Jonah 1
1
Jonah ve Wɛ ni
1 Baŋa Wɛ déem mo ŋɔɔne de Amitayi bu Jonah o we,#2 Pwa 14:25 2“Zaŋe n vo Ninevɛ te-fɔrɔ kom n ta‑n kaane ko nɔɔna bam we, ba lwarem dem gaale amo yiga ne.”
3Jonah ma ve ye o zaŋe o duri se o vo Tarasisi. O déem vei Jopa mo se o ná nɛ nabworo na maa vei jei sem konto, se o duri o lu Baŋa Wɛ yiga ne. O laam ma ŋwe o sabu, ye o da o zo nabworo kom ne.
4 Baŋa Wɛ ma pa se vo-dɛɔ zaŋe ko mage na bam dedɛ. Vio kom na tiini ko fufugi konto to, nabworo kom maa ga fee se ko bwori. 5Foone ma tiini de ja nabworo kom yuŋina bam, ye ba dedoa dedoa bobo o kaase o lwoori o teo wɛ se de jwoŋi‑o de yage. Ba ma daare ba dole ba zela ba yage na bam ne se nabworo kom taa pwona.
Jonah déem nam ya tu nabworo kom kuri gugworo ne mo o tigi da, ye o dɔ o kɛ. 6Yuŋina bam yiga tu wom ma vo o na‑o, ye o bwei‑o o we, “Bɛ mo ye nmo tigi n dɔa? Nmo de zaŋe n bwoŋi n Wɛ yere, se dɛ delo wonto wó duri dé ŋwaŋa, se dé yé maŋe na banto wone.”
7Nabworo yuŋina bam ma bane daane ba we, “Pa-na se dé ta jɔrɔ se dé lɔre wolo ŋwaane cham dento na yi debam to.” Ba na tage to, ko ma ja Jonah. 8Ba ma bwei‑o ba we, “Ta‑n tɛa, wɔ mo pɛ se lwarem dento ba debam baŋa? Bɛ totoŋe mo nmo jega se n toŋe ywo? Nmo nwoŋi yei ne mo? Nmo dwi ye dɔ mo?”
9Jonah ma leiri o we, “Amo ye Hiburu dwi tu mo. Amo nam tɔge Yuu-tu Baŋa Wɛ wolo na tei wɛyuu ye o kwori o ke tega baŋa de naneo maama to mo.” 10Ba na nigi konto to, foone déem ma tiini de ja nɔɔna bam. Kokuri to, Jonah ya maŋe o ta o bere-ba we o kwaane se o duri o lu Baŋa Wɛ yiga ne mo. Ba ma bwei‑o ba we, “Bɛ mo ye nmo ke keim dento?”
11Nabworo yuŋina bam ma bwei‑o ba we, “Bɛ mo dé wó ke de nmo se naneo kom ke ziim?” Vio kom déem yɔɔre ko taa tiini ko dana ko pa-ba mo pa se ba bwei‑o konto. 12Jonah ma leiri o we, “Ja-na amo á dole á de naneo kom wone, se ko wó ke ziim ko pa abam. Ko ye chega, amo yiga mo pɛ se abam zo vo-dɛɔ konto wone.”
13Ba maa wo sɛ ye ba ya ta kwaane ba yuŋa de ba dam maama se nabworo kom wane ko bɛ buburu baŋa, ye ba ware. Vio kom ma bole ye ko fɔge ko tiini ko dana ko ja gaale. 14Ba ma kaase ba bwoŋi Baŋa Wɛ yere ba we, “Jan ja, Yuu-tu Baŋa Wɛ! Dé lwoori‑m, yé chɔge debam dé na lage dé le nɔɔno wom ŋwea to ŋwaane. Kokuri to, nmo ná wo pɛ chwoŋa, tento maama bá ke.” 15Nɔɔna bam ma dole Jonah ba de naneo kom wone, ye ko de ke ziim bedwe baŋa ne. 16Ba na nɛ kolo maama na ke to, mo Wɛ kɔrɔ zo-ba lanyerane. Ba ma kwei kaanem ba ke ba pa Baŋa Wɛ, ye ba ta pwooli se ba taa zuli‑o.
17Ko nam ná ye Jonah, Baŋa Wɛ toŋe ywoni kamunu mo pa se de ba de li‑o. O maa wo ywoni dem wone da yatɔ wea de tete maama.#Matiyu 12:40; Luka 11:29-30
Currently Selected:
Jonah 1: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)