MATIYE 21
21
Yeso kal ɓi leege Jerusalem
(Mark 11.1-11; Lug 19.28-40; Jaŋ 12.12-19)
1Á wo wo a ge se Jerusalem mbaŋ mokay, á kal wo day ge ɓi leege Betfaje, ciŋ ti húulì maga koore Olif wo ti ɓe mono, Yeso raw laa Jar ma wer ɓe wo wo pel ɓoge. 2Á raw riŋ rage ga : See we wo ɓi leege maga wo pel ɓay ɗegere, nday wo yaŋ daʼ wel gerhẽẽ de saʼ ge ɓiŋ man ɓe, ni nday pog we ra, á we le de ɓaara me. 3Hayga jobo wii jag ɓay we ti ɓe, ni nday riŋ we je sen ga : Waŋkluu de sãy ɓaara ti, ni á men wo nday yaŋ rawge de ɓaara tuuseŋ.
4Wããre maga je ndar nen wããre ma jag Baa go hay go de yerge ɓe ga :
5Riŋ jar ma ɓi leege Siyoŋ wo ga :
Ko we nen ɓay waŋ ɓay yaŋ le a ge ni ɓay.
A desãy debaŋ, á de ɗiigi ti man gerhẽẽ,
De ɗii wel gerhẽẽ, wel man gerhẽẽ.
Re sen mokay raw leʼ ge go ti jag ɓe so.
6Jar ma wer ɓen raw wo joŋge doo maga Yeso riŋ ra nono. 7Á raw wo age de man gerhẽẽn wo de wel ɓe no, raw wo lag õõbe ɓaaran wo ne hara ti, Yeso raw ɗiigi ɓe. 8Jar debaŋ raw wo blar õõbe ɓaaran wo ti faage, jar ma la car wo sug koore lag ra wo ti faage lay. 9Ngaɓa ma pel Yeson wo de ma blam ɓen ɓuy ngar wo jag ga : Naa togoɗ moo Dafid no. Da ga Baa mo wo je maga de age ti jag Waŋkluu mo caw no. Naa mo togoɗ Baa ma ciŋ no.
10Yeso wo kal ge Jerusalem mokay, jar ma ɓi leegen ɓuy raw wo hoo temge, raw wo wiɗ kããra ga : Ɓa je sen mo caw diŋ wo ɓa? 11Ngaɓan raw wo wãã ge ga : Á diŋ Yeso je ndar nen wããre ma jag Baa go ma Nasared ma ɓi sir Galile no.
Yeso kal ɓi tiŋ Baa
(Mark 11.15-19; Lug 19.45-48; Jaŋ 2.13-22)
12Yeso raw kalge ɓi tiŋ Baa, raw niɗ jar trere maga á wo yeɗ fẽẽre ɓi tiŋ Baa wo wo go, raw srog taabul jar cor solay wo wo go, de paale jar yeɗ kurgudun wo go gesiŋ. 13Blam sen á raw riŋ rage ga : à go de yerge ga : À ɗe ge tiŋ ɓin ga tiŋ ma tosge, ama ma ɓay nday raw kolge ɓe go diŋ tiŋ ma yoŋ jar freŋ wo le la?
14Jar rẽwre wo de jar leŋre raw wo yaʼge see Yeso ɓi tiŋ Baa ni, á raw kol rage go de el de ele. 15Waŋre jar siɗ jag wo de jar ma ndar wer wããre Baa raw wo sõõ ɓil ne Yeso ti wer maga á ko wo fẽẽre mbuɗgi maga á joŋ ra mo deŋ no, wer weere kleere maga ngar wo jag ɓi tiŋ Baa ni ga : Naa togoɗ moo Dafid no, naa togoɗ moo Dafid no mono. 16Á raw wo riŋ Yeso ga : Ndo yaŋ mbo laa ngar jag maga á wãɗ wo mo deŋ yawla? Yeso raw riŋ rage ga : Ãã, wããre ma de yerge ga : Ndo had kamliiri wo de weere ma ti pãã wo togoɗ moge, nday jaŋ sen ti boŋ gà yawla? 17Blam sen á raw men rage go, kal rawge nage wo go ɓi leege Betani.
