MATIYE 15
15
Hadge moore ɓaaran wo
(Mark 7.1-13)
1Farisiyẽẽ wo de jar ma ndar wer wããre Baa raw wo age le Jerusalem daʼ Yeso, raw wo wii gi ɓe ga : 2Wer may ga jar ma wer ɓon bay wo joŋge doo hadge moore naa wo wa la? Á re wo hoole bay yog doo le la?
3Yeso raw fer wããre ne hara ga : Nday de see ɓay, nday bay joŋge doo jag liŋgi ne wa, nday joŋ diŋ doo hadge ɓay de see ɓay wo no le la? 4Baa wãã ga : Hoo sug ti pan ɓo wo de man ɓo, Je maga yaŋ ɗar pan ɓe wo de man ɓe, à mo ii je sen go. 5Ma ɓay nday had ɓayn ga je maga riŋ pan ɓe noga man ɓe we ga fen maga se hay nen hãge ɓe ne hẽn ma kayge ɓe, se ɓoʼn we go ciŋ ne Baa no, 6je sen bay nen kay pan ɓe mbe wa so mono, diŋ re maga nday ɓlag de el jag liŋgi go, de hadge ɓay wo de see ɓayn wo mo so no. 7Nday jar bag bii jar no, Esay je ndar nen wããre ma jag Baa go hay wãã we go ti ɓay ga :
8Jar sen togoɗ wo ndi diŋ de jag ɓaara tawa,
Ama ɓil ɓaara go see ɓi hãã.
9Goŋge maga a goŋ wo me de koɗ koɗe,
Werga á had wo jar diŋ hadge wããre jar téebeere wo.
Fẽẽre maga kaŋ wo ɗag ne wosela se
(Mark 7.14-23)
10Blam sen Yeso raw ɗe ngaɓan le, raw riŋ rage ga : Coʼ we sug ɓay ma laa wããre sen mokay no. 11Fen maga kal wo jag wosela raw ɓil ɓe, kãã ma kaŋ ɗag ne hẽn see gà. Say kaŋ ɗag ne hẽn see diŋ wããre maga a le ɓil ɓe, kal le go jag ɓe mono.
12Jar ma wer Yeson raw wo yaʼge see ɓe, kal wo riŋ gi ɓe ga : Ndo yaŋ mbo de koge ga Farisiyẽẽ laa wo wããre maga ndo wãã mokay ga ndo mbuɗ diŋ foo saara ge?
13Yeso raw fer wããre ne hara ga : Maysela maga peɗ ra we diŋ Pan ɓi ma ciŋ gà mo ɓuy, à ndar ra ge go. 14Men ra we, á wo rẽwre de ɗaw kããra jar rẽwre wo. Day je rẽw ɗaw je rẽw we no, á wo ge wo go laa ge ɓi tuu ɓog ɓuy.
15Piyer raw riŋgi ɓe ga : Ɓoʼ wer jagjõõ sen go ne wùr ɗa ɓa.
16Yeso raw fer wããre ne hara ga : Nday de see ɓay nday bay de kããge ma laa wer wããre patala wa ɗa pa? 17Nday bay de koge ga fẽẽre maga laa wo wo jag wosela raw wo ɓil ɓe, day ẽẽ wo go diŋ glog ɓe wa yawla? 18Ama wããre maga sen kal le go jag wosela a le diŋ ɓil ɓe, sen mokay diŋ ma kaŋ ɗag ne je sen see so. 19Werga laa le go ɓil ɓe, diŋ ɗiggi ma de ɓlagge wo, maga wo de ɓe id jare, lengãɗge de naare jare, fẽẽre maga bay ti ngel ɓe wa, joŋge freŋ, carge geteʼe, wãɗge ɓlagge ti jar lan wo lay mono. 20Mokay diŋ fẽẽre maga kaŋ wo ɗag ne jobo see mo so no. Ama rege hoole maga jobo re mbe tuu bay yog doo go taŋgu doo hadge moore ɓay wo no gà mono, sen kãã ma kaŋ ɗag ne jobo see gà.
