Zekaria 5
5
6. Tɔnɔ kolo na jaane wɛɛne to taane
1Amo daa ta ma kwoni a yuu wɛɛne ye a nii a na tɔnɔ mo na yɔɔre ko jaane wɛɛne ko tete ne.
2Maleka kam ma bwei-ne ka we, “Bɛ mo n nii n na?” Amo de ma leiri a we, “A nɛ tɔnɔ mo na jaane wɛɛne. Ko dedɔrem maa ye jatwogo de noa ni maŋem kuni finlei. Ko kayɔlɔ maŋem de maa ye jatwogo de noa ni kuni fuga.”
3O laam ma ta de amo o we, “Tɔnɔ konto jege sensɔle-balɔrɔ mo se ko ja vo ko yi tega baŋa ni maama. Tɔnɔ kom saŋa dedoa wone, ba sɔɔle lwarem mo ba yage balo na ŋɔne to yuu ne we, Wɛ wó saare-ba tega kam wone. Saŋa kadwoŋi kam wone, ba sɔɔle lwarem ba yage balo na bore vwa bora ba ma ba vane ba dwonna to yuu ne we, Wɛ wó saare ba de tega kam wone. 4Paŋwa Tu Baŋa Wɛ nam na pɛ ni delo to mo tento: Amo wó toŋe tɔnɔ konto se ko zo ŋweeno sɔŋɔ, de wolo na mae amo yere o bore vwa bora to de sɔŋɔ. Ko nam ná yi da, ko wó maŋe kotu sɔŋɔ ne mo ko chɔge wonnu maama, se ko kabiri tete, de ko bei sem de da te chɔge.”
7. Kaane wolo na jei garewaa wone to taane
5Maleka kalo na ŋɔɔne de amo to laam ma fɔɔre ka yi a tei ye ka ta de amo ka we, “Nam daa‑n kwoni n yuu wɛɛne n nii kolo na zege da ko beene to.” 6Amo de ma bwei‑o a we, “Woŋo kom konto nam ye bɛ mo?” Maleka kam ma leiri ka we, “Woŋo kolo na beene to ye garewaa#5:6 garewaa naa tetɔgɔ mo.” O daa ta maa we, “Ko zege ko pae tusim kikia yalo nɔɔna na ke tega kam maama wone to mo.”
7A ma nii a na we ba dɔne luu kolo ya na pugi garewaa kam ni to. A laam ma na we kaane mo jei ka wone. 8Maleka kam ma maŋe ko kuri ka bere-ne ka we, “Kaane wonto mo bere puseŋa kikia na ye tei to.” Ka laam ma yigi kaane wom lela ka jwoori ka yage garewaa kam wone, ye ka daare ka kwei ni-pugu kom ka pu ni dem goppe.
9A ta na kwoni a yuu a nii wɛɛne konto to mo a daa nɛ kaana balei na zege wɛyuu kom ne ba jaane ba maa beena. Ba maa yaare ba vɔna vio yiga ne ne buga ni zuna na ke tei to. Ba ma vo ba gɔ garewaa kam wɛɛne ba ja ba di wɛyuu baŋa.
10A ma bwei maleka kam a we, “Ba jege garewaa kam ba maa vei yei ne mo?” 11Ka de ma leiri-ne ka we, “Ba jege-ka ba maa vei Babilonia teo mo. Ba nam ná yi da, ba wó lɔ diga se ba kwei garewaa kam ba zege ka wone, se nɔɔna laam taa zuli-ka.”
Currently Selected:
Zekaria 5: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)