MATTHEW 22
22
Külakupu Ghulhu
(Lk 14:15-24)
1Jisü no itaghi kimghikipiye lono timiqo pütsa, 2“Kungugha yekipe ye kükami lakhi no pa nu ghenguno külakupu ghulhu kutotsü ketoi ke. 3Pa no kuküsümi kusaghi penike pa qemi puwu, ikemu panongu no ighini shimove. 4Itaghi pa no aqemi kütami puwu no pi, ‘Kuküsümi vilo pilo, “Ni ye I ghulhu kutope qhivae, athakupu mishitsü ngo amshiti heqhi no qhoi kutope ani. Külakupu ghulhu lo ighilo.”’ 5Ikemu panongu no iniküküzüi chekhave, lakhi no pa lulo huve, lakhi no paw lhidi-a lo wuve, 6eno kütami no pa qemi tsüqüpe peitha püsa eno pithivetsü. 7Akükau no axuidepe paw ghüshimi puwu no hekiqhimi tipaqo pithive eno pano phughi pitive tsü. 8Tishino pa no pa qemi vilo pi, ‘Külakupu ghulhu ye kutope ani, ikemu kuküsümi no ighi küzüpu kumove ke. 9Tighenguno alaghila lo wuno nongu no ithuluke thaqhü külakupu ghulhu lo kusülo.’ 10Aqemi tipaqo no alaghila lo wuno sholuke thaqhü akivimi alhoksami kümtsü kusaghi. Ikehu külakupu-a ye inami no chhitoive.
11“Ikemu kughou akükau no inami juniye iloghi keno, pa no tile timi lakhi külakupu phimini pepumo no akeu ithulu. 12Eno pa no pi, ‘Ashou, no ye külakupu phimini pepumo no hile kishi iloghilu kea?’ Timi huye kiu tsamu pimlave. 13Tileno akükau no jukükütsümi vilo pi, ‘Pa phiau pheve no khalau aküzü lo vepheve lo, tile ahu tsüghü bubushi qa nani.’ 14Kughengu kutomo kue, ikemu aghulo likhi kishelue.”
Asüqha pesü Caesar Tsükeu
(Mk 12:13-17; Lk 20:20-26)
15Tileno Phariseemi ye wuve no pa tsa lono pa kitime niye kuchughu. 16Panongu no pano khopemi khami gholo Herod papemi ishi Jisü lau puwu no pipe, “Shikükau, nino ithi anike no ye kuchou eno kuchou shi Alhou laghi shika cheni, eno kütami no o züluve pe chemoe, kughengu no ye ashou koghe juchemoe. 17Ikehu no ye kiu kümsü ani keno ni vilo pilo. Ayezah kiqilo Caesar lau asüqha tsü kelau kemo kea?” 18Ikemu Jisü no pano lhoksa kukughu ithive no pi, “Nongu keghilishi chekeqo, kushiye I peju ani kea?” 19“Asüqha pisa muno I piyelo.” Panongu no ghükayi lakhi pa lau süghi. 20Jisü no panoqo vilo ighiju, “Hi ye khuu julho eno khuu je kea?” Panongu pi, “Caesarw ke.” 21Jisü no panoqo vilo pi, “Tishiaye Caesarw no Caesar tsülo, eno Alhouw no Alhou tsülo.” 22Panongu no ti chilupe akümzave, eno pa qhive no wuve.
Xüchilekulu Vehu Ighiju
(Mk 12:18-27; Lk 20:27-40)
23Tipani xüchilekulu kühae piche keqo Sadduceemi no Jisü lau ighi no pa vilo ighikuju tsa iniju, 24“Shikükau, Moses no pi, ‘Milakhi no atianuli kühano thive aye, pa thiküzüu no pamu nipu sasü külave no pa sala atianuli shitsü masae.’ 25Ningu gholo athiküzümi tsüni ache, akichiu no akibo shi püzü atianuli shimono thive eno pa nipu ye pa thiküzüu no valuve. 26Titoi athiküzüu akiniu eno aküthüu lono akütsüniu kutolo tishive. 27Ashekha lo atopuu ghi thive. 28Ikehu xüchilekulu tsala lo li ye khuu nipu shinani kea? Kughengu li ye panongu kümtsü nipu ke.”
29Ikemu Jisü no panongu khochile, “Nongu ye pimi ani, kughengu nongu ye Kuchoyesü na Alhou küka namu mthae. 30Kughengu xüchilekulu tsala loye külakupu shimono kungugha lo kungumi toive nani. 31Eno kithimi xüputhu keu vehu loye Alhou no nongu vilo ishi pikeu nongu ye phimla keshea? 32‘Ni ye Abraham Lhou, Isaac Lhou, eno Jacob Lhou ke.’ Pa ye küxümi Lhou kethono kithimi Lhou kumoe.” 33Kughou aqokitikhi no ti chilu keno akümza qhiyive.
Ayezah gholo Akhotou
34Kughou Jisü no Sadduceemi ghesüve keu Phariseemi no chilu keno panongu no kümtsa ighi. 35Tipaqo gholo Ayezah shikükami lakhi no Jisü peju nike ighikuju tsa iniju, 36“Shikükau, Ayezah lo khikhi no azakütsü akhotou kea?” 37Jisü no pa vilo pi, “No ye o mlo kuchopu, o ngulho kümtsü, o kükümsü kümtsü eno o kumto kümtsü pesü Ampeu o Lhou kimiyeni. 38Hi no azakütsü gholo akhotou eno atüghüu. 39Eno akiniu no: No ye o likhi o toi o kisüghümi kimiyeni. 40Moses Yezah ngo Tungkupmi kaku kümtsü azakütsü hi küma shou bepe ani.”
Messiah ye Khuu Nu Kea?
(Mk 12:35-37; Lk 20:41-44)
41Phariseemi no kumqo akelo Jisü no panoqo vilo ighikuju tsa iniju, 42“Nongu ye Messiah vehulo kiu kümsü cheni kea? Pa ye khuu nu kea?” Panongu no pi, “Pa ye David nue.” 43Tile pa no pi, “Imaye kushiye David ye Aghungu lono pa vilo Ampeu ipi kea? David no pike,
44“‘Ampeu no I Mpeu vilo pi,
“I no o ghümi pesü o pukhu
qholo qhitsü moke kutolo I u ajeu iqalo.”’#Lesh 110:1; Apo 2:34,35; Ibr 1:13
45Tishiaye David no pa vilo Ampeu ipi aye, kishino Messiah ye David nu kea?” 46Khunomu atsa lakhimu pa khochile mlave, eno tinguno tilauye khuana no pa vilo ighikuju inijuni keu ighüve.
Currently Selected:
MATTHEW 22: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More