Yeso faɗ gum po go
(Mark 11.12-14,20-24)
18Toŋ ɓe de jag toŋ de maga á wo fer ge le ɓi leegen mokay, koŋne raw cee Yeso. 19Á raw ko gum wo ti jeŋ faage kaʼa, se raw woge see ɓe, wo daʼge diŋ sug ɓe tawa, á raw wii gum ga : Ndo leʼ ge ge gà so hase. Gumn raw hig gi go doo ni ɓuy tuu. 20Jar ma wer ɓen wo wo koge ɓe mokay, á raw wo ngrisgi debaŋ. Á raw wo wii Yeso ga : Gum raw higgi go deparday tuu wer may la? 21Yeso raw riŋ rage ga : Kidolgi ndi riŋ nday, hayga nday yaŋ de hã ɓil ɓay me, nday bay we faɗ ge ɓil ɓay wa no, nday kãã ma joŋge diŋ re maga ndi joŋ gum mokay tawa koɗ gà ko nday mo wii bà húulìn mo kaʼ ga : Naa le go, wo go leʼ ge nen maarog no, á joŋ ge doosen nono. 22Hayga nday yaŋ de hã ɓil ɓay me no, nday kãã ma daɗ fẽẽre maga nday wiɗ ra de tosge mo ɓuy lay.
Jar ga wose hã egre sen ne Yeso mo la
(Mark 11.27-33; Lug 20.1-8)
23Yeso raw kalge ɓi tiŋ Baa had jare. Waŋre jar ma siɗ jag wo de jar kluuri jar Jwif raw wo yaʼge wii Yeso ga : Ndo joŋ fẽẽre sen wo mo deŋ diŋ de egre ma wo ɓa? Wose hã egre sen mo ma joŋ rage ɓa? 24Yeso raw ga : Ndi wii jag ɓay ti mopo boŋ lay, hayga nday fer wããre we me ti ɓe, ni ndi riŋ we yaŋ ti egre maga ndi joŋ fẽẽre sen wo de ɓe mo lay. 25Wose ɓoʼ Jaŋ le joŋ batem jar mo ne? Diŋ Baa yaw, noga diŋ jar téebeere wo? Ama á raw wo faa kããra ga : Hayga naa wãã we la ga ɓoʼ Jaŋ le diŋ Baa, á kal riŋ naa ga wer may ga nday yãã wããre Jaŋ gà la? 26Ama naa wãã ge ga ɓoʼn le diŋ jar téebeere wo gà pa, doo hẽẽne jar ɓuyn, werga jar ɓuy de ɗiggi ga Jaŋ diŋ je ndar nen wããre ma jag Baa go lay. 27Blam sen á raw wo fer wããre ne Yeso ga : Wùr ko gà. Yeso raw ga : Ãã, de ele. Ndi de see ɓi, ndi kãã ma riŋ weege ti egre maga ndi joŋ fẽẽre sen wo de ɓe mo gà lay.
Jagjõõ ma de ngaɓge de weere ma ɓog wo no
28Yeso raw riŋ rage ga : Nday ɗig ti wããre ma kay gahãyla? Jobo, weere ɓe ɓoge, á raw ɗe wel ma kluun ga : wel ɓi no, see wo joŋ joŋre me wara ɓi pay tlalum ɓi no. 29Weln raw ga : Ndi day gà ama blam sen á fer ɗig gi, kal rawge ɓi pay tlalum no. 30Blam sen bloon raw riŋ wel ɓe ma kleen ga á mo wo doosen no pa, sen raw ga : Ndi wo yaŋ. Ama blam sen se laa woge gà. 31Yeso ga : Yoo weere se ɓogn wo mo lag maga joŋ fen maga pan ɓe dan diŋ ma honla? Á raw wo fer wããre ga : ma kluu no. Yeso raw riŋ rage lay ga : Kidolgi ndi riŋ nday ga jar tar lumo wo de naare figliw wo wo yaŋ go lagge ti twaywaŋ mani Baan taŋgu ɓay. 32Werga Jaŋ nduu kaŋ nen ɓay ti faage ma de deele no, nday laa dayge yãã wããre ɓe gà jar tar seen wo de naare figliw yãã wo wããre ɓe. Nday mbay go de koge ɓe no lay, mbe de sen ɓuy nday laa coo ɗiggi ɓay ma yãã wããre ɓe gà pa.
