil kefder Wããre ɓe ma de Cõõren wo ane, kefder sen wo naa. Wosela ɓuy yoo jar yer kefder sen wo mo taʼ wãã wããre ti joŋre maga Yeso joŋ ne, hadge maga á had jare, húulí ɓe maga á huu day se bir le go tenen caw, diŋ de faage ma ɓe. Matiye kaŋ nen jar diŋ ti maga Yeso diŋ Je yãã jar se maga Baa hay wãã ga se ɓoʼn yaŋ le mono. Day Baa ɓoʼ jag wããre maga á siin ɓil kefder ɓe ma taŋgun go diŋ de ɓe so. Wããre se ma de Cõõre bay diŋ ma jar Jwif wo tawa wa, ga á wo diŋ jar se maga Yeso biŋ ni ɓaara ni, day se hay caw yoo ɓaara ni lay la wa. Wããre se ma de Cõõre diŋ ma jar ma ti tamsir la wo krub ɓuy.
Wããre ma de Cõõre mani Yeso maga Matiye yer ne wãã diŋ ti re po go de ngaɓ ge taʼa. Á sii taŋgu ɗa diŋ ɗúu moore Yeso wo de biŋgi ɓe (1.1—2.23). Blam sen á wãã wããre ti Jaŋ ma joŋ batem jar ga nduu go taŋgu pel bol siɗ wããre ti Yeso mono (3.1-12). Yeso tĩĩ wer joŋre ɓen go tinoo pel jar poɗag ɓuy diŋ wur maga Jaŋ ma joŋ batem jarn yog ne mono. Manhúulí kal rawge de ɓe ti puuli jãɗge (3.13—4.11) Blam sen ni tuu pa, wããre se maga Matiye sii ne, kããge ɓe wo boŋ kaʼ diŋ ti joŋre maga Yeso joŋn le ɓi sir Galile ga se sii wããre Baa ne ngaɓan ni, had ra, pẽɗ jar cege wo go lay mono (4.12—18.35). Blam joŋre ɓe se ma ɓi sir Galilen ni tuuseŋ pa, diŋ raŋge ɓe maga á taw ti go de ɓe la ga á ur Galile raw Jerusalem mono (ma kluuri 19—20). Lan diŋ naw bon ɓe ma renam maga á daʼ húulí ni, fer le go kalge ciŋ tenen caw ndar nen see ɓe go ne jar ma wer ɓen wo mono (ma kluuri 21—28).
Yeso bay nen Matiye diŋ Je yãã jar go tawa taw tuu wa. Ama diŋ je had jar de wããre Baa, ɓoɗ wer ɓe go ne hara lay. Á joŋ sen diŋ wer maga Baa a ge hayge Waŋ jare ga diŋ Waŋ ma kluun ɓuy lay mono. Hadge maga Yeso had jar mo deŋ, daŋge wããre maga á had jar de ɓe de siɗgi wer taɗ taɗ dwee : ma taŋgu diŋ wããre maga Yeso siin ne jar ciŋ ti húulì (ma kluuri 5—7) wããre maga á tĩĩ wer sii wããren de ɓe wãã diŋ ti jar maga wo go de hã ɓil ɓaara seege wer wããre maga Baa bag ne jar maga wo de yããge ɓe Waŋ ɓaara mono.
Ma de ɓog ɓen diŋ wããre maga Yeso kaŋ nen jar peele ɓen wo ni ti maga á laa ra wo siɗ wããre ne jar mono (ma kluuri 10).
Ma de swaʼ ɓen diŋ jagjõõ maga á wãɗ ra ti lagge jar ti Twaywaŋ mani ɓen mono. Jagjõõ sen kaŋ nen jar ti re ɓe ma de yoŋre no : á de yoŋre patala, ama á joŋ ge blum yaŋ go tinoo poɗage (ma kluuri 13).
Ma de naa ɓen diŋ wããre maga á kaŋ nen jar ma wer ɓen wo ti ɓe ga á mo koɗ wo see ɓaara se kããra de el mono (ma kluuri 18).
Ma de dwee ɓen diŋ wããre ma blam taw no, sen wãã diŋ ti re maga nduu gi wo wurpo pel bol ma kaŋ nen jar ti kaŋge Twaywaŋ mani Baan yoo jar ɓen wo mono. Lagge maga jar ma wer Yeson mo lag wo go de pũygi, lan diŋ wããre maga á siin ne hara ga á mo ko wo el hẽẽre ɓaara maga á go de tob rage, ma kluuri (24—25).
Currently Selected:
MATIYE Kalge ɓil kefder seno: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.