ZECHARIAH 8
8
Zion Kinikülü eno Külakishi
1Aqokitikhi Mpeu tsa ighi eno pi, 2“Aqokitikhi Mpeu no piani: Ni ye Zion ghenguno shishe anheshu ani, Ni ye aloghu kije lono li ghenguno aghichipo ani. 3Ikehu Ampeu no piani: Ni ye Zion lo ideighivae eno Jerusalem lo ngouve nani, Jerusalem ye pükhükulupu mishighüna, eno aqokitikhi MPEUw naghuto, akimthe naghuto ipi ku nani. 4Aqokitikhi Mpeu no ishi piani: Asü-apüzaqo no itaghi Jerusalem laghila lo iqa nani, ateasü shive kehu milakhi khino au lo aküsü küsüpe nani. 5Eno mishighüna laghila lo apu-angaqo no chhitoi ili nani. 6Aqokitikhi Mpeu no ishi piani: Tsala ghükulumi itehi akeu hipaqo nhethe lo hi no akümzapu shi aghi aye, I nhethe lo ghi akümzapu shikepu keshea? ipi aqokitikhi Mpeu no asheshu. 7Ikehu aqokitikhi Mpeu no pi: Julo, I no kipela ghakhu eno kulola ghakhu lono Iw timiqo xalu nani, 8eno Jerusalem lo xü penike I no panongu saghi nani. Panongu no Iw timi shive nani eno pükhükulu ngo achipiu mikucho lono I no panongu Lhou shi nani.”
9Aqokitikhi Mpeu no piani: “Aqokitikhi Mpeu ki boqha ghoke tsala lo tungkupmi kichi lono atsa hipaqo pikeu chilu ighi kemi nongu kümtsü no achineki shiqhelu kepushi nongu u mtotoi luvelo. 10Kughengu tipa züu ye timi momu lhoxü piqelu kepu shimoe, momu hu-wo chekemi ghenguno aghümi launo sükusho kühae, kughengu I no timi lakhikhi pesü pa kisüghüu ghümi shivepe ke. 11Ikemu itehi Ni ye khaghi lo toi ghükulumi hipaqo peithamo nani, ipi aqokitikhi Mpeu no asheshu. 12Kughengu külakishi xusüni keu do ighi nani. Atsaibo no axathi pithi nani, ayeghi no tüxatini ipeghi lupe nani, eno atsütsü no atsüzü tsü nani. Ghükulumi hipaqo pelo thime hi kümtsü ithulupe nani. 13Nongu ye ghushove kemie pi shiyeqo gholo küghakiche shiveke, O Judah ngo Israel laghami, ikehu I no nongu xalu nani eno nongu ye kükümghau shive nani. Msa kevilo, ikemu nongu u mtotoi lulo.”
14Kughengu aqokitikhi Mpeu no piani: “Kughou nongu puasüqo no I loghu shikighide keno I no küsakusho süghini ye kughu, eno ti süchilemo ketoi, 15hipa ghuloki lo ghi I no Jerusalem ngo Judah lagha lau akivi süghini ye kughuvae; msa kevilo. 16Nongu no thime hipaqo shilo: Lakhino lakhi lau kuchou tsa pilo; now khagho lo xakütha kiu no achipi keno tsülo eno külakishi ghenguno mlalo; 17nongu mlo lono lakhino lakhi shou küsakügha kuchughu kevi, eno kichile shoqhi kimiye kevilo, kughengu hi kümtsü I no mithike, ipi Ampeu no asheshue.”
18Aqokitikhi Mpeu tsa I lau ishi ighi, 19“Aqokitikhi Mpeu no piani: Judah lo küami ghenguno aqhi abidiu, apunguu, akütsüniu eno achighiu lo kümvü keu ye alokivi, amlokiqi eno alophalei keu ghulhuqo shi nani. Tighenguno kuchou eno külakishi kimiyelo.
20“Aqokitikhi Mpeu no ishi piani: Timiqo ye ighini aphi, mishighünaqo lo küami ghi ighi nani. 21Mishighüna lakhi lo küami no lakhiu lo wuno pi nani, ‘Ningu mtazü wuno AMPEUw kimiyekini khuni eno aqokitikhi Mpeu phuni nolo; Ni ghi wucheni.’ 22Ashiaye kutomo eno akumto shiyeqo no aqokitikhi Mpeu phusü Jerusalem lo ighi nani eno AMPEUw kimiyekini khu nani. 23Aqokitikhi Mpeu no ishi piani: Tipa ghuloki lo shiye eno ashiaye kütüta lono timi chighi no Jewmi lakhi kuuphi tsüqü luve no pi nani, ‘Ni pelo o gholo wu pelo, kughengu Alhou ye o gholo anie pi nino chiluvae.’”
Currently Selected:
ZECHARIAH 8: SUMRVBSI
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More