Yeso ngaɓ jagjõõ de jar po, à hã joŋre pay hara doo
(Mark 12.1-12; Lug 20.9-19)
33Coʼ we sug ɓay laa jagjõõ ma tigriŋ mokay pa no. Jobo peɗ tlalum ɓi pay ɓe, á raw maʼ laɓ go ti ɓe, raw tee tuu ma hãɗ bii tlalum no, raw boo tiŋ ma de gẽẽre ma gor ge ɓe lay. Blam sen á raw hã faage payn go ne jar joŋren wo doo, kal rawge raŋge. 34Wur ruggi tlalum wo age mokay, á raw laa weere jõõre ɓe wo wo see jar joŋre payn wo ga á mo hã wo nen ma sen le ne se. 35Jar joŋren raw wo bag rage mbar wo ma baapo, ii wo ma lan go, ɓoɗ wo ma de swaʼn de húulí. 36Je pay raw laa weere jõõre ɓe wo le ngaɓa debaŋ daŋ ma taŋgun wo, á raw wo joŋ rage doosen no pa. 37Blam sen ɓuy á raw ɓoʼ wel ɓen le de kaŋ ɗiggi ga á joŋ wo sõõre wel sen yaŋ. 38Ama jar joŋren wo wo ko weln mokay, á raw wo riŋ kããra ga : Ko we nen ɓay, je maga kol ge wurpo diŋ pan payn mo caw le so no. Naa ʼwarn we go, pay mo gwaʼ go diŋ ma naa. 39Á raw wo baage ɓe, raw wo ɓoʼge ɓe wo go faale pay no, ʼwarn wo wo go ni.
40Yeso raw wii rage ga : Ti wur maga je pay wo age mokay, á joŋ ge jar joŋren wo mo lag joŋ ge la? 41Á raw wo ga : Á ko ge decoo jar se ma de ɓlaggen mo lag wo gà a id ra ge go, day hã ge wããre pay go ne jar joŋre ma tigriŋ wo, nen maga tlalum rug we saara hã nen ma ɓen ne hẽn ti ngel ɓe lay mono. 42Blam sen Yeso raw riŋ rage ga : Wããre ma de yerge go ga :
Húulì maga jar bor tiŋ hay ɓoʼn wo go,
Raw kolge de ɗaw cõõ tiŋ diŋ sen yaw.
Joŋre maga Waŋkluu joŋ ne mokay,
Á diŋ fen mbuɗgi nen naa debaŋ.
Nday jaŋ sen ti boŋ gà yawla?
43Yeso raw riŋ rage ga : Ndi de riŋ nday ga á nii gi nday yaŋ wo go hãã see twaywaŋ mani Baa no, day á hãn ge yaŋ go ne wer jar ma tigriŋ maga yãã ge wo jag ɓe yaŋ mono. [44Je maga leʼ we ti húulì sen mo tiʼ, hrag ge go, je maga húulìn leʼ we ne hẽn ti lay no, waŋ ge nen go doo buɗuf no lay.]
45Jar kluuri ma siɗ jag wo de Farisiyẽẽ laa wo wããre jagjõõ sen mokay, á raw wo ko ge ga Yeso wãã mo deŋ diŋ ti saara, 46á raw wo kiɗ faage maga saara mo Baa ne. Ama á raw wo joŋ hẽẽne doo ngaɓa maga wo de ko Yeso ga á diŋ je ndar nen wããre Baa go mono.
Currently Selected:
MATIYE 21: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.