MATTHEW 10
10
Apostolmi Chighikini
(Mk 3:13-19; Lk 6:12-16)
1Tishino Jisü no akhopemi chighikini pa lau kukumqo no panongu pelo aghau lhoksaqo qhasülu eno haphelu penike, eno aküsü ghime jeli kümtsü shipivilu penike aküka tsü. 2Apostolmi pano chighikini je ye: atüghüshi, Simon, khuu Peter ipiche keno, eno pa thiküzüu Andrew; Zebedee nu James, eno pa thiküzüu John; 3Philip eno Bartholomew; Thomas eno asüqha küqhau Matthew; Alphaeus nu James eno Thaddaeus; 4Aza yeghi kikimiyeu Simon; eno Jisü thechuve keu Judas Iscariot.
Jisü no Chighikini Puwu
(Mk 6:7-13; Lk 9:1-6)
5Jisü no pano chighikini lau akükütsütsa tsüno puwu, “Jewkumomi lau momu Samariami phughi lo wu kevilo, 6ikemu Israel lagha lo püha püakeu mbeloji lau wulo. 7Nongu no wuche kelo ishi sheshu lo, ‘Kungugha yekipe ye kupunu khoivae.’ 8Küsükinimi shipivi lo, kithimi xüputhu lo, apüghami shikimthe lo, tüghami haphelo. Ame tsümono nongu no ithulu kehu ame lumono tsülo. 9Ameshoyi, ghükayi, momu asapuyi pisa achekha lo pusü wu kevilo, 10nongu ghüzüla lo süqhu#10:10 Jolabo ipi chekeu pewu moni, momu aphiküzü ala na, apukhuqho na, aküsü namu pemoni, kughengu akümlakishiu ye pa no avehupu shikeu ithulu küzüke. 11Aphughi lona aphu lomu nongu no ilo kelo, khuu no gihuküzüpu eno titoi nongu ikhiluni keno nongu no phujulo, eno tipa-a qhimoke kutolo nongu ye tile ngolo. 12Nongu no aki lo ilo kelo, alovi petha shilo. 13Eno akibo tipau lo ngoküzüpu shi aye, nongu no aloino keu inibe tsülo, ikemu akibo tipau no aküzüpu kumo aye, nongu kighini ikhichile luvelo. 14Tsala khunomu nongu sasümo momu nongu tsa ini tsümo aye, nongu no aki momu aphughi tipau qhive no ipeche kelono nongu pukhu lo ayeghimkhu ikuve keu ghi kukhu qhivelo. 15Kuchou no I no nongu vilo piani, küghakütha tsala lo Sodom ngo Gomorrah ghimeu no tipano ghami nguno puqhekulu shinani.
Shikimghi Ighi nani
(Mk 13:9-13; Lk 21:12-17)
16“Julo, ambe no tüngtügha dolo ilolu akeshi I no nongu puwu ani, tighenguno apighi toi tsükhüi lo eno miqhedu toi ivünheilo. 17Timiqo jukuto lo, kughengu panongu no nongu sasü pano hoho zülo wunani eno sinagog lono akighikipili pesü nongu heqhi nani, 18nongu sünhe sasü angh ngo kükamiqo lau wunani, ti ye panoqo eno Jewkumomi zülo I je ghenguno ashepe shilu peniye ke. 19Kughou panongu no nongu küghani keno, nongu ye kishi pini momu kiu pini kea pi kütakihi kevilo, kughengu nongu no kiu pikepu keno, atüqhüdo ighi kelono nongu tsü nani. 20Kughengu atsa pini keu ye nongu no kumoe, ikemu nongu Papu Ghungu no nongu vecheo pi nani. 21Athiküzü achelimi dolo lakhino lakhi pithive penike tsüve nani, apu ngo atianuli dolo, eno atianuli ngo apuaza dolo ighü mono pithive penike ikhiphe tsü nani, 22I je ghenguno timi kümtsü no nongu mithi nani. Ikemu khuu no ashekha kutolo puqhe luni keno, pa xalu nani. 23Kughou aphughi lakhi lono nongu pishipujuni keno, kütau lakhiu lo povelo, kughengu I no kuchou no nongu vilo piani ke nongu no Israel lo aphughi kümtsü lo wumphi lono Timi Nu ighive nani.
