MATIYE 23
23
Yeso ga jar mo koɗ see ɓaara doo jar ma ndar wer wããre Baa wo de Farisiyẽẽ wo
(Mark 12.38-39; Lug 11.43,46; 20.45-46)
1Yeso raw riŋ ngaɓan wo de jar ma wer ɓen wo ga : 2Jar ma ndar wer wããre Baa wo de Farisiyẽẽ wo diŋ jar ma kaŋ nen jar ti jag liŋgi mono. 3Wersen yãã we jag ɓaara, joŋ we fẽẽre maga á siin wo ne nday mo ɓuy, ama joŋ we doo ga á joŋ wo no lay wa, werga à bay wo joŋge diŋ fẽẽre maga á siin wo go de jag ɓaara mo hãʼ wa. 4Á saɗ wo fẽẽre ma de põõre ne jar bay, ama á wo de see ɓaara day wo kay rage maŋ wer põõre sen wo ne hara ciŋ de wedoo ɓaara boŋ draʼ gà. 5Joŋ wo re ɓaaran diŋ maga jar mo ko saara. Á sãɗ wo wããre Baa ɓi gàne, saɗn wo pel ɓaara, saɗ wo doo ɓaara, biŋ wo jag õõbe ɓaaran fĩĩfĩĩ. 6Da wo lagge ti ngel hayle ma de woore ti ngel maga à ɗe jar we re hoole ni ngaɓa, de paale ma peln wo ɓi tiŋ tosgen wo. 7Da wo ga jar mo her jag ne saara de horge sug ti ti ngel lumo, da wo ga jar mo ɗe saara ga jar ma pel jar had jar wo. 8Ama ma ɓay men we wosela ɗe we ge jar ma pel jar had jar wa, werga je had nday yaŋ boŋ, nday ɓuy nday diŋ hẽẽre kããra. 9Ɗe we jobo gesiŋ la ga Pan ɓay wa lay, Pan ɓay yaŋ boŋ, diŋ je maga le ciŋ mono. 10Men we jobo ɗe we ge waŋ ɓe wa, waŋ ɓay yaŋ boŋ, diŋ Mesi. 11Je kluu ma pel jar yoo ɓay mo kol see ɓe go diŋ wejõõ ɓay. 12Je maga yaŋ maŋ ti see ɓe ciŋ, ga riŋ ga se, fer ge ti go gesiŋ so yaw. Je maga yaŋ fer ti see ɓe go gesiŋ depẽẽre joŋ ge diŋ je ma pel jarn so yaw.
Yeso ruu jare
(Mark 12.40; Lug 11.39-52; 20.45-47)
13Re ti ɓay, jar ma ndar wer wããre Baa wo. Re ti ɓay Farisiyẽẽ wo lay, nday jar bag bii jar no. Nday tẽg faage go ne jar maga da wo ga saara wo laage ti twaywaŋ ma ciŋ mono, nday de see ɓay nday laage ni gà lay, day nday bay men faage ne jar maga da wo laage ni mo wa pa.
[14Re ti ɓay nday jar ma ndar wer wããre Baa no, de nday Farisiyẽẽ wo, nday jar bag bii jar no. Nday yãɗ fẽẽre ma doo naare dwur wo go ɓuy, blam sen nday raw ig gi tosge wolaŋ wolaŋ maga jar mo riŋ ga nday de el ane, ama á poɗ ge nday yaŋ de bon ma de hãã debaŋ.]
15Re ti ɓay jar ma ndar wer wããre Baa no, de nday Farisiyẽẽ wo, nday jar bag bii jar no. Nday raŋ sir wo go ɓuy de maarog wo maga nday mo daʼ jobo ma yãã wããre ɓayn boŋ tõʼ ɗa la, nday wo we daʼ ge ɓe mo pa no, nday raw kolge ɓe go de ɓlagge de hãã daŋ we ge, kaŋ wer ɓe go nen wùu maga huu gà daŋ we ge pa yaw.
16Re ti ɓay, nday jar rẽwre ma pel jar no. Nday wãɗ ga : Jobo haʼ we de tiŋ Baa no, haʼge sen joŋ mopo gà. Ama Hayga á haʼ we de boo biŋni ma de boo tiŋ Baan no, ni haʼge sen diŋ haʼge ane. 17Nday jar se de loɗge no, jar rẽwre wo. Ma de daŋ kẽẽ diŋ ma honla? Boo biŋnin yaw, noga diŋ tiŋ Baa ma kol boon de el mo yawla? 18Nday wãɗ pa ga : Jobo haʼ we de ngel ma siɗ jag no, haʼge sen joŋ mopo gà ama Hayga á haʼ we diŋ de fen maga á ɓoʼn ti ngel sii jagn mo tiʼ no, ni haʼge sen diŋ haʼge ane. 19Nday jar rẽwre no. Ma de daŋ kẽẽ diŋ ma honla. Fen maga à hãn sii jag mo yaw, noga diŋ ngel ma sii jag ma kol fen sii jagn go ma Baa mo yawla? 20Wersen je maga haʼ we de ngel ma sii jagn mokay, haʼ de ngel ma sii jagn de fẽẽre ma ti ɓen ɓuy. 21Je maga haʼ we de tiŋ Baa, haʼ de tiŋ Baan de Baa maga de hayle ɓil tiŋ ɓen ni mo ɓuy no. 22Wosela maga haʼ we de ngel ma ciŋ, haʼ de paale mani Baan de Baa ma de hayle ti ɓen ɓuy lay.
