MATTHEW 24
24
Achineki Kütsaveni keu
(Mk 13:1-2; Lk 21:5-6)
1Jisü no achineki qhive no wuche kelo pa khopemi no ighi püzü achineki pa kichepiye. 2Panongu vilo pa no pi, “Nongu ye hi kümtsü ithulu anima? Kuchou no I no nongu vilo piani, hile atu lakhimu lakhi shou küqape ngomo no qhoi tuleqhive nani.”
Tiqheli Shekuho lo Amchipu
(Mk 13:3-13; Lk 21:7-19)
3Jisü no Olive Toghi lo iqa akelo, akhopemi no lomoshi ighi no pa vilo pi, “Kughou no hipaqo shinani eno no ikighi lo ngo tiqheli shekuho lo kiu michipu anani keno ni vilo pitsü nima?” 4Jisü no panoqo khochile, “Khuu pelomu nongu saküghüzü pemoni ke jukutolo. 5Kughengu kutomo no I je lono, ‘Niye Messiah ke,’ ipi ighi no timi kutomo saküghüzü nani. 6Nongu no aghükishi eno aghükishi sütsa veküpha keu chilu nani, ikemu thüghüi kevilo. Kughengu hi ye ighi masae, ikemu ashekuho ye kumphie. 7Kughengu shiye lakhi no lakhi sasü aghüshi nani, kükaqha lakhino lakhi le nani, püqümiye ngo ayeghi küghütha no a-a kütüta lo ipeghi nani. 8Hi kümtsü apunu küsü hukuthu likhi aphie.
9“Tileno nongu pesü shikighime eno pithive penike küghaluve nani, shiye kümtsü no I je ghenguno nongu jumithi nani. 10Kutomo no aküpülü pheve nani, lakhino lakhi thechu nani, eno lakhino lakhi jumithi nani. 11Kichile tungkupmi kutomo ipeghi no timi kutomo saküghüzü nani. 12Ayezah kiphikumo no ihulove kehu timi kutomo no kikimiye mkomghaive nani. 13Ikemu khuu no ashekha kutolo kutuu luni keno xaluve nani. 14Eno kungugha yekipe tsakiviu hipau pesü ayeghiqha kümtsü lo sheshu nani, tino shiye kümtsü lau thopi shi nani, tishino ashekha tsala ighi nani.
Aphikümqhüpu Julho
(Mk 13:14-23; Lk 21:20-24)
15“Ikehu kughou Daniel tungkupu no pikeu aphikümqhüpu julho no akimthe-a lo puthugho aghikeu nongu no ithuluni keno (phikulumi no akiqi ithikuthu luvelo),#Dan 9:27; 11:31; 12:11; Lk 21:20 16khunono Judea lo ani keno naghuto lo povelo. 17Aki kütsüqa lo akemi no pa ki alou anhemgha lunike aqhou iqi kevilo, 18alu lo hu akemi no paw hebephi lunike ideighi kevilo. 19Tipa ghuloki lo mishi chekemi ngo anga pini chekemi hasapue! 20Süsütusho momu Sabbath lono kuhakive pokepu shimoni ke khuini alo. 21Kughengu ayeghiqha hukuthu lono ishi kutolo shimphi keu eno khilemu shimoni keu aghime kitikhi ighi nani. 22Alhou no tipa tsalaqo ghitha kughukhove tsümoke aye timi khumu xümla nani. Ikemu kishekiphemi ghenguno tipa tsalaqo ghitha kughukhove tsü nani. 23Tile khuana no nongu vilo, ‘Julo, Messiah hi cheni!’ momu ‘Pa ye hule ani!’ ipi namu pülü kevilo. 24Kughengu kichile Messiah ngo kichile tungkupmi ipeghi no kishekiphemiu ghi saküghüzüve nike amchipu ngo akümzapu kümla kije shi nani. 25Julo, I no asheazü shi nongu vilo pivae. 26Ikehu, khuana no nongu vilo, ‘Julo pa ye yenguyi ke-a lo ani,’ ipi namu tilau wu kevilo; momu, ‘Pa ye achebo alou lo ani,’ ipi namu, ti pülü kevilo. 27Kughengu tsütsüpha no kipelau ipeghi kelo kulolau kutolo yepüvü ketoi, Timi Nu ikighi lo ghi titoi nani. 28Khile khilemu akithi kumo akeu lo küzüva lhuquqo anani.
