ZECHARIAH 10
10
Israel ngo Judah Xachilelu
1Tsülü tusho lo Ampeu vilo
tsütsüghu khulo, Pasapagha
puwu chekeu ye Ampeu no ke,
Pa no timiqo tsütsüghu tsü nani,
aluza lo atsüni pesü kümtsü tsü.
2Kughengu akibo lo ajulhoqo no akiqi kühakeu tsa picheni,
eno asakiqhimi no akimki ithulu cheni; panongu no
kichile samo pi eno abokümsa
alopiqitsü keu tsa picheni.
Tighenguno timiqo ye ambe toi itsü wuve no akheu
küküha ghenguno ghime anie.
3“I mlokighide ye ambekhemi shou ani,
I no sakiphemiqo ghime nani;
kughengu aqokitikhi Mpeu ye Pa mbeloji, ti ye Judah
laghami, tucho cheni, eno panoqo pe aghüshi lo khurshi kughushu toi shi nani.
4Atsükucho, aphiki kufuyi,
aghüshi piji, yepemi kümtsü
kümtsa Pa launo ipeghi nani.
5Panongu ye aghüshi lo aghütomi toi nani, alaghila lo
aniba lono aghümi nedaqhi nani;
Ampeu no pano gholo ani kehu panongu no aghü shino
khurghüshimi shikukujo nani.
6“I no Judah lagha shikumto nani
eno I no Joseph lagha xalu nani.
I no panoqo kimiyeqhiyi kehu panoqo saideghi nani,
eno panongu ye I no mili püaghimo ketoi nani,
kughengu Ni ye Ampeu pano Lhou eno I no panongu khochile nani.
7Tishino Ephraim ye aghütomi toive nani,
atsaiji shove keshi panongu mlo ye alokiqi shi nani.
Pano tianuliqo no ti ithulupe alovi nani; pano mlo
no Ampeu lau alovi nani.
8“I no miji panongu kuno hekütsü nani, kughengu
I no panongu qhüchile luvae,
eno panongu ye püzüu qhemi kutomo shive nani.
9I no shiyeqo gholo panongu hale puwuve namu putou
ghakhu lono panongu no I kümsülu nani, eno pano
tianuli sasü panongu no aküxü achili shi ideighi nani.
10I no Egypt yeghi lono panoqo sasü aki lo ighi nani,
Assyria lono panoqo hekütsü no Gilead ngo Lebanon
yeghi lo a-a kühave moke kutolo panongu sawo qhinani.
11Pa no aveküsa züghi kathasü
wuno azü fukukucho ghasü nani, eno Nile züghi
kuthoku kümtsü qhaive nani.
Assyria qheküza kuchunive tsü
eno Egypt kükaküsü kishekhave tsü nani.
12I no panoqo pesü Ampeu gholono mtotoi penani,
panongu no Pa je lono xünani,”
ipi Ampeu no asheshue.
Currently Selected:
ZECHARIAH 10: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More