MICAH 4
4
AMPEUw Naghuto
1Ashekha tsala lo hi ighi nani
Ampeu ki akeu naghuto ye,
kümtsü gholo akiqheu shive nani,
eno atoghiqo nguno akiqheu shi ikhiqhe nani;
ashiayeqo no tile chokive ighi nani,
2eno shiye kutomo no ighi no pi nani: “Ighilo, ningu
AMPEUw naghuto lo wuni,
Jacob Lhou kilo wuni nolo,
tishino Pa laghiqo ni shika peni
eno nino Pa laghi lo pülanie.”
Kughengu Zion lono Pa yezah#4:2 Momu shiküka
eno Jerusalem lono Ampeu tsa ighi nani.
3Pa no ashiaye kutomo dolo küghatha tsü nani,
akumto shiye putou akeqo ghenguno xathatsü nani;
panongu no pano zütakikihi hepha pesü akuphu mlave nani,
eno pano ngupa pesü asübo kikixi züta shive nani;
shiye lakhino lakhi shou azütakikihi peqhemo nani,
momu aghü küpüghümo nani;#Isa 2:3-4
4ikemu kümtsü no pütüta tsaibo eno mububo qholo nani,
eno khunomu panongu shikümsa monani,
kughengu aqokitikhi Mpeu kichi lono piqhivae.
5Kughengu ashiaye kümtsü no
pütüta lhou je lono cheche nani,
ikemu ningu ye ni Lhou Ampeu je lono pülhapuju
eno alholo cheche nani.
Ampeu no Zion Xaphelu nani
6Tipa tsalani, Ampeu no sheshu,
I no ala chemlave kemi hekütsü
nani, I no khunoqo hapupove eno
ghimeve keno kukumqo nani;
7ala chemlave kemi pesü I no ghükulumi shive nani,
eno hapupove kemi pesü akumto shiye shive nani;
Ampeu no Zion lono hipa ghuloki lono alholo
panoqo shou ayepe nani.
8Eno no, O ambeloji qoghe,
Zion limi toghi, azüu kükaqha
o lau ighi nani, Jerusalem limi
ghenguno ayekipe ighi nani.
9Itehi nongu ye kushiye ighaqa ani kea?
Nongu ye akükau kühava kea?
Nongu lapiyemi pühave kehu
totimi punu küsü toikeu no nongu tsüqü luve akeshea?
10O Zion limi, totimi no apunu
küsü lo aketoi ihi eno ighalo,
kughengu itehi nongu ye mishighüna lono ipeve nani
eno aluza qhalo xüuve niae;
nongu ye Babylon lo wuniae.
Tilauno nongu xaphelu nani;
Ampeu no nongu ghümi
u lono nongu xachilelu nani.
11Itehi ye shiye kutomo no
hekütsüpe o mjochileni ke
piani, “Li shikitiqe lo, ni nhethi
no Zion shou jupukuni.”
12Ikemu panongu ye Ampeu
kükümsü ithi chemoe;
Pa kukughu vethalu chemoe,
aghi piqhepe aniqa lo qhikeshi Pa no panongu hekütsüvae.
13Ithu no qoda lo, O Zion limi,
kughengu I no ayi pesü o kibo
mla tsüni eno alazayi no o pukhu
mütsü mla tsüni; nongu no
mukhumuno shi ashiaye kutomo heqhi nani eno pano no ala
shilukeu pesü Ampeu tsü nani,
pano küakini pesü ayeghiqha Mpeu tsü nani.
Currently Selected:
MICAH 4: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More