Wãy jar Kanan po hã ɓil ɓe ne Baa
(Mark 7.24-30)
21Blam sen Yeso raw men ngel sen go, kal rawge ɓi sir maga see Tir wo de Sidoŋ mbaŋ mono. 22Wãy jar Kanan po yaŋ de hayle ɓi sir sen ni, raw age see ɓe, kal ɗege ɓe ga : Waŋ ɓi no, moo Dafid no, ko decoo ɓi ɗa la. Sõõ de joŋ coo may ɓi debaŋ.
23Ama Yeso laa fer wããre ne hẽn gà hase. Jar ma wer ɓen raw wo yaʼge see ɓe wii gi ga : Á bay men ngar jag go ne naa wer wa lay, niin wo go ɗa la.
24Yeso raw fer wããre ga : Baa ɓoʼ me le diŋ ne sããre jar Israyel maga wo go de yeɗ ge mo tawa no.
25Ama wãyn raw age leʼ monɗra pel Yeso raw ɗege ɓe ga : Waŋ ɓi no, kay mbo ndi.
26Yeso raw riŋgi ɓe ga : Ndi mo ɓoɗ hoole weere kleere wo go ne wayre wo mokay sen bay nen ɓi de el wa.
27Wãyn raw wããge ga : Mbe cwãy doosen nono Waŋ, ama de sen ɓuy, wayre re wo mbaara nen hoole maga leɗ go gesiŋ doo pan tiŋ ɓaaran mono.
28Blam sen Yeso raw fer wããre ne hẽn ga : De ele, wãy ndo hã ɓil ɓo ne Baa de egre debaŋ. Re sen joŋ yaŋ mo doo ga ndo da nono. May ɓen raw pẽẽ ge go de wur sen ni tuuseŋ.
Yeso pẽɗ jar cege wo go debaŋ
29Yeso raw men ngel sen go, kal rawge jag maarog ma Galile, raw ɗiigi ciŋ ti húulì, raw hayge gesiŋ. 30Jar raw age le see ɓe ngaɓa debaŋ, jar leŋre wo, jar rẽwre, jar maga cegè kol de hugli ɓaara go, jar mbululum, de jar cege ma tigriŋ wo debaŋ. Á raw wo lag rage ɓiŋ Yeso, se raw pẽɗ rage go ɓuy lay. 31Jar raw wo ngrisgi debaŋ wer maga á ko wo jar mbululum wãɗ wããre, jar maga cege kol de hugli ɓaara go pẽɗ wo go, jar leŋre seɗ wo, nen jar rẽwre car wo go, á raw wo togoɗ Baa maga jar Israyel goŋ wo mono.
Jar ndar naa Yeso wùu ra de hoole
(Mark 8.1-10)
32Yeso raw ɗe jar ma wer ɓen wo ga : Jar se deŋ ko wo de coo nen ɓi debaŋ werga naw ɓaara wara wer ɓi swaʼa, á bay wo de rege doo wa so lay. Hayga ndi fer ra we liŋ koŋne no, á yaʼ ge wo go gay ge ti faage.
33Jar ma wer ɓen raw wo wii gi ɓe ga : Naa yeɗ hoole ma wùu ngaɓa ma deŋ mo deŋ ti puuli mo taʼ la gen so la?
34Yeso raw wiigi ga : Hoole doo ɓay gãy ne? Á raw wo ga : Hoole doo wùr renam, weere cẽẽ ti ɓe ni mbag lay.
35Yeso raw riŋ ngaɓan ga : Lag we gesiŋ. 36Blam sen, á raw hoo hoole ma renam wo de cẽẽ ma ti ɓen doo ɓe raw joŋ suseʼ ne Baa wo ti hoole no, raw car nen hoolen go, raw hãge ɓe ne jar ma wer ɓen wo, á raw wo ɓesge ɓe go ne ngaɓan wo. 37Wosela ɓuy wùu go de hoole. Jar ma wer ɓen raw wo bag yããge de nen hoole maga gwaɗ go ni renam pa. 38Jar maga re wo hoolen, werpiiri wo ndar naa, jobo kee naare wo de weere kleere wo ni gà.
39Blam sen á raw men faage ne jar wo rawge, raw ɗii daage, kal rawge ɓi sir Magadaŋ.
Currently Selected:
MATIYE 15: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.