Hosea 2
2
1Konto ŋwaane, á wó bwoŋi á chorro Isarele tiina bam we, ‘A nɔɔna’,#2:1 A nɔɔna: Hiburu = Ammi de ‘A bu-swonnu’.#2:1 Bu-swono: Hiburu = Ruhama
Isarele tiina na ke ba chɔge tei to
2A bia bam, bwɛ-na á nu wom! Taane wora debam laŋa ne. O daa dae amo kaane wom chekke. Amo de daa dae o baro wom. Kwoori-o-na se o yage o kabwoŋa kikia yam, se o daa yé taa kare o chɔge o tete de baara. 3O ná wo sɛ se o ke konto, a wó choore o yera zela a daare‑o, ne o nu de o kwo na loge‑o tei to. A ta wó pa o ŋwea taa ye kafɛ, ne te-kora na tigi ye na tera tei to mo. Konto baŋa ne mo na-nyɔm wó go‑o. 4Amo bá taa jege o bia bam ŋwaŋa, o na tole o lo-ba to ŋwaane. 5Ba nu wom ywori o baro wom kwaga ne. O ma lo o bia bam de chaveera. O maa we, “A wó nwoŋi a vo a bɔɔla bam tei. Ko ná ye wodiu, de na, de gwaaro, de nuga, de sana de, banto wó ke ba pa-ne.” 6Konto ŋwaane, a lage a zage sabare mo a kwei a maa che o chwoŋa. A ta wó lɔ kabira a maa pe‑o, se o daa yé wane o nwoŋi pwooni. 7Kaane wom wó kwaane se o pare o bɔɔla bam, ye o nam bá yi-ba. O wó beeri ba jei, ye o yi bá peere-ba. O laam maa wó ta o tete ne we, “Yage se a jwoori a vo a baro wom tei, ne ko déem na ye tei to. A boboa kam yɔɔre ka gare a zem na ye tei to.” 8O nam wo ke o boboŋa ne we ko ye amo mo pɛ‑o mena yam, de sa-doora bam, de nuga kam. A ta ma pa‑o lu-nyenno de sabu-seŋa dedɛ, ye o kwei-te o ma zuli Baal jwona yam.
9Mo kokuri, mena yam ná tu ya be, ye sa-doora bam de ná bega, a lage a yiri a pɛɛra yam konto mo. Ko ta ná ye gwaaro telo a na pɛ‑o se o ma kwoli o chaveera to, a wó jwoori a jwoŋi-te o tei ne. 10A ta wó choore o teiŋa zela a daare‑o, pa se o di o chaveera o bɔɔla bam yiga ne. Nɔɔn-nɔɔno bá wane o jwoŋi‑o amo jeŋa ne o yage. 11A wó che kwɛɛra yalo o na di ywoni ya baŋa ne to, ko ná maŋe ko ye kuri delo maama o na yeini o guli o di to. Bene bene kura, de chan-doŋa kura, de siu dɛ maama kura mo konto. 12Ko ná ye Vini teeni dem, dedaane kaporro tem o bɔɔla bam na pɛ‑o to, a lage a chɔge-te mo. O tage o we, te ye ŋweero telo o na jwoŋi o baara bam tei ne kabwoŋa ŋwaane to mo. Amo nam wó pa se o kare sem konto ji goa. Kago-vara wó taa tui ba di teeni dem. 13A wó waare‑o de o na zwɛ talwoŋ-ywoŋa o ke kaanem o pa Baal jwona yam ya zula da yam ne to ŋwaane. O maa yeini o kwɛ o tete de zambila, de jafola se o ma tɔge o bɔɔla bam kwaga. O na ke tei maama to, o yɔɔre o swei amo swia mo.
Baŋa Wɛ na tage tei to mo konto.
14Konto ŋwaane, a laam lage a kwoori‑o mo se a ja‑o a zo kagoa kam wone, se a daare a ma swono taane a ŋɔɔne ded‑o. 15Dáane mo a wó jwoori a kwei o Vini teeni kare sem a ke o jeŋa ne. A ta wó pa se Akore#2:15 Akore kuri mo ye Acham. bwolo kom pipiri ko ji teena jeiga ko pa‑o. Kaane wom laam wó leeni lei ne o déem na ke tei ye o nwoŋi Ejipti teo kom ne o biini maŋa ne to.
16 Baŋa Wɛ kwora mo tento: Dɛ dem konto ne, nmo wó jwoori n bwoŋi-ne we n baro. N daa bá fɔge n bwoŋi-ne we n Baal jwoni dem.#2:16 n Baal jwoni dem naa n yuu tu 17Amo ta wó che Baal yere dem n ni ne, se n yé lwoori wolim Baal jwona yam tei ne. 18Dɛ dem konto ne a wó ke ni-sɛɛm dedaane kago-vara bam, de zuna bam, de tega-veila bam se ko che a nɔɔna bam se ba yé na chɔgem. A ta wó chɔge jara zela maama, ko ná ye tɛ de se-zɔɔro, se tigura daa yé zaŋe tega kam baŋa ne. Konto laam wó pa nɔɔna maama sii de yazura.#Izaya 11:6-8 19Amo wó pa se n ji a kaane ye n ta‑n wo a tei ne taa wuu. Amo wó tɔge chega, de swono, de ŋwaŋa baŋa ne mo a ke konto. 20Dé wó taa jege chega dé pa daane, ye dé bá jwoori da-kwaga. Nmo de wó ba n sɛ we amo mo ye n Tu Baŋa Wɛ wom.
21 Baŋa Wɛ kwora mo tento: Dɛ dem konto ne amo wó leiri ba wɛ-lworo kom. A wó ta de wɛyuu kunkwonnu tem se te pa doa taa nena tega kam baŋa ne. 22Tega kam de wó sɛ ye ka ke mena, de sa-doora, de nu-doŋa lanyerane. Tento maama wó leiri de wopwolo te we, “Wɛ mo duga.”#2:22 Wɛ mo duga: Hiburu = Jezerele 23Chega to, amo wó pa se a nɔɔna bam fɔge ba na kugu jei tega kam baŋa ne se ba taa ye a tete nyem. Ko ná ye wolo ba ya na bwoi o yere we “Swono tera”#2:23 Swono tera: Hiburu = Lo-Ruhama to, amo mo wó taa swoi kotu. Ko ta ná ye balo ba ya na bwoi-ba we “Ba dae amo nɔɔna”#2:23 Ba dae amo nɔɔna: Hiburu = Lo-Ammi to, amo laam wó ta de-ba we, ba seene ba ye a nɔɔna mo. Ba de maa wó leiri ba we, “Nmo ye debam Tu Wɛ wom mo.”#1 Piita 2:10
Currently Selected:
Hosea 2: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)