Hosea 13
13
Lɛɛro wó yi Isarele tiina bam
1Efrayim yiga tiina bam déem na puri ba ni ba ta taane to,
lwia mo jaane Isarele dwia yadwonna yam,
ba na tiini ba kɔre Efrayim dwi dem to ŋwaane.
Ba nam ke ba tusi de ba na zuli Baal tei to.
Konto mo tei ba maŋe se ba te.
2Ba daa ta tiini ba tusi ba daŋe da-baŋa ne.
Ba yeini ba kwei lu-nyenno mo ba ma mɔ jwona se ba zuli-ya.
Ba maa tɔge ba boboŋa na lage tei to,
ye ba pa se gwaro mo fɔge te ke wonnu tem.
Ba yeini ba ta jwo-kaana bam konto taane ba we,
ba ye balo na kukwori na-mɔre to mo.
3Mo kokuri nɔɔna bam konto bá dáane ye ba jei.
Ba wó taa nye de kunu kolo na tui zezeŋa ne
ye ko jei lela to,
naa nyɔnɔ kolo na toa ye ko ba dáane to mo.
Ba ta wó taa nye de vio na kale swanno telo ko ja viiri to,
naa nyoa na tɔge natwoŋo ka nwoŋi ka kɛ to mo.
4Amo mo ye á Tu Baŋa Wɛ wolo wom na jaane abam
a nwoŋi Ejipti teo kom wone to.
Wɛ dedwoŋi tera á na jege se á lɔre-de
ye ko dae amo.
Jwoŋinu wodwoŋi maa tera ko ná dae amo.#Izaya 43:11
5Abam déem na beeri kagoa wone
mɛ na ye te-kora yerane to,
amo mo nii á baŋa ne.
6A nam na pɛ á kwoa bam wodiu se ba di to,
ba di ba su ba ta daare.
Ba na di ba su konto to,
ba laam ma bere ba tete kamunim,
ye ba swei amo ni ne.#Nia Gulim 8:11-17
7Mo kokuri a lage a pɔpɔ a ba ba baŋa ne
nenɛɛne nywoŋo dwoŋi tei.
A ta wó che ba chwoŋa,
ne gweeru na peini o che chwoŋa tei to.
8Amo wó zaŋe ba baŋa ne
nenɛɛne nywoŋ-kura kalo ba na vere ka bia ba daare-ka tei to,
ye a daare a kaare ba nyɔɔna.
A ta wó chɔge-ba lela ko nɛ sem ni ne.
A maa wó tore-ba yera yera,
ne nywoŋo na tore vara tei to,
naa kago-varem na yeini o ke tei to.
9Isarele tiina bam, lɛɛro wo á yuu ne!
Nɔɔn-nɔɔno tera o na wó zeini abam.
10Á pɛ wom bɛ?
Wonto wó wane o jwoŋi abam na?
Se balo na ye nakwa á teene dem maama ne to
de wó wane abam ba zeini na?
Abam déem nam lage pwa de nakwa
se ba taa nii abam baŋa ne.
11Amo ban-zɔŋɔ kom baŋa ne mo
a déem tiŋi pɛ a pa abam.
A nam ta daare a le wonto á wone,
a ban-lom na fuli á baŋa ne to ŋwaane.
12Efrayim tiina bam tusim kikia yam mo wo ba yuu ne.
Ba wɛleera yam maama popone ya tiŋi mo,
se ba yɔɔre ba na waarem ya ŋwaane.
13Ko nye de kaane na virigi puga se o lo tei to.
Isarele dwi dem nam nye de bu-chechɔgɔ mo.
Bu wom lora maŋa ná yia,
o bá sɛ se o virigi o ba o nu yiga.
14Amo Baŋa Wɛ nam wó vere-ba toone jeŋa ne a yage na?
Amo wó jwoŋi-ba se ba yé zo churu mo na?
Toone, n dam dem nam daa bɛ?
N daa‑n bá wane n chɔge-ba na?#1 Korinti 15:55
Amo nam bá duri a nɔɔna bam ŋwaŋa.
15Ba ná maŋe ba puli lanyerane
ba dwoni ba chorro tem tei,
Baŋa Wɛ ta wó pa vo-loŋo nwoŋi wɛ-puli seeni
ko ba ko chɔge-ba.
Vio kom wó zege kagoa kam wone
ko ba ko we ba bwi sem maama.
Ko maa wó pa se ba ga wonnu telo maama na jege lonne te pa-ba to.
16Samaria tiina bam ye se ba na waarem,
ba na nwoŋi ba Tu Wɛ wom kwaga ne to ŋwaane.
Ba dona wó go-ba jara wone.
Ba maa wó yigi ba bu-sese ba de tega ne ba go,
ye ba daare ba lɔ ba kapwi ba pwi seeni ba go.
Currently Selected:
Hosea 13: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)