मात्ति 2
2
जोतिसिचि नाम् होम्मालाम्मा येसु टुब्सिङा ओटायागा
1येसु याहुदिया छेट्राङिना बेथलेहेम ओलोडुना युक्ताम्ङि पोङ्साना डाना, हिट्ना बेला हेरोद हिट्नि हाङ्बा डाना॥ येसु पोङ्साउङ् नाम् होम्मालाम्मा जोतिसिचि यरुसलेमङि होन्डा ओटाए, 2हिट्नुङ् हिट्नागाँ नाड्डे पिक्सा ओमाट्टुए, “याहुदि याप्मिचिगा हाङ्बा लिसाउङ् पोङ्साना खोनाइ युङ्ग्वाना? पोङ्भोने आन्याँ उन् पोङ्साना रिङ्ङाना चिन्ना कापिबा चोक्चिङ्गे नाम् होम्मालेङ् निसुम्मे हिट्नुङ् उन् स्या मेट्सिङा आबिएसिङे॥”
3हेरोद हाङ्बाङा ना रिङ् खेम्सुङ् उनिङ्ग्वाङि हाङ्हाङ् लिनेट्नि, हिट्नुङ् यरुसलेमङिगा सोब्बे याप्मिचि चा हाङ्हाङ् ओलोनेट्एनि॥ 4हिट्नुङ् हेरोद हाङ्बाङा सोब्बे गाडुवाडाङ्बाचि हिट्नुङ् याप्मिचिगा धारमाबिधि काहिसिक्बाचि छेम्डुचिउङ् छुम्सुचे, हिट्नुङ् “खिरिस्ट खोनि पोङ्युक्ना?” नुङ् सिलाप्टुचे॥
5हिट्नागाँ ओलोडुए, “याहुदिया छेट्राङाना बेथलेहेम युक्टाम्ङि उन् पोङ्युक्, पोङ्भोने धारमाछाप्लाङि माङ्काटाचिङा नाड्डे ओछेप्टुएसुए–
6‘हाउ याहुदा छेट्राङिगा बेथलेहेम युक्ताम्ङिगा याप्मिचि,
खानिना ना खाट्टियुना खालाङ्गा याहुदाङाना खालाङ्गाचि गाड्डे डोक् आड्डिक् मुलि खालाङ्गा लियुक्॥
पोङ्भोने ना युक्ताम्लाम्मा ठिबाङ् सासाक् टायुक्,
हिट्नुङ् गोठालेङा उठुँबाचि पुयुचि गाड्डे डोक् उन्ङा इस्राएलि आयाप्मिचि पुयुचिचि॥’”#मिका ५:२; २ सामुएल ५:२
7हिट्नुङ् हेरोदङा हिट्नागा जोतिसिचि सोगोप् छेम्डुचे हिट्नुङ् चोक्चिङ्गे खोना बेला पाइले ठेट्टेना हिट्ना रिङ् हिट्नागालाम्मा ठाहा टोगुए॥ 8हिट्नुङ् उन्ङा हिट्नागा नाड्डे लोडुचिउङ् बेथलेहेमङि पाङ्सुचे, “खाडानिउङ् ओओ नुलोक् कोलानुम्॥ हिट्ना ओओ आटुबुमुङ् आङा चा खाबोर याङ्हाक्टानि, हिट्नुङ् आङा चा खाट्नाउङ् स्या चोगुङ्टुङ्॥”
9-10हेरोदङा माट्टुना रिङ् ओखेम्सुङ् हिट्नागा हिट्निलाम्मा ओलाम्टिए॥ हिट्नुङ् हिट्नागाँ नाम् होन्नालेङ् उनिसुना चोक्चिङ्गे फेरि उनिसुनाँ आड्डिक् उन्चि चाप् टाए॥ हिट्ना चोक्चिङ्गे उन्चि टोकाना टोकाना खाडे, हिट्नुङ् ओओ लिसाना ठोङ्ङि टासुङ् आड्याँ लिसे॥
11हिट्नुङ् पाङ् भिट्रा उलिगानाँ हिट्नागाँ ओओ उमा मारियामलोक् लिसाना उनिसुए॥ हिट्नुङ् गुङ् ओचोगाउङ् ओओ स्या ओमेट्टुए, हिट्नुङ् जाप्रामालाम्मा साम्याङ्, धुपा, हिट्नुङ् बुङ्बुङ् नाम्ना आट्टार ओहोट्टुङ् ओठाङ्सुए॥
