Mika 6
6
Baŋa Wɛ na bwei Isarele tiina bam tei to
1Cheigi-na Baŋa Wɛ na lage o ta kolo to:
“Isarele tiina bam, zaŋe-na se á tole á taane dem se peero tem de zwonnu tem maama ni. 2Amo, Baŋa Wɛ mo jege taane se a ja a jeeri abam balo na ye a tete nɔɔna bam to. Logo baŋa peero tem dedaane tega kuri dem maama wó zege amo chega kam kwaga ne.
3A nɔɔna bam, a bere a ke bɛ mo a ma chɔge abam? A bɛɛse abam tetɛ mo? Á jege taane se á ta na?#Jeremia 2:5 4Amo nam jaane abam a nwoŋi Ejipti teo kom ne a ma vere abam á kabɛɛne dem ne a yage. A déem pɛ se Moses de Aron de Miriam mo tɔge abam yiga.#Nwoŋim 15:20 5Yé swei-na Moaba tiina pɛ Balaki déem na boŋe se o ke abam tei to, se á daare á guli Beora bu Balaam na jwoori o ke zaane abam yuu ne tei to.#Jeelim 22:4–24:25; Josua 3:1–4:24 Daa ta á guli-na á na beeri kagoa kam ne ye a nii abam baŋa ne, ko zege Sitim ne se ko vo ko yi Giligal ne tei to. Konto wó pa se á wane á maane amo na seene a ke abam lanyerane tei to.”
Baŋa Wɛ chwei sem tɔgem
6Amo ná tu Baŋa Wɛ yiga ne se a zuli‑o, a nam wó ja pɛɛre dwi dɔ mo a ba a pa‑o, de o na ye wolo na tei wɛyuu maama to? Ko maŋe se a ja na-bale selo na yi bene to a zwɛ a ma ke kaanem a pa‑o na? 7Amo ná jaane pi-bale morro morro a ma ke kaanem a pa‑o, naa a kwei nuga kalo na su kuriwaa morro fuga to a pa‑o, Baŋa Wɛ yi wó su a pɛɛra yam na? Amo ná maŋe a kwei a bu-kwea kam a ke o jeŋa ne, konto wó wane ko ŋwe a wɛleera yam jene na? Amo yera yam wó saare a lwarem kikia na?#2 Pwa 3:27
8A choro, ko nam na ye tei to, Baŋa Wɛ maŋe o pa se nmo lɔre chwei selo na lana se n ta‑n tɔge to. O na laga se o na kikia yalo n tei ne to mo tento: Nmo jege se n ta‑n tɔge chega n ŋwea maama wone, ye n jege n dwonna swono, se n daare n tu n tete se n ta‑n tɔge nmo Tu Wɛ chwei sem.#Nia Gulim 10:12; 1 Samuwel 15:22; Lei 51:16-17; Zekaria 7:9-10
Isarele tiina maŋe waarem
9 Baŋa Wɛ ŋɔɔne de teo kom nɔɔna bam. Wolo maama na jege swa chekke to wó taa kɔre‑o mo. O maa we:
“Cheigi-na, abam balo na gilimi daane teo kom ne to de á dwi dem maama. 10Ko ná ye Jejegero telo á na kwaleme á sam ne to mo, á gane nɔɔna mo á jwoŋi-te. Amo chuli lwarem kikia yanto dwoŋi. 11Ko ná ye wolo na kwei bwɛ selo na muri o ma pini o yeilla bam to, a bá yage kotu wɛleera yam a ma chɛ‑o. 12Teo kom naduna bam bɛɛse balo na ye zora to. Abam balo maama na zoore teo kom ne to maa ye vwa-nyena. Á ni taane ba jege chega.
13Á totoŋ-balwaaro tem konto ŋwaane mo a lage a waare abam lela. Á daa bá ta‑á jege dam. 14Chega na ba chuli taane to, abam wó di wodiu ye á bá fɔge á su. Á wó ta‑á wo kana wone mo taa. Wonnu telo maama na wó zo á jea wone to, á bá na chwoŋa se á tiŋi-te jwa ŋwaane. Amo nam wó pa á dona bam ba ba vere á na wó tiŋi fenfee kolo to jara baŋa ne. 15Abam wó du mena ye á bá zage-ya. Á ta wó ŋoke Olivi tio-bia ye á bá ma nuga kam á turi á yera. Á maa wó ŋoke Vini tio-bia ye á bá nyɔ ba sana bam.
16Chega ŋwaane to, abam tɔge chwei selo Pɛ Omiri de o bu Pɛ Ahab de ba dwi dem maama déem na tɔge to mo.#1 Pwa 16:30 Á na lwoni banto totoŋ-balwaaro tem to ŋwaane mo pɛ se á zo cham dento wone. Amo wó chɔge á teo kom maama pa se chaveera di abam fase. Dwi-gɛ tiina wó taa jege abam ba mɔna, ye ba twe abam dedɛ.”
Currently Selected:
Mika 6: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)