MALACHI 1
1
1 Ampeuw tungkuptsa Malachi vecheo Israel tsü.
Israel ghenguno Ampeu Kikimiye
2 Ampeu no pi, “I no nongu kimiye ke.” Ikemu nongu no pi, “No ye kishi ningu kimiye kea?” “Esau ye Jacob pamu kekumo?” ipi Ampeu no asheshu. “Ikeghi Ni ye Jacob kimiye 3eno Esau ye I no mithi ke. I no pa toghi ghüna kütsave tsü eno pa mheghi pesü asayeli lo atineqo sala qhivetsüe.” 4Tsala Edom no, “Ningu ye kütsalevae ikemu ningu no tipaqo shiqhe kitheni,” ipi aye, aqokitikhi Mpeu no, “Panongu no shiqhe anamu I no xaleqhive tsü nani, panongu pesü ‘küsakügha ghakhu,’ eno ‘pülhapuju Ampeu mlokighide ye timi hipaqo shou ani,’ ipi nani.” 5Nongu nhethi ampi no hipau ithulu nani, eno nongu no pi nani, “Ampeu ye Israel lughi nguno hulau ghi kije ke!”
Kitiqeve keu Kümllagho
6“Anu no apu gihu, eno aqeu no ampeu gihu cheni. Tsala I no apu lakhi shi aghi aye, I gigihupu ye khile ani kea? Eno tsala I no ampeu shi aghi aye, I sümsa keu ye khile ani kea? ipi aqokitikhi Mpeu no nongu achinemi, khunoqo no I thaigha cheni keno tipaqo vilo pi. Ikemu nongu no pi, ‘Ningu ye kishi O jukünatha kea?’ 7Kitiqeve keu chuqupu I kümlla khache lono mlla keu vecheo ke. Ikemu nongu no pi, ‘Ningu ye kishi O jukünathave kea?’ Ti pikeu lono Ampeu khache shikitiqeve peniye ke. 8Kughou nongu no anhethi kighiche lhoxü pesü aghashi mllani keno, ti ye küsakügha kekumo? Eno nongu no lhonima momu aküsü lhoxü pesü mlla keu ye küsakügha kekumo keshea? Tipau pesü nonguw Angh agho chhejulo; pa ye nongu ikhilu momu kimiye tsü nani keshea? ipi aqokitikhi Mpeu no pi. 9Eno itehi ye Alhouw kimiyekini qhüiniju lo, tishi aye Pa no ningu küpüqhiyi luvike. Agho titoi keu lakhi vecheo Pa ye ningu lau küpüqhiyi keu piyeni keshea? ipi aqokitikhi Mpeu no pi. 10O nongu gholo timi lakhi ahukikhaqo khave peni kemi aghi ke aye I kümlla khache-a lo akulu adou lono küiqü pemoni cheke! Ni ye nongu lau alokiqipu kühae, aqokitikhi Mpeu no pi, eno nongu u lo akümllagho ye I no ikhilu tsümo nani. 11Kughengu khetsünhe ipeghike lono ilo moke kutolo I je ye shiyeqo dolo kije shi nani, eno a-a kümtsü lo tsüngqüi keu kümllagho eno akimthe kümllagho I je lono mlla nani. Kughengu I je ye shiyeqo dolo kije shi nani, aqokitikhi Mpeu no pi. 12Ikemu kughou nongu no Ampeu kümlla khache ye shikitiqevae ipini keno tileno nongu no I je shikitiqe ani, eno tipau lo xathi, ti ye achuqupu, jukünatha peniye ke. 13Ikemu nongu no, ‘Hi ye kiu makho kelae,’ ipi no akuchhoma shi cheni, aqokitikhi Mpeu no pi. Nongu no ngukangugha lono luvetsü keu eno kiu no lhonima momu aküsü akeno tipau pe akümllagho shi süghi ke! Tipaqo ye I no nongu u lono ikhilu kepu keshea? ipi Ampeu no pi. 14Pishikiqhiu khuu no ambeloji lo atsü lakhi akeu pesü mllani kepi tushoqhive no tukutiye akeu pesü Ampeu lau agha shini keno pa ye angusüpue. Kughengu Akükau akijeu ye Ni ke, aqokitikhi Mpeu no pi, eno shiyeqo dolo I je sümsa nani.
Currently Selected:
MALACHI 1: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More