12हिट्नुङ् हिट्नागाँ सेम्माङ्ङि हेरोदङि नोक्नेनिन् नुङ् रिङ् ओटोगुङ् हिट्नागा आरको लाम्बो उलिसाउङ् उन्चि देसङि ओनोक्टाउङ् ओखाडे॥
योसेफ ओजाहानलोक् मिस्रा देसङि खाडाना
13हिट्नागा जोतिसिचि ओखाडाउङ्, टाङ्बाङाना ठिबाङ् माङ्हाङ् रिङ् काउग्बा सेम्माङ्ङि योसेफ सोरि ठेट्टे, हिट्नुङ् हिट्नाङा नाड्डे लोडुए, “कोबा, ओओ लोक् उमा खाट्टुचिउङ् मिस्रा देसङि पिन्डा खाडालेट्टा, हिट्नुङ् आङा खान् पाक्चा मिलोए सोम्मा हिट्नि डोक् युङा, पोङ्भोने हेरोदङा ओओ सेप्मा लोङ्सा निङ्ग्वा चोगुएट्टु॥”
14हिट्नुङ् योसेफ कोबाउङ् हिट्ना युसा डोक् ओओ लोक् उमा मारियाम खाट्टुचिउङ् मिस्रा देसलेङ् खाडे॥ 15हिट्नुङ् हेरोद मिसिए सोम्मा हिट्नागा हिट्नि डोक् उयुङे॥ नाड्डेउङ् माङ्काटालाम्मा टाङ्बाङा माट्टुना ना रिङ् युडे, “आङा आइछा मिस्रा देसलाम्मा काडा पिक्सा छेम्डुङे॥”#होसे ११:१
हेरोद हाङ्बाङा ओओचि सेप्मा मेट्टुचिगा
16जोतिसिचिङा उन् ढाँट ओफोक्टुना रिङ् हेरोदङा ठाहा टोगुए, हिट्नुङ् आड्डिक् ओयाग्लेडे॥ हिट्नुङ् जोतिसिचिङा ओमाट्टुना बेलालाम्मा उन्ङा बेथलेहेम हिट्नुङ् हिट्ना छेट्रा भिट्राङिगा इप्पोक् बारखा ओटासुगा हिट्नुङ् उछिक्ङिगा ख्वाप्पा ओओचि सेप्मा मेट्टुचे॥ 17नाड्डेउङ् यारमिया माङ्काटाङा माट्टुना रिङ् युडे–
18“याप्मिचि सानिङ्ग्वा लोसा ओहाबागा ठेना सोरा रामा खालाङ्गाङि मुक्टे,
हिट्नुङ् राहेल ओछालेट्चि लोङ्सा हाबायाक्टे, हिट्नुङ् साङा चा उन्ङाना याङ्छामा टुग्मा उहिडुवाट्टुन्,
पोङ्भोने सोब्बे ओछालेट्चि उसिए॥”#यारमिया १३:१५
19हेरोद सियाउङ् मिस्रा देसङि योसेफलोक् टाङ्बाङाना ठिबाङ् माङ्हाङ् रिङ् काउग्बा ओसेम्माङ्ङि ठेट्टाउङ् नाड्डे लोडुए, 20“कोबाउङ् ओओ लोक् उमा खाट्टुचिउङ् इस्राएल देसङि खाडा, पोङ्भोने ओओ सेप्मा लोङ्सा निङ्ग्वा काचोक् याप्मिचि सिमा उहिडे॥” 21हिड्डेउङ् योसेफङा ओओ हिट्नुङ् उमा खाट्टुचिउङ् इस्राएल देसङि नोक्टा खाडे॥
22टरो हेरोद सियाउङ् ओसाट्टोङि उइछा आरखिलाउसङा याहुदिया छेट्राङि सासान् चोगुएट्टु नुङ् योसेफङा खेम्सुङ् हिट्नि खाप्मा किट्टे, हिट्नुङ् फेरि माङ्हाङ्ङा सेम्माङ्ङि ओछेक्छेक् चोगुनाँ उन् गालिल छेट्राङि खाडे॥ 23हिट्नुङ् उन् नासारात ओलोडुना युक्ताम्ङि खाडाउङ् युङे, नाड्डेउङ् माङ्काटाचिङा “उन् नासारि लोडुम्टुम्” पिक्सा ओमाट्टुना रिङ् युडे॥#मारकुस १:२४; लुका २:३९; युहान्ना १:४५
Currently Selected:
मात्ति 2: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society