Malaki 1
1
1Kwora kalo Baŋa Wɛ na kwei o pa Malaki se o lwoni o bere Isarele tiina bam to mo tento.
Baŋa Wɛ swoi Isarele dwi dem
2 Baŋa Wɛ mo tage we, “Maŋa maama wone mo amo tiini a jege abam swono.”#Jeremia 31:3 Abam nam daa ta kare á bwei amo we, “Bere debam chwei selo nmo na tɔge ye n swoi debam to.”
Amo Baŋa Wɛ ma leiri a we, “Yé swei-na we abam nabaaro Jakob déem ye nyaane mo o zembaaro Esawu yiga ne. Amo nam jege Jakob de o dwi dem swono, 3ye a chuli Esawu de o dwi dem ni taane. Konto ŋwaane mo amo pipiri Esawu na jei peero laŋa kalo ne to, pa ka ye yɔɔ yerane. Ba tega kam ma ji kagoa ye ga-vara kare ka wone ba beera.”#Pulim 25:22-34; Rom 9:13
4Esawu dwi Edom tiina bam wó wane ba ta we, “Debam teo kom seene ko chɔge mo. Dé nam wó jwoori dé lɔ-ko dé zege.”
Amo Paŋwa Tu Baŋa Wɛ nam tɛ we, “Ba ná ke dam ba jwoori ba lɔ ba teo kom, amo ta lage a vaare-ko mo a de tega ne. Nɔɔna wó taa yaale ba teo kom ba we ko ye te-balɔrɔ mo, ye ba bwoi Edom tiina bam we ba ye balo Baŋa Wɛ bane na fɔge de wo ba baŋa ne to.”
5Abam Isarele tiina bam wó na tento maama, ye á laam wó ta we, “Baŋa Wɛ dam daga. O dam dem nam kɛ de yi teene dedwonna ne mo se ko dae debam teo kom siseini dem yerane.”
Wɛ na bwɛ kaanem tiina bam tei to
6Paŋwa Tu Baŋa Wɛ jege kwora kanto mo se o pa kaanem tiina bam:
“Bia jege se ba taa nege ba kwoa mo, se balo na toŋe ba pae nɔɔna to de taa nege balo na tei-ba to. Amo nam mo ye abam kwo de á yuu tu de. Á nam ba nege-ne. Bɛ mo tei keim dento maama? Abam tiini á gwooni amo, ye á ta kare á bwei we, ‘Tetɛ seeni mo dé gwooni nmo?’ 7Abam pɛ se chaveera ja-ne, kokuri to á jege wodiu kolo na digiri to mo á ke kaanem á pa-ne, ye á daa ta jege ni se á bwei amo we, ‘Debam bere dé ke tɛ mo ye dé pa se chaveera ja nmo to?’ Nii-na mo! Abam keim dem bere nenɛɛne á yeini á nii amo kaanem bimbini dem mo ye á chweesa we, de ye wo-kafɛ mo. 8Abam na yeini á ja vare-lilwoa de vare-gwane dedaane vare-jaweena bam se á ma‑á ke kaanem á pa amo to, konto dae wɛleere mo na? Á wó wane á ja vara konto dwoŋi á vo á pa á teo kom yuu tu mo na? Á ya ná ke konto, á boŋe we o wo wó pwoli de abam se o wane o nii á seeni na?#Chullu 22:22 9Abam nam ná vei yiga se á ta‑á jaane vara konto dwoŋi á tui á ke kaanem á pa amo, ye á laam ba á lwoori lanyerane a tei ne, á boŋe we amo wó cheigi abam taane mo na?”
10Paŋwa Tu Baŋa Wɛ na jege kolo se o ta to mo tento:
“Abam wone dedoa ya mo ná maŋe o pi Wɛ diga kam ni dem, ko ya wó taa gara. Konto wó pa se á daa bá ja kaanem delo na ba jege kuri to á ba á zwɛ á pa-ne. Amo ba jege wopwolo de abam kaanem tiina bam na ke tei to. Konto ŋwaane mo a bá jwoŋi á pɛɛra yam. 11Amo zula yam wó zaŋe baŋa baŋa mo logo baŋa teene dedwonna wone. Ko zege teene delo na jeeri wɛ-puli seeni to se ko yi delo na wo wɛ-zoore seeni to, de maama wó zuli amo. Jei maama ne mo nɔɔna wó ja talwoŋ-ywoŋa dedaane pɛɛra yalo na ye wose to ba ba se ba pa-ne zula. 12Ko nam ná ye abam, á gwooni-ne mo, nenɛɛne á na yeini á boŋe we amo bimbini dem mo ba jege kuri to. Abam ma yeini á ja wodi-yɔɔro á ba dáa ne se á pa-ne. 13Abam na kare á ŋɔɔne tei to mo tento: ‘Wɛ totoŋa yam tiini ya chamma mo’, ye á daare á virigi á kwaga á ya amo. Abam ná ŋɔge vara á ja á ba, naa á ná jaane vare-jaweena dedaane vare-gwane mo á ba se á pa amo, á boŋe we amo ta wó jwoŋi tento maama ye a wo pwoli na? 14Sɔɔlem mo daŋe kampin-nyena bam yuu ne! Kolo ŋwaane o jege vare-laao o sɔŋɔ ne, vare-bɛa kalo o ya na pwooli se o ma ke kaanem o pa-ne to, ye o laam jwoori o ni dem kwaga ne se o pa-ne varem wolo na wo su yi to. Amo mo ye Pa-faro ye ko jege se logo baŋa teene dem nɔn-bia bam maama mo taa kɔre amo yere dem!”#Lei 47:2
Paŋwa Tu Baŋa Wɛ na tage tei to mo konto.
Currently Selected:
Malaki 1: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)