24“Akhopeu lakhi ye pa kükütsüu nguno akijeu kumoe, momu aqüaxeu ye pa mpeu nguno akijeu kumoe. 25Akhopeu ye pa kükütsüu kimihi shilu keu no lukümkhae, tihutoi aqüaxeu ghi tishike. Timiqo no akibo mpeu vilo Beelzebul ipi kucheni aye, pa kibolomi kütami vilou ye kishi aje küsa tsünani kelae.
Msa Kevilo
(Lk 12:2-7)
26“Ikehu panoqo msa kevilo, kughengu thime lakhimu pephe mono nhave keu shimo nani, momu ithi pemono küsüve keu shimo nani. 27I no aküzü lono nongu vilo kiu piani keno, aküvü lono pilo, eno nongu no kiu aqhou tsa chilu ani keno, aki kütsüqa lono sheshulo. 28Khunoqo no aphimpi pithivetsü cheni mu angulho ye pithilu chemo keno, nongu ye panoqo msa kevilo. Tishini kepu ye Alhou khuu no alhomi lono aphimpi ngo angulho kütsalu nani keno, Pa msalo. 29Tüghashoqhi kini ye pisa muno me qhemike kumo? Ikeghi nongu Papu sümo keloye tipaqo lakhimu ikiqimo nani. 30Eno nongu ghengu ye no kütsüsa kutolo kihipe püani. 31Tighenguno msa kevilo, nongu ye aghau kümtsü nguno ameküapu ke. 32Tishiaye khukhumu aqha zülono I je piphetsü keu ye ni ghi I pu khuu kungugha lo ani keno, Pa zülono piphetsü nani, 33ikemu khukhumu aqha zülono ni milive keu ye ni ghi I pu kungugha lo akeu zülono milive nani.
Alakishi Kumono Azüta
(Lk 12:51-53; 14:26-27)
34“Ni ye ayeghi lo alakishi süghini ye ighi anipi kümsü kevilo. Ni ye alakishi kumono azütakikihi süghi niye ke. 35Kughengu I no ighi keu ye anu no apu hebide, anga no aza hebide, eno amukishiu no ani hebide peniye ke, 36tishikeu lono timi lakhi ghümi kuchou ye pa kibolomi no shinani. 37Khukhumu apu momu aza kimiye akeu nguno alau I kimiyemo keu ye I laumi shiküzüpu kumoe, eno khukhumu apuanga kimiye akeu nguno alau I kimiyemo keu ye I laumi shiküzüpu kumoe. 38Khunono paw kros xapu mono I papeni keno pa ye I laumi shiküzüpu kumoe. 39Khunono pa küxü pükhani keno pühave nani, eno khunono I je ghenguno pa küxü pühaveni keno phuluve nani.
Asaxü
(Mk 9:41)
40“Khukhumu nongu ikhilu keu ye ni ikhilu ani, eno ni ikhilu keu ye I puwu keu ghi ikhilu ani. 41Tungkupmie pikeu je lono khuu no alokivishi tungkupmi ikhiluni keno tungkupu saxü ithulu nani, eno khuu no timi lakhi ye Alhou lopushi xüche kemi kepi ithi no pa ikhiluni keno, Alhou lopu saxü ithulu nani. 42Khuu no I khopemie pikeu je lono azü kumko ajukhu lakhi pesü hipaqo gholo aghulou piyeni keno, kuchou no I no nongu vilo piani, pa ye kiu gholau nomu asaxü pühave monani.#Mk 9:41
Currently Selected:
MATTHEW 10: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More