Timi Nu Ikighi
(Mk 13:24-27; Lk 21:25-28)
29“Tipa tsala lo aghime kitikhi tave kemtsa khetsünhe no zümoive nani, aqhi no aküvü tsümove nani, ayepuqo no atsütsü lono ikiqive nani, eno atsütsü lo küka jeliqo sükiniqhi nani. 30Tileno Timi Nu michipu atsütsü lo ipeghi nani, ayeghi lo ashiaye kümtsü no mloqa nani, eno Timi Nu no khüngküsü lo aküka eno ajuküvü kije lono chekeu timiqo no ithulu nani. 31Afuko ghügha vekipighi igha no pa no paw kungumi puwu nani, ayeghi cheku bidi lono, eno atsütsü shekichi lono paw kishekiphemi panongu no hekütsü nani.
Mububo launo Ithilo
(Mk 13:28-31; Lk 21:29-33)
32“Mububo launo shika lulo: tipa loka no apishe ipeghi püzü anipa mini ipeghive kemtsa mütsü tusho cheae pi nongu no ithive cheni. 33Tihutoi, nongu no hi kümtsü ithulu kelo ado ye aphivilo, khagho tovae pi ithilo. 34Kuchou no I no nongu vilo piani, hipa tiqhelimi no xüaphi lono hi kümtsü shi nani. 35Atsütsü ngo ayeghi ye hauve nani, ikemu I tsa ye khilemu hauvemo nani.
Khunomu Ado Mthae
(Mk 13:32-37; Lk 17:26-30,34-36)
36“Ikemu tipa tsala eno atüqhüdo ye khunomu mthae, kungumiu ghi mthae, Anu thotsü mthae, ikemu Apu likhino ithi ani. 37Kughengu Noah tsala lo toi Timi Nu ikighi lo ghi tishi nani. 38Atshünazü ighi mphi lono wo Noah no ashukaki lo iloke tsala kutolo timiqo ye chusho eno külakupu shiae. 39Atshünazü ighi no panongu yipe wuve moke kutolo panoqo ye ithimoe, Timi Nu ikighi lo ghi titoi nani. 40Tile timi kini no alulo hu akelo lakhi sawuve no lakhiu ye qhive nani. 41Totimi kini no athi shesü akelo lakhi sawuve no lakhiu ye qhive nani. 42Tighenguno kutope khelo, kughengu kiu tsala lono nongu Mpeu ighi nani keno nongu ye mthae. 43Hi ithilo, aki mpeu no putho lo kiu ghuloki lono küpkami ighi cheni keno ithike aye, küpkami pelo pa ki hepho iloghi pemoni ke pa ye kheani cheke. 44Tighenguno nongu ghi kutope khe masae, kughengu Timi Nu ye nongu no huqhe moke ghuloki lono ighini cheni.
45“Tishiaye, khuu no pükhübekulu eno alokütsü qeu kea? Pa mpeu no pa pelo ado achipi lono aqemi kütami peitha eno achuqupu tsü penike akibo kulhuqhipe tsüve keu huke. 46Aqeu no tishi mla akelono pa mpeu no aki lo ighi püzü ithulu aye pa kümghapue. 47Kuchou no I no nongu vilo piani, pa mpeu no aqeu lau pa küakini kümtsü kulhuqhive tsü nani. 48Ikemu kixikila qeu no pa ampi vilo, ‘I mpeu ye munuve nani’ ipi no 49aqemi kütami ghaqhi, eno shokümzümi sasü chusho thuve aye, 50pa no huqhe moke tsala lono eno mthake tüqhüdo lono pa mpeu ighive nani. 51Ampeu huno pa küghape hethapinyi nani, eno keghilishi kemi gholo qhive nani. Tilehi küqa kumlo eno ahu tsüghü bubushi nani.
Currently Selected:
MATTHEW 24: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More