MATIYE 17
17
Se Yeso kol sag ge debaŋ debaŋ
(Mark 9.2-13; Lug 9.28-36)
1Naw raw joŋge blam sen hiiraʼa, Yeso raw hoo Piyer, Jag wo de hẽn ɓe Jaŋ wer ɓe, kal rawge de ɓaara ciŋ ti húulì ma de gẽẽren de see ɓaara tawa. 2See ɓe raw cooge sara, nen ɓe kol sagge doo wur nono, õõbe ɓen kol wo depiiri sagge pliɗ pliɗi. 3Blam sen Jar ma wer ɓe ma swaʼn raw wo ko Moyis wo de Eli wãã wããre de Yeso lagge. 4Piyer kal ɗe Yeso ga : Waŋkluu, ngel sen la de el maga naa mo lag la ni, hayga ndo da we, ndi bag mburyug swaʼa, boŋ ma ɓo, boŋ ma Moyis, ma la ma Eli lay.
5Piyer de wãã reen deŋ ɗa, ko la swaare po raw age le depuy debaŋ raw yoŋ rage go. Gẽẽge po raw wãã ge le nen swaaren ga : Je ma deŋ diŋ wel dage ɓi, ɓil ɓi go ti ɓe feh debaŋ. Yãã we jag ɓe.
6Jar ma wer ɓen wo wo laa gẽẽge sen mokay, á raw wo joŋ hẽẽne, raw wo leɗge gesiŋ de jiili ɓaara. 7Yeso raw yaʼ ge see ɓaara, raw duɗ doo ne hara see, raw riŋ rage ga : Fer we go hoo ge ciŋ, joŋ we hẽẽne wa. 8Á wo wo hoo nen ɓaara go ciŋ mokay, daʼ wo jobo ɓiŋ Yeso ni boŋ gà so.
9Á wo wo le go ɗiigi gesiŋ ciŋ ti húulìn mokay Yeso raw riŋ rage ga : Sii we fen maga nday kon mokay go ne jobo wa hase, hãã go ti wur maga Wel je Táabay fer ge go bir gi mo ɗa.
10Blam sen jar ma wer Yeson raw wo wiigi ɓe ga : Jar ma ndar wer wããre Baa wãɗ wo ga Eli a ge go taŋgu ɗa diŋ wer may la? 11Yeso raw ga : Á mbe doosen no, Eli a ge go taŋgu ʼwũy fẽẽren ɓuy ti ngel ɓe ɗa. 12Day ndi de riŋ nday ga : Eli go de a ge yaw, jar bay wo de ko ge ɓe wa, ama a joŋ wo bon ɓe doo maga ɓil ɓaara da nono, wersen á joŋ ge wo bon Wel je Táabay yaŋ doosen no lay.
13Jar ma wer ɓen raw wo koge ga á riŋ saara mo deŋ diŋ ti Jaŋ ma joŋ batem jar no.
Yeso nii sõõ go ne wel po ti
(Mark 9.14-29; Lug 9.37-43)
14Á wo wo dayge ti ngel maga ngaɓan wo ni mokay, jobo raw yaʼ ge see Yeso leʼ monɗra pel ɓe, 15raw ɗege ɓe ga : Waŋkluu, ko decoo wel ɓin ɗa la. Werga ti ɓe fĩɗ go doo cegè debaŋ, tum á leɗ ti wùu, leɗ nen bii lay. 16Ndi wo we de ɓe ne jar ma wer ɓon wo, ama á laa wo kããge ma nii sõõ sen go gà.
17Yeso raw ndum gi ga : Hih, nday jar se ga nday bay de hã ɓil ɓay ne Baa wa no. Nday jar se hãy hãy mo lag no, ndi mo ig see ɓay komay ɗa pa la? Ndi mo ig soɗ we ge komay pa la? Á le de weln me lam no. 18Yeso raw caa põõ ne sõõ no, sõõn raw kalge go, weln raw kolge go holaŋ ti ngel ni tuuseŋ.
19Jar ma wer ɓen raw wo yaʼge see ɓe de see ɓaara tawa, raw wo wiigi ɓe ga : Ɓa wùr kãã ma nii sõõ sen go gà an wer may ɓa?
20Yeso raw fer wããre ne hara ga : Werga nday bay go de hã ɓil ɓay go ne Baa de el sog wa mono. Kidolgi ndi de riŋ nday ga hayga hãge see ɓay go ne Baa yaŋ go de dayge doo mbeere yeg no maʼ no, nday mo riŋ bo ga húulì ma kaʼ mo yaʼ go mo taʼ layblaʼ, se kãã mbe ma yaʼ ge go. Mopo maga nday kãã ma joŋ ge ɓe gà bay wa. [21Ama ane à kãã ma nii sõõ se ma doo kay no go diŋ de tosge wo de hẽẽge bii tawa.]
Yeso ga se huu gi, day se fer ge go birgi pa
(Mark 9.30-32; Lug 9.43-45)
22Ti wurpo jar ma wer Yeson tay wo go ɓi sir Galile ɓuy, Yeso raw riŋ rage ga : À wo yaŋ hã Wel je Tabayn go ne jar wo doo, 23day à ʼwarn yaŋ go, ama se siigi de húulí swaʼa, blam sen á fer ge go bir gi pa so. Jar ma wer ɓen raw wo go hrag see debaŋ tuu.
Yeso hã targe ma tiŋ Baa lay
24Yeso wo de jar ma wer ɓen raw wo nduugi Kapernam, jar tar fẽẽre ma ɓi tiŋ Baa raw wo yaʼge see Piyer wiigi ɓe ga : Ɓa waŋ ɓay bay targe wo ɓi tiŋ Baa wa an ẽ ɓa? 25Piyer raw fer wããre ga : Á yaŋ mbe targe lay. Piyer wo kalge wo tiŋma mokay tuu, Yeso raw tĩĩ wããren go taŋgu ɓe, raw ɗege ɓe ga : Simoŋ, ndo ɗig gahãy? Wose wo nen hã targe ne waŋre ma ti tamsir wo lam ne, weere ɓaaran wo yaw, noga diŋ jar de koɗ ma ɓi sir ɓaaran wo? 26Piyer raw ga : Diŋ jar de koɗ wo. Yeso kal ga : Mbe doosen nono, weere ɓaaran tar wo gà. 27Mbe de sen ɓuy naa mo joŋ fen ma cee ɓil jar wa. Wersen patala see jag maarog ɓoɗ teɗeb nen bii, cẽẽ maga ndo baa sen taŋgu mokay, ni ndo bul jag ɓe go, ndo wo yaŋ daʼ solay jag ɓe ni, nen kãã targe ma ti naan go ɓog ɓuy, maŋ ne, ni ndo poɗ targe ma ti naan go de ɓe.
Currently Selected:
MATIYE 17: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.