MATTHEW 15
15
Apuasü Khuaye eno Azakütsü
(Mk 7:1-13)
1Tithiu Phariseemi ngo Ayezah shikükami Jerusalem lono Jisü lau ighi no pi, 2“Kushiye o khopemi ye püzüu apuasü khuaye hexave cheni kea? Kughengu panongu ye chuni kelo pano u mütsü chemoe.” 3Jisü no panoqo khochile, “Le maye nongu ye kushiye nongu no khuaye pape niye Alhou zakütsü hexave cheni kea? 4Kughengu Alhou no azah tsüke, ‘O pu ngo o za gihulo,’ eno ‘Khukhumu apuaza ghusho keu ye mtsüqheino thive masae.’#Ipe 20:12; 17 5Ikemu nongu no picheni, ‘Khuana no pa puaza vilo, “I no kiu o tsülu kepushi akeno, ti ye Alhou tsüvae” ipive aye, 6pa ye papu gihu amasa kelau kumoe.’ Ikehu nongu khuaye ghenguno Alhou tsa abokümsa shive tsüae. 7Nongu keghilishi keqo! Isaiah no nongu ghenguno achipi shi tungkuptsa pitsü kena:
8‘Timi hipaqo ye akichi loye
I gihu cheni kemu pano mlo ye I launo putou ani;
9Panongu ye abokümsa I mlla,
timi no mlakeu yezah pesü Alhou yezah toi shika cheni.’”
Timi Shikuchhube chekeu
(Mk 7:14-23)
10Jisü no timiqo pa lau kuno pi, “Inilo eno vethalulo: 11akichi lo kiu ilo keno tino timi shikuchhube chemoe, ikemu akichi lono ipeghi keu no timi shikuchhube cheni.” 12Tileno pa khopemi no pa lau ighi no pi, “Nono pikeu tsa no Phariseemi mlo pünave tsüapi no ye ithi anima?” 13Pa no khochile, “I Pu kungugha lo akeu no shosümo keu sübo thaqhü nhüve nani. 14Palokuto lo; panongu ye anhethi kighiche lapiyemi ke. Anhechemi no anhechemi saphe aye, pama kinikujo aqo lo ilove nani.” 15Ikemu Peter no pa vilo pi, “Kimghikipiye ni vilo chixechilei pitsülo.” 16Jisü no pi, “Nongu ye itehimu vethamla aphi keo? 17Kiu kiumu akichi lo ilo keu no akive lo ilove püzü tino tübatüzü shi ipeghive chenie pi nongu ye mtha keshea? 18Ikemu akichi lono kiu ipeghi keno ti ye amlo lono huthuphe cheni, eno tino timi shikuchhube cheni. 19Kughengu amlo lono alhoksa kükümsü ipeghi cheni, ghikiqhi, asalha, ghaghu ghale, aküpka, akimki shepe, xikishi. 20Hipaqo no timi shikuchhube cheni kethono au mütsü mono chusho keu no kumoe.”
Canaanmi Topumi Küpülü
(Mk 7:24-30)
21Tishino Jisü ye tipa-a qhive no Tyre ngo Sidon tokukujo lo wuve. 22Ikelo Canaanmi topumi lakhi tipa cheaxü lo achekeu no pa lau ighi no ighamku pi, “O Ampeu, David Nu, I kimiyekütü tsülo; I nga ye tüghami no shishe ghime ani.” 23Ikemu Jisü no atsathi lakhimu li pütsamoe. Pa khopemi no pa qhüiniju pi, “Li puwuve lo, kughengu li ye ighamku ningu pape cheni.” 24Pa no khochile, “Israel lagha lo püha püakeu mbeqo lau likhi I puwu püanie.” 25Ikemu li no ighi no pa zülo qhoqhünhe püzü pi, “Ampeu, I kuphu tsülo.” 26Jisü no li khochile, “Anuliqo chuqupu ikhipe atsüqo zülo pheqhi tsüni keu ye achipi kumoe.” 27Li no pi, “Iyei, Ampeu, tishinamu atsüqo ghi pano mpeu ghulhu lüpa lo phekiqhi kighi chu chenie.” 28Tileno Jisü no li vilo pi, “O totimi, o küpülü ye kije kena! Nono pulo aketoi o ghenguno shitsü peniu.” Eno li nga ye tipamtsa viluve.
Jisü no Kutomo Shipivi
29Jisü no tileno chesü Galilee Züghi mkülo wuve. Pa no naghuto lakhi lo iqho püzü tile iqa ae. 30Eno aqokitikhi kije no panoqo gholo ayiku küghüpami, anhechemi, aphiau kinitave kemi, atsa pikümlami eno küsükinimi kutomo saghi no Jisü pukhu philo qhitsü; eno pa no panoqo shipivitsü, 31kughou atsa pikümlami no pilu, aphiau kinitave kemi no achipi shive, ayiku küghüpami no alachelu eno anhethi kighichemi no ithulu keno aqokitikhi ye akümzave. Eno panongu no Israel Lhou akishe tsü.
Jisü no 4,000 Loji
(Mk 8:1-10)
32Tithiu Jisü no pa khopemi pa lau kuno pi, “Ni ye aqokitikhi shou amloighivae kughengu panongu ye atsala küthü kutolo I gholo ngova püzü itehi ye chukepu kiumu kühavae. Eno ni ye akhüava shi panongu puwoveni shiamoe, tikumo aye panongu ye ala lono ikiqive nosae.” 33Tileno akhopemi no pa vilo iniju, “Yenguyi ke-a hikithipu lo khile no aqokitikhi kije lojini ke achuqupu lukümkhashi ithuluni kea?” 34Jisü no panoqo vilo ighiju, “Nongu ye asho khije ani kea?” Panongu no pi, “Ashopa tsüni eno akha aghulo hami ani.” 35Jisü no aqokitikhi pelo ayeghi lo iqave peniye kichetsü ghi 36pa no ashopa tsüni eno akha ikhipe shikimthi tsüno süphope pa khopemi tsü, eno akhopemi no tipaqo pesü aqokitikhi tsüe. 37Panongu kümtsü no aghapiqi chuluve. Eno munomugho chukha kumo akhopemi no ashoghi tsüni kiche kütsülu. 38Totimi ngo ititunu nguno alau timi 4,000 no chue. 39Aqokitikhi puwove kethiu Jisü no ashuka lo ikuve no Magadan cheaxü lo wuve.
Currently Selected:
MATTHEW 15: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More