Zekaria 8
8
Baŋa Wɛ wó swɛ o nɔɔna bam swolim
1Paŋwa Tu Baŋa Wɛ kwora daa ta ma yi amo we, 2Paŋwa Tu Baŋa Wɛ na tage tei to mo tento:
“Amo yiga tiini ka wo Zion teo kom wone. A yi na page ba baŋa ne to ŋwaane mo pa se a ban-lom zaŋe de ba dona bam.”
3 Baŋa Wɛ na tage tei to mo tento:
“Amo lage a jwoori a ba Zion teo se a taa zoore Jerusalem teo kom wone. Nɔɔna laam maa wó taa jege Jerusalem teo kom ba bwoi we, ‘Chega tɔgem teo,’ ye ba daare ba bwoi Paŋwa Tu Baŋa Wɛ peo kom we, ‘Peo kolo na ye wose to’.”
4Paŋwa Tu Baŋa Wɛ na tage tei to mo tento:
“Baara de kaana na tiini ba kwe ye ba zi nachei mo ba vei to daa wó taa tole Jerusalem teo pempala yam yuu ne falalala, ye ba jei ba lara. 5Teo kom ta wó su de bakeiri de busankane mo na kare ko chwei sem yuu ne ba kwɛɛra.”
6Paŋwa Tu Baŋa Wɛ na tage tei to mo tento:
“Amo nɔɔna balo fenfee ta na daare da yam konto wone to ga wó nii keim dem konto we de wó taa chamma mo de gaale keim. Ko nam ná ye amo, de wó taa chamma de pa-ne se a ke na?” Paŋwa Tu Baŋa Wɛ na tage kolo to mo konto.
7Paŋwa Tu Baŋa Wɛ na tage tei to mo tento:
“Ko ná ye a nɔɔna balo na jage ba vo ba zoore wɛ-puli jei sem ne, de wɛ-zoore jei sem ne to, amo lage a jwoŋi-ba mo a yage. 8A maa wó ja-ba a jwoori se ba taa zoore Jerusalem teo kom wone. Ba maa wó taa ye amo tete nɔɔna, se amo de taa ye ba Wɛ. Dé ta wó taa jege chega dé pa daane.”
9Paŋwa Tu Baŋa Wɛ na tage tei to mo tento:
“Abam laam nigi taana yalo amo sampwori sem déem na jege ba tɛ maŋa kalo nɔɔna na bobo se ba chwi amo diga kam kuri se ba fɔge ba lɔ-ka to. Nam ke-na dam á ke á tete kuri ne.#Hagayi 2:3-4 10Se ko na lwoori maŋa kam konto to, nabiina de vara ya ba nae ba totoŋa yam nyɔɔre. Nɔɔna nam ware se ba nwoŋi ba vo jei jei ba toŋe totoŋa, ba dona bam ŋwaane. Amo ta mo pɛ se nɔɔna vae daane. 11Ko nam na ye tei to, a daa bá ke de a nɔɔna balo na daare to ne a ya na waare a nɔɔna bam tei faŋa to.” Paŋwa Tu Baŋa Wɛ na tage kolo to mo konto.
12“Amo nɔɔna balo ta na daare to ná dugi wodiiru telo maama, te wó ke se yazura taa wora. Ba Vini teeni dem maa wó ke bia lanyerane. Tega kam wó taa ke wodiiru, ye wɛyuu nyɔnɔ de taa toe ko pa-ba. 13Judah de Isarele dwi tiina bam, ne dwi-gɛ tiina bam déem na mɛ á yera ba sɔɔle lwarem ba pa daane tei to, konto mo a lage jwoŋi abam a yage se á lɛɛre á ja Wɛ swolim á ba á pa-ba. Konto to, yé ta‑á fona. Nam ke-na dam á ke á tete kuri ne.”
14Kokuri to, Paŋwa Tu Baŋa Wɛ na tage tei to mo tento:
“Á kwoa bam déem na chuchugi a bane to, a ke a boboŋa ne se a waare abam mo ye a boboŋa wo leiri. 15Konto dwoŋi mo a nam daa ke a boboŋa ne se a fɔge a ke Jerusalem teo kom de Judah dwi tiina bam lanyerane. Konto ŋwaane, yé ta‑á fona-na. 16Nam ta ta‑á ke-na wonnu tento: Ta‑á tɛ-na chega á bere daane, se á daare á ta‑á bore chega bora taane dim baŋa ne, se yazura taa wora.#Efesia 4:25 17Nam yé jeeli-na lwarem á bochara ne se á ke á ma á chɔge á dwonna. Ta yé du-na duuri vwa chwoŋa ne. Amo yɔɔre a chuli kikia yam konto maama mo.” Baŋa Wɛ na tage kolo to mo konto.
18Paŋwa Tu Baŋa Wɛ kwora daa ta ma yi amo we, 19Paŋwa Tu Baŋa Wɛ na tage tei to mo tento:
“Abam déem na vɔge á nia amo ŋwaane chane sena chana kam wone, de chane senu chana kam wone, de chane serepɛ chana kam wone, de chane fuga chana kam wone tei to laam wó ji kura yalo Judah dwi tiina bam maama na wó di ywoni ye ba chaka ya baŋa ne to mo. Nam ta‑á swoi-na se chega de bochare-zuru jeini á tetare ne.”
20Paŋwa Tu Baŋa Wɛ na tage tei to mo tento:
“Dwi-gɛ tiina dedɛ jwa wó nwoŋi ba teene dem ne ba ba ywo-seeni. 21Balo na zoore teo dedoa wone to wó vo ba ta de teo kodwoŋi nɔɔna we, ‘Nam pa-na dé tɔge daane dé vo Jerusalem se dé fɔɔre dé yi Paŋwa Tu Baŋa Wɛ wom tei se dé daare dé lwoori‑o se o swɛ debam swolim. Amo boboŋa jaane mo se a vo da.’ 22Konto to, dwi-gɛ tiina dedɛ na nwoŋi te-fwaaro to laam wó ba Paŋwa Tu Baŋa Wɛ tei Jerusalem ne se ba lwoori swolim o tei ne.”
23Paŋwa Tu Baŋa Wɛ na tage tei to mo tento:
“Maŋa kam konto ná yia, dwi-gɛ nɔɔna fuga na ŋɔɔne taane dwi dwi to wó vo ba to ba gorege Juu tu dedoa. Ba maa wó ta ded‑o we, ‘Popo pa debam chwoŋa se dé tɔge‑m dé vo, kokuri to dé nigi we Wɛ mo wo abam tei ne.’ ”
Currently Selected:
Zekaria 8: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)