Mika 7
7
Isarele tiina lwarem kikia daga
1A wo chɔge dedɛ. Amo gɛa, nenɛɛne nɔɔno wolo na beeri tio-bia se o di ye o ga tei to. Ko nye de mɔɔro telo a fera na zo to daa wo daare kaporro tem yuu ne, ye nɔɔna maŋe ba gwori Vini tio-bia bam maama. 2Nɔɔna daa tera tega kam baŋa ne ba na jege Wɛ chega kam to. Nɔn-laaro wo daare, de dedoa de. Nɔɔna bam maama yɔɔre ba jei ba pɔe mo se ba ná nɛ pwola se ba zi daane ba go. Nɔɔno maama jei de o dwoŋi bane mo, ye ba gwaare gwonnu ba tiŋi da-ŋwaane. 3Ba jagwia de jazem maama yei lwarem keim. Dedɛɛra bam yeini ba jwoŋi dim mo ye ba daare ba bore nɔɔno bora. Naduna de maa pa se nɔɔna ke ba boboŋa na lage tei to. Ba maama sɔge ni mo daane se ba taa toŋe lwarem. 4Ko ná maŋe ko ye ba wone balo na kwaane se ba taa tɔge chwoŋa to, banto de nye de sabare de ga-cheiŋo mo.
Maŋa mo tento se nɔɔna bam na waarem ne Wɛ sampwori sem na taga tei to. Ba boboŋa wó tiini ya vugimi ko ŋwaane. 5Yé pa n dwoŋi chega, ne o ná maŋe o ye n chilwoŋ-zɔŋɔ mo de. Nmo de n kaane wolo na tigi daane to, ta‑n yei n ni lara ded‑o. 6Maŋa kam konto ne, bu-baara bá taa nege ba kwoa, ye bukwa de wó lɔ ba niina kwaga ne. Kaane maa bá sɛ o nege o baro nu. Nmo tete diga tiina mo wó zaŋe ba done‑m.#Matiyu 10:36; Luka 12:53
7Ko nam ná ye amo, amo teena wo Baŋa Wɛ tei ne mo. Amo Tu Wɛ mo ye amo Vereno. Amo wó taa pɔ‑o mo se o ba o zeini-ne, ne amo na lwoori‑o tei to.
Wɛ wó zeiŋi o nɔɔna bam
8A dona bam, yé ta‑á jege-ne á mɔna. Amo na zo yaara yalo wone to, a daa ta wó zaŋe a yage-ya. A jei yibiri wone mo tento. Baŋa Wɛ nam wó zeiŋi o pwooni dem o pa-ne. 9Amo seene a toŋe wɛleere Baŋa Wɛ yiga ne. Konto ŋwaane ko maŋe se o bane zaŋe amo baŋa ne. O ná waare-ne o ti, o laam wó ba o zege amo kwaga ne se a zege de chega. O ta wó jwoŋi-ne o ja o zo o pwooni dem wone se a taa tɔge o chwoŋa kam. 10A dona bam yeini ba tɛ ba we, “Nmo Tu Baŋa Wɛ wom bɛ?” Ba nam ná nɛ we Baŋa Wɛ jwoŋi-ne, chaveera wó ja-ba dedɛ. Amo yi wó na ba na toa tei to. Nɔɔna wó ba ba nɔ ba baŋa ne, nenɛɛne ba ye chwoŋa ni bworu mo tei.
11Jerusalem tiina bam, maŋa wó ba se á jwoori á lɔ á teo kom kabiri sem. Abam na wó ta‑á tei jei selo maama to wó yale se gaale. 12Maŋa kam konto ne, á nɔɔna balo déem na jage ba vo mɛ maama to wó jwoori ba taa zoore á teo kom ne. Ba badwonna wó nwoŋi Asiria mo ba ba á tei, se badaara de nwoŋi Ejipti seeni dedaane Yuferata buga kam seeni ba ba. Ba daa ta wó nwoŋi naneero tem jei sem, dedaane peero tem laŋa kam maama ba jwoori ba ba abam tei. 13Tega baŋa kalo maama na daare to laam wó ji kafɛ, dwi-gɛ tiina balo na zoore da to totoŋ-balwaaro tem ŋwaane.
Baŋa Wɛ na duri o nɔɔna ŋwaŋa tei to
14 Baŋa Wɛ, ta‑n nii n nɔɔna bam baŋa ne, ne nayero na yere o pei tei to. Ba ye nmo tete nyem ye ba zoore kagoa wone mo ba yerane. Nam kale-ba n vo te-ywoŋa jei selo na gilimi-ba to. Pa-ba chwoŋa se ba vo Basan de Gilead ye ba di ga-lɛɛro ne ko déem na maŋe ko ye tei to. 15Daa ta n toŋe wo-kenkagela n pa debam, ne n déem na toŋe tei n ma n ja debam n nwoŋi Ejipti ne to. 16Dwi-gɛ tiina bam ná nɛ tento, chaveera wó ja-ba de ba na maŋe ba jege dam ye de ti tei to. Ko wó so-ba pa ba ja ba nia ye ba daare ba se ba zwa ko ŋwaane. 17Ba ta wó ma ba pwi ba fɛɛle tega ne ne tega-veila tei, pa se kasolo yerane mo wó taa ye ba ni-wodiu. Ba wó nwoŋi ba gugworru wone ba ba nmo yiga ne ye ba yera sae, ba na kɔre foone de nmo wolo na ye debam Tu Baŋa Wɛ to ŋwaane.
18Debam Tu Wɛ, wɛ dedwoŋi daa tera de na maŋe de nmo to. Nmo yerane mo kwei dé wɛleera n ma n chɛ debam. Debam mo ye balo yerane na daare n tete nɔɔna bam wone to. Nmo bane ná zaŋe debam baŋa ne, ko bá dáane ye de jwoori de to, nmo na jege debam swono to ŋwaane. 19Nmo ta wó ba n duri dé yibwona, se n daare n ma n dam dem n saare dé wɛleera yam. Nmo wó kwei-ya n dole n yage pa se ya kɛ naneo kom tega kuri kuri ne.#Nwoŋim 34:6-7; 2 Tigisim 6:24-31; 30:9 20Nmo wó zege n chega kam baŋa ne n pa Jakob dwi tiina bam, ye n daare n ta‑n jege Abaraham dwi tiina bam ŋwaŋa. Nmo wó ta‑n swo-ba se ko maŋe de n na pwooli tei dedaane dé nabaara bam faŋa faŋa to.
Currently Selected:
Mika 7: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)