Zekaria 14
14
Baŋa Wɛ wó ba se o di paare
1Nii-na! Baŋa Wɛ jege dɛ de na beene. Dɛ dem konto ná yia, á dona bam wó ba ba vere á jejegero ba daare ba chɛ-te ba pa daane ye á zege á nia. 2Ko na wó ke tei to, amo Baŋa Wɛ wó pa se dwi-gɛ tiina maama ke daane ba ba ba jeeri Jerusalem teo kom de jara. Ba wó wane teo kom ba di. Ba maa wó zo sam wone ba vere nɔɔna jejegero, ye ba zi ba kaana. Ba ta wó kale ko nɔn-bia bam chichworo ba ja ba vo sa-teo yiga yiga. Ba chichworo kolo na daare to nam wó na chwoŋa se ba maŋe teo kom wone. 3Baŋa Wɛ tete nam mo lage o nwoŋi o vo o jeeri dwi tiina bam konto, ne o déem na ke jara tei to. 4Maŋa kam konto ne, o lage o zege Olivi peo kom yuu ne mo, ko na jeeri Jerusalem wɛ-puli seeni to. Peo kom maa wó yare kuni belei, se bwol-kayɔlɔ taa tigi te tetare laŋa ne, ko na zege wɛ-puli seeni ko vo wɛ-zoore seeni to. Peo kom chichworo dedoa wó fofɔ ko vo baŋa seeni, se kodwoŋi kom de vo tega-kuri seeni. 5Abam laam maa wó tɔge Baŋa Wɛ bwolo kom konto á duri á lu, bwolo kom na wó kɛ ko yi Azeli to ŋwaane. Á na wó duri á lu tei to nye de á nabaara déem na ke tei ye ba lu cham wone maŋa kalo Judah teo pɛ Yuzia na di paare ye tega kam ziziŋi to mo. Konto kwaga ne, amo Tu Baŋa Wɛ laam wó pi o nwoŋi, ye o malese-laaro tem maama de tɔge ded‑o.#Amosi 1:1
6Dɛ dem konto ná yia, wea pwooni bá taa wora. Waaro, de zurim de bá taa wora. 7Maŋa kam konto wó taa ye ka yera. Baŋa Wɛ nam yɔɔre o yei ka ni ne. Tega daa bá yi se ka daare ka poore. Wɛ-zoore maŋa ne wea pwooni wó taa wora.
8Dɛ dem konto ná yia, na-ŋona wó ta ba nwoŋi Jerusalem teo kom wone ba taa dura maŋa maama, yadɛ de te-pwoŋa maama. Na bam chichworo wó duri ba vo ba zo wɛ-puli seeni naneo kom. Ba badwonna de maa wó duri ba vo ba zo wɛ-zoore seeni naneo kom.#Ezekeli 47:1; Gurim 22:1 9Baŋa Wɛ maa wó taa ye logo baŋa jei maama pɛ. Maŋa kam konto ne, Baŋa Wɛ wó taa ye o yerane dedoa mo, pa se nɔɔna taa zuli‑o o yere dem na ye dedoa to ŋwaane. 10Tega kam ni maama wó taa ye te-kampare mo, ko zege Geba ne se ko vo ko yi Rimon na wo Jerusalem tega-kuri seeni to. Jerusalem teo kom tete maa wó taa wo wɛ-wɛ, ne ko na maŋe ko ye tei to. Teo kom wó taa yala, ko zege Benjamin ni dem ne, se ko yi jei selo Boboa ni dem na wora to, ye ko kɛ ko yi Gugworo ni dem. Ko ta maa zege Hananeli di-dedɔrɔ kom ne, se ko vo ko yi jei selo ba na ŋoke Vini tio-bia ba pa pɛ wom to. 11Nɔɔna laam maa wó taa zoore Jerusalem teo kom wone. Ko daa bá taa jege se nɔɔna yɔɔre ba chɔge-ko. Teo kom wó fɔge ko zege yalem mo. 12Ko ná ye teene delo maama na jeeri Jerusalem teo kom de jara to, Baŋa Wɛ na wó waare-ba de jawe-chɛɛro telo to mo tento: O wó pa ba ya-nɔna yam moore ye ba ta zege wɛɛne. Ba yi-chele-bia de maa wó chɔge ya gwonnu tem ne, ye ba dindeilima de maŋe ba nia ne ya pɔ.
13Dɛ dem konto ná yia, Baŋa Wɛ maa wó pa se ba boboŋa tiini ya vugimi se foone zo-ba. Ba wone nɔɔno maama wó zi o dwoŋi pa se ba mage jara. 14Judah tiina bam de wó kwaare jara Jerusalem teo kom ne. Jerusalem tiina bam laam maa wó la teene delo na gilimi-ba to jejegero ba ke daane, ko ná maŋe ko ye sabu-seŋa, de lu-nyenno, de gwaaro dedɛ de. 15Jawe-chɛɔ konto dwoŋi de maa wó ja sisein-nɔɔna bam, de sisei-bonɛ sem, de kona yam, de bonɛ sem, dedaane vara balo maama na wo ba dona bam tigisim jei sem wone to.
16Ko kwaga seeni, teene delo nɔɔna ya na kwaare jara de Jerusalem teo kom ye ba wori to maama laam wó yeini ba vo Jerusalem bene maama ne, se ba zuli Pɛ wom na ye Paŋwa Tu Baŋa Wɛ to, ye ba daare ba di Vwoa chwiim kuri dem.#Chullu 23:33-43; Jeelim 29:12-34; Nia Gulim 16:13-15 17Dwi delo maama na wo logo baŋa ne to nam ná ve se ba vo Jerusalem ba zuli Pɛ wom na ye Paŋwa Tu Baŋa Wɛ to, doa bá ne ka pa-ba. 18Ejipti dwi tiina bam de ná ve se ba vo da se ba tɔge ba zuli‑o, doa bá ne ka pa banto de. Baŋa Wɛ nam wó pa jawe-chɛɔ mo ja-ba, ne kolo o na pɛ se ko ja dwia yalo maama na ve se ba vo Jerusalem ba di Vwoa chwiim kuri dem to. 19Lɛɛro tento dwoŋi mo wó yi Ejipti tiina bam de dwia yalo maama na ve se ba vo ba tɔge ba di Vwoa chwiim kuri dem to.
20Maŋa kam konto ne ba wó popone botare sento mo ba ke sisein-nɔɔna bam lwoŋina yera ne: “Wose mo Baŋa Wɛ ŋwaane”. Kambi dwi maama maa na wo Wɛ wara-jei sem ne to de maa wó taa jege kuri se maŋe de kabeili selo na ke Wɛ bimbini dem kaanem totoŋa to. 21Chega to, kambi selo maama na wo Jerusalem ne de Judah teene dem maama ne to wó taa ye wose mo Paŋwa Tu Baŋa Wɛ ŋwaane. Nɔɔna balo maama na lage ba ke kaanem ba pa Wɛ to maa wó wane ba kwei kambia kalo maama ba na lage to ba saŋe kaanem dem nɔna ka wone. Maŋa kam konto ne, pipim-piinu daa bá vo o jeini Dam-fɔrɔ Tu Baŋa Wɛ wara-jei sem wone.
Currently Selected:
Zekaria 14: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)