23Re ti ɓay nday jar ma ndar wer wããre Baa wo de nday Farisiyẽẽ wo, nday jar bag bii jar no. Nday de hã ma de hwal fẽẽre ɓayn wo go ne Baa se sug nee ɓayn wo, doo bremcẽẽre, neecããne wo de luuri wo. Ama nday raw men hadge ma kluurin ga wããre maga Baa de had jar de ɓe wo go, doo joŋ ge re de deele, joŋ ge de el se jar wo de hãge see go ne Baa, nday men sen wo go. Mokay diŋ maga nday hay nen joŋ rage, de lan wo ɓuy lay no. 24Nday jar rẽwre ma pel jar no. Nday ɗig bii ma joge ɓayn wo go ga kwãy mo hay ni wa, ama nday kal lig manyoŋyoŋ.
25Re ti ɓay nday jar ma ndar wer wããre Baa wo de nday Farisiyẽẽ wo, nday jar bag bii jar no. Nday yog faale hããre ma jo bii wo go de faale hããre hoolen wo, ama ɓil ɓay go de bagge de fẽẽre freŋ ɓayn wo, de dage fẽẽre ɓay ma de hram mono. 26Ndo Farisiyẽẽ ma rẽw no. Yog ɓil hãn go taŋgu ɗa, ni faale ɓen kol mbe yaŋ go de el lay.
27Re ti ɓay nday jar ma ndar wer wããre Baa wo de nday Farisiyẽẽ wo, nday jar bag bii jar no. Nday de maŋ tipaale maga wo go de korge de woore depiiri kaʼ kaʼa, ama nen ɓil ɓaara saara go de bagge de hm jar ma de húulí wo de see ɓaara ma de budgin wo ɓuyn. 28Nday doosen no lay, go faale ɓay la, nday ko nen jar de ele, ama nen ɓil ɓay, nday bay de hã ɓil ɓay ne Baa wa, ɓil ɓay go de bagge de ɓlagge mbaŋ mbaŋ.
Yeso ga jar ko decoo yaŋ jag bon debaŋ
(Lug 11.47-51)
29Re ti ɓay nday jar ma ndar wer wããre Baa wo de nday Farisiyẽẽ wo, nday jar bag bii jar no. Nday bor tipaale jar ndar nen wããre Baa go wo de woore, nday yer se tipaale jar maga hay wo yãã jag Baa ti ngel ɓe wo, 30nday wãɗ pa ga : Hayga nday mo hay we le diŋ nen kiŋgi mani pããre ɓayn wo le, nday de hay joŋ doo saara ga id wo jar siɗ wããre ma jag Baa wo go mo gà. 31Wersen nday ko see ɓay we ga nday diŋ weere mani jar maga id wo jar ndar nen wããre Baa go wo le. 32De ele. Patala see we taw joŋre maga pããre ɓay hay tĩĩ wo wer ɓe le go so. 33Nday diŋ cwere wo, weere yee wo. Nday daŋ ge re ma woge de ɓay nen wùu maga huu gàn go mokay ge daŋ ge la? 34Wersen coʼ we sug ɓay, ndi laa ge jar ndar nen wããre Baa go wo de jar ma de ko re wo, de jar ma ndar wer wããre Baa yaŋ wo le we. Nday wo ge yaŋ id jar po wo go, nday ɓal jar po wo yaŋ go ti koo ma ɓal jar wo, nday jwag maapo wo yaŋ de mbreŋ ɓi tiŋ tosge ɓayn wo, nday maŋ ge blam ɓaara yaŋ joŋ bon ɓaara ɓi leege ma honla honla ɓuy. 35Wersen bon ma ti jar maga id wo jar maga joŋ wo re gà go, tĩĩ wer le ti Abel je ma de deele hãã go ti Sakari, wel mani Baraci maga nday iin go ti yoo tiŋ Baa wo de ngel siɗ jagn mono. Re bon sen leʼ ge ti ɓay so. 36Kidolgi ndi de riŋ we ge ga bon ma ti jar maga id wo jar sen wo go mo deŋ leʼ ge ne jar ma waran wo ti ɓegdeʼe.
Yeso law jar Jerusalem wo debaŋ
(Lug 13.34-35)
37Jar Jerusalem, jar Jerusalem, nday jar maga nday id jar siɗ wããre ma jag Baa wo go mono, nday id jar maga Baa lag ra le see ɓay wo go de húulí. Ndi hay da debaŋ ga ndi tay jar ɓayn wo le see ɓi doo ga man kag tay weere ɓe wo graŋ ɓe nono, ama nday laa dayge gà. 38De ele, jobo gwaʼ ge ɓi tiŋ ɓay ni gà so has. 39Wersen, ndi de riŋ we ge ga : Tĩĩ wer patala, nday ko ge nen ɓi gà so hase, hãã go ti wur maga nday wo ge wãã ge ga : Daga Baa mo wo je maga le de a ge ti jag Waŋkluu mo caw no mono.
Currently Selected:
MATIYE 23: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.