MATIYE 6
6
Yeso de had jar ti re hãge fẽẽre ne jar coo wo
1Koɗ we see ɓay de ele, joŋ we de el ɓayn diŋ nen jar ga á mo ko wo nday koɗ wa. Hayga nday yaŋ joŋge diŋ ga ko nday no, ni nday daʼ ge poɗge le doo Pan ɓay ma ciŋn gà.
2Wersen, ndo leʼ hã solay we ne je coo no, hãn ne hẽn nen maga jar mo kon wa, joŋ we doo jar bag bii jarn joŋ wo ɓi tiŋ tosge wo de jeŋ faage no wa, á joŋ wo doosen maga jar mo togoɗ wo saara, kidolgi ndi de riŋ nday ga á daʼ wo poɗge ɓaara we go diŋ sen no. 3Ama ndo leʼ we hã solay ne je coo no, hãn ne hẽn nen maga koh bar ɓo ma ti nen ɓo draʼ mo kon wa, 4maga hãge sen mo hay de yoŋre, day Pan ɓo maga de ko fen maga ndo de joŋge ɓe de yoŋre, poɗ mo yaŋ ti ɓe.
Yeso de had jar de tosge
(Lug 11.2-4)
5Nday leʼ we tosge no, joŋ we doo maga jar bag bii jarn joŋ wo no wa. Jar sen da wo tos ge ti deele ɓi tiŋ tosge wo de jeŋ faage, maga jar mo ko saara. Ndi de riŋ nday kidolgi ga á daʼ wo poɗge ɓaaran we go diŋ sen no. 6Ama ndo leʼ we tos ge no, kal tiŋma ni ɓo, tẽg jag tiŋ ti ɓo, ma tos Pan ɓo Baa de yoŋre ti ngel sen ni, day Pan ɓo Baa maga de ko moge joŋ re se de yoŋren, poɗ mo yaŋ ti ɓe so.
7Nday leʼ we tos ge no, wãɗ we wããre ngaɓa debaŋ doo jar maga bay wo ti jag Baa wa joŋ wo no wa, á ɗig wo ɓaaran ga Baa laa tosge saaran diŋ wer wããre saara ma ngaɓa ngaɓa no. 8Joŋ we doo saara no wa. Pan ɓay ma ciŋ go de ko fen maga nday de sãy ɓe ti taŋgu maga nday bay wii gi ɓe ɗa mono. 9Ama nday leʼ we tos ge no, tos we ga :
Pan wùr ma ciŋ no,
Daga jar ɓuy mo ko ɗúu ɓo ga ndo diŋ Baa boŋ,
10A le hay Waŋ wùri,
Daga jar mo hay joŋ fen maga ɓil ɓo dan gesiŋ la doo ma ciŋ no lay.
11Hã rege ne wùr ti naw tum,
12Fug ɓil go ne wùr ti,
doo ga wùr fug ɓil go ne jar maga joŋ wo wùr de ɓlagge ti no lay no.
13Men wùr woge nen re ma de raw egre wùr wa.
Yãã wùr go doo je jãɗ jar no.
[Werga Waŋ diŋ ndo, je egren diŋ ndo, ndo nen togoɗge wo hãã tum ɓuy. Amen.]
14Wersen hayga nday yaŋ fug ɓil go ti ɓlagge maga jar joŋ wo nday de ɓe no, ni Pan ɓay ma ciŋn fug gi ɓil yaŋ go ne nday ti lay. 15Ama hayga nday bay fug ɓil go ti ɓlagge maga jar joŋ wo nday de ɓe wa no, ni Pan ɓay ma ciŋn fug gi ɓil go ne nday ti gà has lay.
Yeso de had jar de re hẽẽ ge bii
16Nday leʼ hẽẽ bii we no, joŋ we see ɓay doo jar bag bii jarn wo no wa. Á pud wo nen ɓaara go ga jar mo ko saara ga saara de hẽẽ bii, kidolgi ndi de riŋ nday ga á daʼ wo poɗge ɓaaran we go diŋ se no. 17Ama ndo leʼ we hẽẽ bii no, yog nen ɓo go, crog ti ɓo go, 18nen maga jar mo ko wo ga ndo yaŋ hẽẽ bii wa, mo hay de ko moge hẽẽ bii se de yoŋren diŋ Pan ɓo Baa tawa, day Pan ɓo Baa maga de ko fen maga ndo de joŋge ɓe de yoŋre, poɗ mo yaŋ ti ɓe.
