MATTHEW 16
16
Amchipu Khu
(Mk 8:11-13; Lk 12:54-56)
1Phariseemi ngo Sadduceemi no Jisü lau ighi no pa pejuni ye kungugha lono amchipu piyelo pi khu. 2Jisü no panoqo khochile, “Kughou kijiliu shiveni keno nongu no, ‘Atsütsü ye huchuyi ani keke atsala aloni cheni’ ipi cheni. 3Eno inaqhe nongu no, ‘Atsütsü ye huchuyi eno züchiyi ani keke ishi ye pasapagha tsala shinani’ ipi cheni. Nongu ye atsütsü lo juno atsala kiu toi nani keno pilu cheni, ikemu ado aghuloki michipuqo kiqilu chemoe. 4Kixikila eno amikucho kumo tiqhelimi no amchipu phucheni, ikemu Jonah michipu nguno alau kütau michipu ye tsümo nani.” Tishino pa ye panoqo qhive no wuve.#Mt 12:39; Mk 8:12-13; Lk 11:29
Phariseemi, Sadduceemi Kholaqhi
(Mk 8:14-21)
5Kughou akhopemi no azü kathasü tüxau ikughi keno, panongu ye asho süghini keu kümsümave. 6Jisü no panoqo vilo pi, “Phariseemi ngo Sadduceemi kholaqhi jukuto no kutokupui alo.” 7Panongu dolono ishi küptsa kile thuve, “Ningu no asho süghimo kehu pa ye ishi pianie.” 8Ikemu Jisü no ithive no panoqo vilo pi, “Nongu aküpülü kulotiqo, kushiye nongu ye asho süghimo keu vehu küptsa kile ani kea? 9Itehi kutolo nongu ye ithikuthu mla aphi kea? Ashopa pungu pesü timi 5,000 tsükeu eno ashoghi khije nongu no likütsülu keno kümsü luamo keshea? 10Momu ashopa tsüni pesü timi 4,000 tsüno ashoghi khije nongu no hekütsülu kea? 11Ni ye asho vehu piamo kepi kushiye nongu ye vethalumo kea? Phariseemi ngo Sadduceemi kholaqhi jukuto alo.” 12Tileno pa ye kholaqhi asho lo peitha chekeu kumono Phariseemi ngo Sadduceemi kükütsü jukuto luvelo pi akenapi panoqo no vethalu.
Peter no Jisü Je Piphetsü
(Mk 8:27-30; Lk 9:18-21)
13Kughou Jisü no Caesarea Philippi tokukujo lo ighi keno, pa no pa khopemi vilo ighiju, “Timiqo ye Timi Nu pesü khuu ipi cheni kea?” 14Panongu no pi, “Khami no Baptiz kishiu John ipi cheni, khami no Elijah ipi cheni, kütami khami no Jeremiah momu tungkupmi lakhi ipi cheni.” 15Panoqo vilo pa no iniju, “Imaye nongu ye ni ye khuu ipi cheni kea?” 16Simon Peter no khochile, “No ye aküxüpu Lhou nu Messiah ke.” 17Jisü no pa vilo pi, “Jonah nu Simon, no ye akümghapue! Kughengu timi shi aji no o lau hi pephe piyeke kumoe, ikemu I Pu kungugha lo akeu noke. 18I no o vilo piani, no ye Peter, eno atuqu hipau shou no I no I kukuhou shipukuni, eno Kithigha khagho ye tipau shou tomla nani. 19I no kungugha yekipe khaqhiyi o tsüni, eno ayeghi lo nono kiu kiumu lakhave keu ye kungugha lo ghi lakhaveni; ayeghi lo nono kiu kiumu kuqhove keu ye kungugha lo ghi kuqhoveni.” 20Tishino Jisü no pa khopemi vilo khuu vilomu pa ye Messiah ipi kevilo pi tsatsai azah shive.
Jisü no Pa Kithi Pichho
(Mk 8:31-9:1; Lk 9:22-27)
21Tipa ghuloki lono Jisü ye pa khopemi vilo tucheche pa ye Jerusalem lo wuno kichimi eno achinetomi ngo Ayezah shikükami u lono ime masa keu, eno pithive no aküthüni no xüthughini keu vehu pithuve. 22Peter no Jisü kusawo lomipi ghi pi, “Tishimla thono Ampeu! Khilemu o lau hipau shimo nani.” 23Ikemu Jisü no tsüghüwo Peter vilo pi, “I launo wuvelo, Satan! No ye I püxa ani, kughengu no ye Alhou kükümsü kumono timi kükümsü ghola lo ani.”
Ow Kros Xapu Jisü Papelo
24Tishino Jisü no pa khopemi vilo pi, “Khukhumu I papeni keu ye pa ampi milive no paw kros xapu I papelo. 25Kughengu khunono pano küxü pükhani keno pühave nani, ikemu khunono I ghenguno pa küxü pühaveni keno ti phulu nani. 26Timi lakhi no ayeghiqha kümtsü paw shive namu pa küxü pühave aye pa ghenguno kiu ala ani kea? Momu timi ye pa küxü theli lo kiu pesü tsülu nani kea? 27Kughengu Timi Nu ye Papu juküvü lono paw kungumi sasü ighini cheni, eno pa no milakhi khino kiu mla püaghini keno tipau kiqi lono tsüchile nani. 28Kuchou no I no nongu vilo piani, hile puthugho akemi khami ye Timi Nu no pa yekipe süghi keu ithulu moke kutolo akithi michemo nani.”
Currently Selected:
MATTHEW 16: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More