MATTHEW 8
8
Apüghami Shipivi
(Mk 1:40-45; Lk 5:12-16)
1Kughou Jisü no naghuto lono iqighi keno, aqokitikhi kije no pa papeche. 2Eno julo, apüghami lakhi no ighi püzü pa zülo qhoqhünhe luve no pi, “Ampeu, nono pulo aye, I shikimthe luve nani.” 3Tileno Jisü no pa u chhope pa buno pi, “Ni ye pulo ani; mithelu lo.” Paikhavi no pa pügha ye shikimthe luve. 4Eno Jisü no pa vilo pi, “No ye khuu vilomu pi kevi, ikemu achineu lau wuno piyelo, tishino viluve keu thopi shi Moses no azah tsükeu kiqi lono agho pesü mllalo.”#Achi 14:1-7
Zatsüu Lakhi Küpülü
(Lk 7:1-10; Jhn 4:43-54)
5Kughou Jisü no Capernaum lo ilo keno, Rommi ghüshimi aqhe shou zatsüu no pa zülo qhüiniju ighi, 6“Ampeu, I qeu ye aküsü no ghimeqhi ani püzü aphiau mu itha mlave no aki lo ani.” 7Jisü no pi, “I no ighi no pa shipivini.” 8Ikemu zatsüu no khochile, “Ampeu, I ki kicheqho lo o sasüni keu ni ye aküzüpu kumoe, qeti nono atsa lakhi pive tsülo, eno I qeu ye viluve nani. 9Kughengu ni ghi kükagha qholo akemi eno I qholo ghüshimi akhani. I no milakhi vilo, ‘Wulo’ pi aye pa no wucheni, eno lakhiu vilo, ‘Ighilo’ pi aye pa no ighi cheni, itaghi I qeu vilo, ‘Hi shilo’ pi aye pa no tishi cheni.” 10Jisü no hi chilu kelo ighono pa kümza qhiyive no pa papeche keqo vilo pi, “Kuchou no I no nongu vilo piani, Israel lo hitoi keu küpülü akemi ni ye khumu ithulu mphi. 11I no nongu vilo piani, kutomo no kipelau eno kulolau no ighi no kungugha yekipe lo ilo Abraham, Isaac, eno Jacob gholo chunike iqa nani, 12ikemu tipau lo amheghi kiyighimi shipenike kimshitsü keqou ye khalau khilehi küqa kumlo eno ahu kütsüghü anani keno, ti aküzü kutho-a lo vepheve nani.” 13Tishino Jisü no zatsüu vilo pi, “Wulo, eno nono pülü luve keu kiqi lono o lau tishilu peni.” Eno kuchou no aqeu ye tipau süchedo lono shipivi luve aghi.
Jisü no Kutomo Shipivi
(Mk 1:29-34; Lk 4:38-41)
14Kughou Jisü no Peter kilo iloghi keno, Peter pani ye aghamki püzü ihozü aghikeu pa no ithulu. 15Pa no li u butsü, tileno li ye aghakimki kühave, ikehu li no ithughi no pa loji thuve. 16Tipani avelau timiqo no Jisü lau tüghaküsa no ghimeqhi akemi kutomo sasü ighi, pa no atsa lakhi pi püzü tüghaküsaqo haphetsü, eno küsükinimi kümtsü shipivi tsü. 17Hi ye Isaiah tungkupu vecheo kiu pipüa keno shikupu niye ke: “Niw kushuküqha ghime pa no pevetsü eno küsükini jeli puluve tsüe.”#Isa 53:4
Jisü Papeni keu Mekusho
(Lk 9:57-62)
18Kughou aqokitikhi no pa sühope akeu Jisü no ithulu keno, pa no azüghi tüxau pa saiku penike azah tsü. 19Tile Ayezah shikükami lakhi no pa lau ighi no pi, “Shikükau, nono khile khile wumu I no o papeni.” 20Jisü no pa vilo pi, “Aghalo tsüqo ye atuki ani, eno aghauqo ye apüsü ani, ikemu Timi Nu ye khilehi mu pa kütsü belu kepu-a kühae.” 21Akhopemi kütami lakhi no pa vilo pi, “Ampeu, atüghüshi I pelo wuno I pu jupithilu pelo.” 22Jisü no pa vilo pi, “I papelo, eno kithimi pelo panow kithimi juqho apelo.”
Pasapagha no Jisü Gholu
(Mk 4:35-41; Lk 8:22-25)
23Kughou Jisü no ashuka lo ikuve keno, pa khopemi ghi pa pape wuve. 24Paikhavi azüghi lo pasapagha kije ipeghi, ikelo amülhü no azü fukucho pe ashuka lo iloghive, ikemu Jisü ye züche. 25Akhopemi no wuno pa küdaputhu eno pi, “Ningu xalulo, Ampeu; ningu ye pühave cheae.” 26Pa no panoqo vilo pi, “O nongu aküpülü kitila likhi keqo, kushiye nongu ye msa ani kea?” Tishino pa no ithu amülhü ngo azüghi lomipi, tipa mtsa shishe iqünheive. 27Pa gholo chekemi no ighono akümzaqhiyi pi, “Hi ye kiutoi kemi keno amülhü ngo azüghi thotsü pa gholu kea?”
Mikini Philo Tüghami Haphe
(Mk 5:1-20; Lk 8:26-39)
28Kughou Jisü no azüghi tüxau Gadarenes qhalo ighi keno, tüghami aphi lo ilove kemi timi kini akumo tuki lono ipeghi no pa sasü kusholu, hi pama ye ighono ayiküsashi ache kehu khunomu ti küdau püla mono ache. 29Paikhavi pama no igha thuve, “O Alhou Nu, no ye ni lau kiu shikepu ani kea? Ado tomphi lono no ye ni ghimeni ke ighive akeshea?” 30Pama no ake küdau khitohi kumo lo awo kutomo amqoshi achu mza ae. 31Ikehu tüghami pama philo akeqo no Jisü qhüiniju pi, “Nono ningu hapheveni pi aye, awo loji gholo ni hapuwuve lo.” 32Eno Jisü no panoqo vilo pi, “Wulo.” Ikehu panoqo no ipeghive püzü awoqo philo ilove, eno julo, awo loji huye atuxu lo kuhakive iqive no tilauno azüghi lo ikiqi ilo pütsüqhi khave. 33Awo khemi no ti ithulu no pokhave, eno aphughi lo poilo kiu shive keno, akhoto no tüghami no peitha chekeu pama ghili, qhoi pivetsü. 34Ikelo aphughi lo aqha no Jisü sasü kusholu niye ighi, eno kughou pa ithulu keno, pano cheaxü qhive tsülopi pa qhüiniju.
Currently Selected:
MATTHEW 8: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More