Jar ma wer Kris daɗ wo horog ɓaaran yaŋ wo ciŋ
(Lug 12.33-34)
19Tay we horog diŋ ti tamsir la wa, werga gesiŋ la gogo wo de daʼ ge way ɓlagn wo go, jar freŋ mbug wo tiŋ go ne hẽn ti day horge wo ne go de koɗ koɗe. 20Ama tay we ti horog ɓayn wo go diŋ ti ngel ma ciŋ ga gogo wo de daʼ ge way kãã wo ma ɓlagge ɓe go gà jar freŋ kãã wo ma mbug tiŋ ne hara ti horge go gà mono. 21Werga ngel maga horog ɓon wo wo ni mono, ɗiggi ɓo joŋ wo de kaŋge ni lay.
Nen jobo diŋ gér ma ler ngel go ne see ɓe ti
(Lug 11.34-36)
22Nen jobo ɓuy diŋ gér ma ler ngel go ne see ɓe ti. Hayga nen ɓo yaŋ wo go de el no, hõõgese ɓo ɓuy joŋ go de lerge lay. 23Ama hayga nen ɓo yaŋ wo cee moge no, hõõgese ɓo ɓuy joŋ de suŋgu. Hayga gér ma ɓil ɓon bay go ler ngel poɗag wa, ni suŋgu sen joŋ ge de tàabay debaŋ lay.
Baa wo de gee horogre
(Lug 16.13)
24Waŋre ɓog, jobo boŋ joŋ wejõõ ɓaara ɓuy gà hayga á leʼ we ga se joŋ mbe ni no mono, á raw caa hee de ma baapo boŋ, da lan lay, hoo sug ti maapo boŋ, mbuɗ foo ma lan go lay. Nday kãã ma hã ɓil ɓay ne Baa lay, ne solay lay ɓog ɓuy gà.
Yeso ga wosela mo kaŋ ɗiggi ɓe diŋ ti Baa
(Lug 12.22-31)
25Ndi de riŋ nday, hãy we see ɓay go ti re maga nday ɗig ga nday re ge may ma lagge tenen la, nday jo ge may ma lagge tenen la, nday laa ge may se ti ɓay la wa. Nday de see ɓay, nday de daŋ rege, hõõgese ɓay de daŋ õõbe, nday de koge ɓe doosen no lay. 26Ko we dweere maga wo de pud gi ciŋ mo deŋ ɗa la. Á bay wo kab mopo wa, bay wo we mopo wa, bay wo tay ti mopo ɓi boole wa lay, ama hã rege ne hara diŋ Pan ɓay Baa. Day nday de daŋ dweere wo yaw. 27Wose yaŋ yoo ɓay la ga kãã yaŋ ma yaʼ naw ɓen wo ciŋ pel ni meʼ draʼ de joŋre ɓe maga se durn de see ɓe la?
28Day wer may ga nday hãy see ɓay go ti õõbe wo la? Ko we fuɗgi saŋgu ma ti puuli wo ɗa. Á gẽẽ wo bay wo ma joŋ mopo ne jobo wa lay, bay wo ma ɓoʼ õõbe po wa lay. 29De sen ɓuy ndi de riŋ nday ga hay bo Salomoŋ de gragge ɓe ma de wooren ɓuy, woore õõbe ɓen bay de day ge go doo woore fuɗgi maapo yoo ɓaara no boŋ wa. 30Hayga fǐiri maga á daʼ ra wara ɓi tway, toŋ à wo go lag rage go ti wùu tuu tuu, Baa de joŋ fuɗgi ɓaara de woore debaŋ yaw no, ni se go tinoo cwãy ga Baa lag ge õõbe ne nday ti daŋ fǐin wo yaw, nday jar se ga nday bay go de hã ɓil ɓay go ne Baa pah wa mo lag no. 31Hãy we see ɓay ga : Naa wo ge re may la? Naa wo ge jo may la? Naa wo ge laa may ti naa la wa. 32Kiɗ fẽẽre sen wo mokay tum tum diŋ jar maga bay wo ti jag Baa wa mono. Ama ma ɓay, Pan ɓay ma ciŋ go de koge ga nday de sãy fẽẽre sen wo ti. 33Kiɗ we twaywaŋ mani Baan go taŋgu ɗa, hay we seege de deele doo ga Baa da ga à mo hay seege no mono, ni à hã fẽẽre ma lan wo yaŋ ne nday ɓuy lay. 34Wersen hãy we see ɓay go ti naw ma toŋ wo wo wa. Toŋ mo ɗig mbe ti see ɓe diŋ se lay. Nawn wo ɓuy mo soɗ mbaara põõre ɓaaran diŋ saara de see ɓaara.
Currently Selected:
MATIYE 6: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.